Filipenses 4 - NandevaBiblia

Pyvyañoĩpo Ñandejare

¹ Hãrã pee shyryvyre apyryraihuva, hareka shykyrẽy apyryreshava, tãnta katu pẽĩhe Ñandeja, ahaihuvare.

² Airure Evodiape, hareka Síntiquepe jyve, tiñymbypya penteĩ Ñandejare.

³ Nde jyve, amba'apoape shimi'ĩrũriva airure nde rymbory verã jyve ñaniindy retape, hai reta rãnga heta shimi'ĩrũ kova Ñee kaviva ambeu'airã, Clemente hareka ĩrũ retajy. Haire hee opama mbyparaha kuatiape.

⁴ Pyvyañoĩpo Ñandejare opa ara. Hai jyvyĩ pee: Pyvy'a.

⁵ Opavare tyhesha pynymbaikaviva. Ñandeja kõõima oujy!

⁶ Avy pejepy'apy maĩnungare, opa pymbeu Ñandejape pimboimarã, pirureshu hareka pymeẽshu pyndyvy'akue.

⁷ Hareka Tũpa pyavapy, hai ojaimbava kuaretare pya mbijetahevaivi, ñyngarekopohe pyndypya hareka pyndypya pimbijetavare, Cristo Jesús rehe.

Pypya pimbijetahe maĩnunga haikaviva

⁸ Koñemahea shyryvyre, pypya pimbijeta katuhe opava oumbava japuivi, heko kaviva, pyrỹmbyhoryva hareka hyrãkua kavivare. Opaite ĩmereva mbai haikaviva hareka katu pyraheva, kova pypya pimbijetahe.

⁹ Pijapo katu she apyrỹmboihe vekua hareka ahejapeva pijapo verã, opaite pyhendu hareka pyhesha shyreva ajapo vekua; kyrã pijapo hãrãpo Tũpa pya kavikue ẽẽ penendiekui.

Filipope'iare rahakashu me'ẽhaĩva Pablope

¹⁰ Shyrory rãnga, Ñandeja rehe pynymanduajy shyreherã hareka peñepyrõ shymbory py'ahujyrã. Ha'eã pyndysare shyhevirã, pyvãheãshu rãmeĩ rãnga marãrapo shymborypi.

¹¹ Ha'eãpe kova aikotẽve airã, ahasa kuaañoĩ rãngatẽ opa ĩme areami ryheve.

¹² Aikatu aiko shypavete ryheve hareka aikatu heta ĩme'arejy maĩnunga, opavare hareka opava pevarã shymbo'eha jyve, shỹvãta hareka shimbahy ai verã, opa ĩme'arevape maĩrã mba'etyite arevape.

¹³ Opa mbai katu ajapo Cristo rupii, hai shymypỹrãtase'ia.

¹⁴ Katynga, pee pijapo kavi shymborypi aikotẽvevaperã.

¹⁵ Pee Filipope'õre pikuaa jyve, ãñepỹrõ ambeu'ai ko Ñee kavivarã, ahajy Macedoniaivirã, koñeĩ pende tũpao rahaka she Tũpape me'ẽãva aikotẽveva pevarã.

¹⁶ Shara aĩmeteri'ãĩ Macedoniaperã, pee hetajy pyrahaka she aikotẽverã pevarã.

¹⁷ Ha'ẽã rãnga aheka'aijyva ynga me'ẽãreiva; koñeĩ aipota me'ẽãjype hekovia pymeẽ she vekuare.

¹⁸ Ã'ẽ opama ĩme'are perukasheva. Hoka peruka she vekua Epafrodito rupii, mbaiveama mba'ety ẽẽ she. Kova pymbousheva hãĩ mbai pishekatuva, pishe kaviva rãĩmi, mbai mbijichehava haikaviva Tũpa pevarã.

¹⁹ Tũpa meẽpojype opava maĩnunga pee pikotẽveva, shara heta mbai ĩmere vate arape Cristo Jesús rupii.

²⁰ Ñamombai vasushu opa ara Tũpa! Amén.

Ñymarãndu koñemahea

²¹ Pymarãndu opaiteva Cristo Jesús heepe opaite heko kyambare. Tyryvyre aiko ai hãndivare, pynymarãndu jyve.

²² Opaite heko kyambare, tynondeite'ẽ Romape huvisharã'õ hoo vasupe'iare, pynymymarãnduka jyve.

²³ Ñandeja Jesucristo jyhaihu tõĩ penendie. Amén.