Filipenses 3 - NandevaBiblia

Tykove kyambava Tũpa meẽva

¹ Ã'ẽ, pee shyryvyre, pyvya katu Ñandeja rehe. She pevarã ha'eã shymangatumba hykuaĩ ha'ĩ ambyparajype kuatiaperã, katynga kova pymborypo pijavymba verã.

² Pingareko katu pijeheshi tykove ñaumba rãĩmi'ivare, porãmba mba'apovare, hareka pyndyrete pota chĩchĩvare.

³ Ñande hai ãñete ñymbai pire chĩchĩava; ñamombaiva Tũpa ñande espiritu ryheve, javyava Cristo Jesure, hareka jairojambaheva tyroore.

⁴ Ajema she ĩmetẽ jyve airojahe verã tyroore. Mba'ety rãnga mbaiva reheiterapo airojahe:

⁵ Shipire chĩchĩã shyhevi 8 aravape, she hai penteva Israelvi ñymoña hãndiva, Benjamín ryheva; she rãnga ha'eiteva hebreo, hareka Moisés mbypara vekua pevarã, she hai jyve penteva fariseo ryhevare.

⁶ Shapuiteherã, tũpaore amoña'are, hareka Moisés mbypara vekua rupii ajaporã, mba'ety mbava mbai heishe verã.

⁷ Opaite kova mbai haikavishe aryka'e, Cristo ahaihu rupii, ã'ẽ mbaiveãma she arykai ambyhaikavi areva.

⁸ Ã'ẽ ahesha kavi kova maĩnunga yty rãĩmi, shara haikaviveshe Cristo Jesús Sheja aikuaarã hareka ãmombo ytype kova maĩnungare, ĩme'are verã Cristo, kyrã Tũpa pota ñandyhevi.

⁹ Añymypente handi verã, ha'eã ñimbivacheva rupii Moisés mbypara vekua rehe, koñeĩ Cristo jairojaherã, ñimbivacheva hai jyrojakue rupii Tũpaivi ouva.

¹⁰ Shykyrẽy aikuaveshuvape, hareka mbaikatu puãjyva ryheva, aĩ verã jyve hai jyhasa'asykuere, hareka amano verã hai mano vekua rãĩmi.

¹¹ Kyrã aipota apity manovare mbyteivi apũãjy verã.

Nde'iaveteri ãvãhẽ japype

¹² Ha'eã ãvãhẽmava japype, maĩrã haikavitema ãĩva, katynga ahaĩterihe tynonde ãhãrõ apitypeve Cristo Jesús shipityva rãĩmi jyve.

¹³ Shyryvyre, she ha'eãpe opa kavima apity pota ãvãhẽvape, koñeĩ ãñete pente maĩnunga ajapo: Ãñymbysareshi opaite hasama vekuaivi hareka ãñehãã apity verã shynonderãpe ẽvã.

¹⁴ Ahaterihe ãvãhẽ verã japyape, hareka apity verã me'ẽãreiiva Tũpa ñanyrẽno ñamyvãhẽ verã Cristo Jesús rupii.

¹⁵ Ñande opa kavima ñanytarõva jyrojakue ĩme jarevape, kyrãmipo ñandypya ñambijeta jyve. Ĩme'ẽ pynymbytepe yngai pya mbijetavarã, Tũpa pynymbyheshakapo jyve kova pipity verã pota pyvãhẽvape.

¹⁶ Tẽvã ñande hokava japitykavivare, pente ñeepeĩpo jaiko hareka penteva pyapeĩ.

¹⁷ Shyryvyre, piko katu she aikova rãĩmi, hareka pymaĩjyhe kyrã ikovape, pikuaa jyveshi ore ikohava me'ẽhapeva rãĩmi ikovare.

¹⁸ Hetama hai jyvyĩpeva rãĩmi, hareka ã'ẽ shysay syry ẽẽ shyrovare, ĩme'ẽ heta heshatamba Cristo jukurusurã.

¹⁹ Hokavare japyapepo jyvareahe retakui. Ñu tũpa ha'ĩĩ potaveshi reta, hareka japuhe reta notitẽ verãre. Yvy'ĩãrẽ õvaĩ pya mbijetahe reta.

²⁰ Ñande katy hai vate arapy'õ ryheva, haivi ñahãrõ jyve ñanykyrẽỹ ryheve Ñanymondo jepeva Jesucristo.

²¹ Hai ñono kavipojy ñandyretepy hai hete hĩmbipekue rãĩmi ñymbaikatu rupii, opa ipope'ẽ opa mbaire.