Filipenses 1 - NandevaBiblia

Ñymarãndu

¹ Pablo hareka Timoteo Jesucristo jokuevare, opaiteva Cristo Jesús ryhevare kyambava Filipope'õre, Tũpa hoope miñaka'õre hareka tũpaope mba'apova.

² Ñanderu Tũpa hareka jyve Teja Jesucristo tymeẽpe jyhaihukue hareka pyavapy.

Pablo jurure'ĩãrẽ Jesús jyrojaheare

³ Ameẽñoĩshu Tũpa shy'ajetekue shymandua pyndyreherã.

⁴ Hãrã ãĩmboirã, vy'apeñoĩ shymandua pyndyrehe,

⁵ shara shymborypi jyve ambeu verã Ñee kaviva, tynonde arape pyhendurã vekua ã'ẽpeve.

⁶ Arojakatu'ãĩ Tũpa õñepyrõ vekua mbai haikaviva japo pyndyreherã, japoveteripo oho Jesucristo oujypeve.

⁷ Haikavi rãnga kyrã shypya ambijeta pyndyreherã, shara shypyapeĩ apyryre; ajema shymbyperesoha amaĩ'ãĩ ĩãrẽ hareka amy'ãñete Ñee kaviva, opaite pẽĩ jyve shendie jyhaihu Tũpa meẽshevape.

⁸ Tũpa kuaa marãra opaiteva ãñeteĩte apyryraihu shypyaivive jyhaihukuepy Jesucristo meẽsheva.

⁹ Hãrã kova airure shiñymboipe, jyhaihu ĩmepyreva pynytynyhẽve peo verã, hetave opa mbai kuaakuepy hareka hendape kavi pimbijiche verã maĩnunga,

¹⁰ haikavivape piko verã, kyrãra pikopo pyndyreko kyambape hareka mba'etypo mbai porãmba he'ia pyndyrehe verã Cristo oujy verã jy'arape.

¹¹ Pee rãnga pepo tynyhẽpo pyraha teko jyvache i'akue mbaikavi pijapova Jesucristo rupii, kuaretare pyrahe hareka õmombai vasushu verã Tũpa.

She pevarã tykove hai Cristo

¹² Shyryvyre, aipota pikuaa kova mbai jehushevare haikavi jyve Ñee kaviva ryheva ñimbitivishave oho verã.

¹³ Opaite syndarore ẽvã mburuvisha vasu hoope hareka yngavare, kuaa reta Jesucristo ahaihurã rehe shymbyperesoava.

¹⁴ Hãrã hoka mykyrẽỹ opaite shyryvyre mbeu verã Tũpa ĩñee, kyjembape hareka jyrojakue ryheve Ñandejare.

¹⁵ Ãñete ĩme'ẽjy Cristo ĩñee mbeu'iare ñymbyvaisho'ẽ shyreherãmeĩ hareka shyreshatãã ñynoĩrã, tẽvã ĩme'ẽjy kyrẽ'ỹpe japova.

¹⁶ Ã'ãmo mbeu reta Cristo jyhaihupe; shara kuaa reta shiñonoha Ñee Kaviva ryheva amaĩ ĩãrẽ verãrã.

¹⁷ Tẽvã ĩme'ẽ Cristo ĩñee ryheva mbeuva Tũpa haihurã, shara kuaa reta Tũpa shiñono kope amaĩ ĩãrẽ verã Ñee kaviva.

¹⁸ Tẽvã hokava mba'ẽãshe. Hãmeara añetevape maĩrã japuvape, jypyite ijetahaheshe Tũpa ĩñeerãvaĩ shymbyvy'a hareka shymbyvyaveteripo oho.

¹⁹ Hãma aikuaa pimboi shyreherãmeĩ hareka Jesucristo Espiritu shymbory rupii yrẽãmipo ãhẽkui ko shymbyperesohavaivi.

²⁰ Symyĩ kavivape ãhãrõ'ãĩ, ajapoãpo shymymarãka verã, koñeĩ pyavasupe ãmbeu Cristo ĩñee jepi ajaposea rãĩmi, tyhesha shyrehe kuaretare ko Cristo mbaivasuva, aikoterirã maĩrã amanomarã.

²¹ She pevarã shykove hai Cristo, hãrã amanorã haikavitevemapo ãĩkui.

²² Tẽvã, aikoteri ko shyreteperã, katupo amba'apo kaviteri amaĩ kavihe verã heta yngavare, aikuãã marãvara apyhỹrõpo.

²³ Mokue maĩnunga shopy; shykyrẽy amano aĩme hãndi verã Cristo, hokava hai haikaviteveva;

²⁴ tẽvã tekotẽvẽ aikoteri ko yvy ĩãrẽ pyndyrehevape.

²⁵ Hãrã aikuaa ãĩteri verã penendie apyrỹmbory verã, pymypyrãtave verã Tũpa jyhaihukuepe hareka pyreko verã vya pirojakuepe,

²⁶ hãma aijymarã, pyrekovemapo mbaiva reherapo pemombaivasu Jesucristo.

²⁷ Koñeĩ airurepe pikokavi verã Ñee kavi Cristo ryheva pyrỹmboiva rãĩmi. Shara aha apyryresharã maĩrã ãĩmbate haipeva, koñeĩ tahendu pyndyhevi piko kavi ijupiiva hareka piñyhãã pente pyapeĩ Ñee kaviva pirojaheva rupii.

²⁸ Hareka avy pykyjeshi ñymbyvaisho'i pyndyrehevare, hai reta rãnga ijyhesha kavihe opa verã kyty jyraha jyrerã, tẽvã pee pevarã hai heshakava ñymondojepeva ryheva, hokava ou Tũpaivi.

²⁹ Pee rãnga me'ẽhape Cristo pirojapeveĩmbahe verã, pyhasa'asy verã rãnga jyve hai rehe.

³⁰ Pee hareka she rãnga ñaĩmeñaĩ penteva ñyhããpeĩ, hokava pyheshama shyrehe, hareka ã'ẽ pyhenduma marãra ãñehããtẽ aha'ai.