Filipenses 2 - NandevaBiblia

Jaiko Cristo ikova rãĩmi

¹ Hãma Cristo meẽpe mbaikatu pymykyrẽỹ verã yngava retape, jyhaihukue pyndyraha pypyrỹmbypya kavi verãrã, hareka Espiritupe ñimi'ĩrũ hãndivape hareka ĩmepyre pya kaviva hareka pyryparekovarã,

² kyrãpo shymbyvyapi, piko ijupive pente ñeeperã, jyhaihupe, pente pyapeĩ piko, hareka pente mbai pevarã rãĩmi.

³ Avy pijapo maĩnunga piñymbyvaishopi pijehevape maĩrã pota peñemombaipiva rãĩmi, peñemomishĩĩvape rãngapo pijapo, hareka pepenteĩpo rekohe hapisha vateve'ẽshi haiva rãĩmi.

⁴ Harekajy, avypo mbava heka ha'ei haikavishu verãvẽĩ, koñeĩ yngavare pevarã jyve.

⁵ Piko Cristo iko vekua rãĩmi hareka pijapo hai japo vekua rãĩmi:

⁶ Ajemaĩ haite Tũpa, hai he'iã ijehe mbivacheva Tũpa maĩnunga ha'ĩ pysy verã rãĩmi,

⁷ koñeĩ opa heky ijuhuvii hai rekova, japo ijuhuvi haiteiva jokuehareireva rãĩmi, oava kuareta rãĩmi.

⁸ Hãrã ikoma kuareta rãĩmirã jyrojaã ijehe, ĩñee rẽndu manopeve, hai mano kurusure!

⁹ Hãrã Tũpa vateve ñono opavaivi, haivi meẽshu pente tyree ẽvã opavare ĩãrẽ.

¹⁰ Jesús heepe ĩñesushu verã opava ẽvã vate arapy, yvy'ĩãrẽ hareka yvy'ipe.

¹¹ Hareka opavare hei verã Jesucristo haiva Teja, õñemomba'e vasushu verã Tũpa Teru.

Tũpa tayre hai sapeva rãĩmiva yvy'ĩãrẽ

¹² Hãrã shyryvyre ahaihuva, ãĩme ãĩ penendierã pijapoñoĩ she haiva, ha'eã ãĩme ãĩ penendierãmeĩ, katynga shembape hetave ã'ẽ, kyjevape hareka ryryvape pymba'apohe pynymondojepevare,

¹³ shara Tũpa japo pyndyrehe haikaviva pijapo verã hareka pynymbory pinimbijapoka, shara kyrã hai potarã.

¹⁴ Opa mba'e pijapo pijetakavivape hareka pijakambava ryheve.

¹⁵ Iko pyndyhevi verã mbaimba heshahahea hareka jyrojamba ijeheva, Tũpa tayre rãĩmi kuareta ñarõva hareka mbai porãmba japo'iare mbyteipi, haipepo pinihimbipekui jasytata vate'õre rãĩmi.

¹⁶ Tãnta pẽĩhe hokava Ñee kavi meẽva tykove. Kyrã, Cristo oujymarã shypya horypo pyndyrehe, aikuama ãñanireĩã hareka amba'aporeiarã.

¹⁷ Ajemaĩpo shyrykove hekyhatẽ shyhevi opa japo verã pee pymeẽva Tũpape pirojakue rupii, hãrã avy'a jyve penendie.

¹⁸ Kyrãĩ jyve pee, pyndyrory hareka pyvy'a shendie.

Timoteo hareka Epafrodito japo verã

¹⁹ Ãhãrõ'ãĩ Ñandeja amondo verã Timoteo, avya verã aikuama pyhevi marãra piko.

²⁰ Shara mba'ety arejy ynga pyapenteĩ shendieva, hareka ãñete ojepy'apy pyndyreheva;

²¹ shara opaiteva yngavare heka haire pevarãĩ haikavishuva, ha'ẽã Jesucristo ryheva.

²² Tẽvã pee pikuaama marãra haikavi Timoteo heko, hareka shyray rãĩmi shymbory ambeu verã Ñee kaviva.

²³ Hãrã ãhãrõ'ãĩ pykoty ãmondo verã, haivi aikuaama verã mbaivara ikopo shyhevi.

²⁴ Tẽvã airojahe Ñandeja aha apyryresha verã jyve.

²⁵ Tẽvã haikavivepokui amondo shyryvy Epafrodito hareka mba'apo'i shendieva, shi'ĩrũ õñehãã'i shendieva hareka pymboushu vekua maĩ shyrehe verã aikotẽvevape;

²⁶ hai rãnga kyrẽy oho pyndyresha opaite pee pẽĩva, shara pee pikuaama ñymbairasy'irã.

²⁷ Ñymbairasy rãnga ãñete, hareka ajete mano, tẽvã Tũpa parekoshu, ha'ẽã ha'ẽĩ she jyve, potãã vyamba vekua ñimi'ĩrũvejyshe avyamba ãĩvaperã.

²⁸ Hãrã ãrẽ'ãĩte amondojy pykoty, pyvya verã jyve pyheshajyrã, hareka she avyamba verã jyve.

²⁹ Pymyvãhẽshu Ñandeja heepe vy'akue ryheve, hareka hai rãĩmiva pyndyroryñoĩpo hãndi.

³⁰ Shara ajete mano Cristo rehe mba'apovapẽĩ, hareka hykove haihumbape shĩmi'ĩrũ verã, pee katumba pijapova, mbyrypẽĩ shyhevirã.