Filemon 1 - NandevaBiblia

Pablo mbyparashu kuatia Filemon

¹ She Pablo mbyperesoava Jesucristo rehe hãndi shyryvy Timoteo, marãnduha haihuhava Filemón, mba'apohavape ĩrĩmirũ'ia,

² hareka jyrojavare ñymbatyva nyrẽntape jyve ñaniindy Apia hareka Arquipo, õñehã'ãha'i hãndiva.

³ Tũpa Ñanderu hareka Teja Jesucristo tiñohẽ pyndyrehe mbai kavikue hareka pyavapy.

Pablo ñymboihe Filemón

⁴ Filemón, Tũpape ameẽñoĩshu shy'ajetekue shymanduama ndyree airurema ãĩrã,

⁵ heshara mbe'uashe nde ryhaihu Ñandeja Jesúsperã hareka hai rirojaherã, hareka rĩñanduheva jyhaihu opaite Tũpa henta'ĩrũ reta jyve.

⁶ Jyroja katuhe Ñandeja, ore rãĩmi. Hãme rãnga airure Tũpa rirojañoĩhe verã opa mbai haikaviva rikuaapeve jajapo verã Cristo jahaihurã.

⁷ Avya ãĩ hareka shymykyrẽỹ jyhaihu ĩmeryreva, shara nde shyryvy pyape rỹmykyrẽỹjyshu reta Tũpa ryhevare.

Pablo jurureshu pente mbai Onésimo pevarã

⁸ Hãmeara, ajema Cristo heepe ĩmete are hainderã rijapo verã,

⁹ aipotaĩ airure nde jyhaihukue heepe. She, Pablo, akuakuama hareka ã'ẽ shymbyperesohavape ãĩme'ãĩ Cristo Jesús rehe,

¹⁰ airure'asy nde shyray Onésimo pevarã, shara she ambeushu ñeẽ kavi shymbyperesohavape.

¹¹ Ĩrũ arapeara nde pevarã Onésimo hai jokueharea mbaimba katu japova, tẽvã ã'ẽ haikavima jajokue nde pevarã hareka she pevarã.

¹² Hãme rãnga ã'ẽ hykuaĩ amondojy nde, hareka airure nde rỹmyvãhe kavishu verã she shymyvãhẽva rãĩmi.

¹³ Sheara aipotate pyta shendie kope, shymbory verã nyrẽndakuepe ãĩmeteri'ãĩ shymbyperesoavape Ñee kaviva rehe.

¹⁴ Tẽvã mba'eãteripo ajapo ndeiteri ambeundevape, nymymba'apokamba verã airurendeva.

¹⁵ Katuara Onésimo mbovy ara syry ndyhevikui, ã'ẽ haimima pyta nde verã.

¹⁶ Koñeĩ ã'ẽ haiveãma pente jokuehareireva rãĩmi ryre verã, ndyryvy ryhaihuva rãĩmimapo, haikavive kyrã. She ahaihu, tẽvã nde ryhaihuitevepo, ha'ẽã kuaretare rãĩmi rĩmoña hãndiva rãĩmipo Ñandeja rehe.

¹⁷ Ãñeteĩte rĩmoña hãndia rãĩmi shyre rirojakueperã, airure nde rỹmyvãhẽ verã shymyvãhẽva rãĩmi.

¹⁸ Ĩme porãmba japo ndyrerã, maĩrã maĩnunga jipiahenderã, ñonokui shyreepe.

¹⁹ She, Pablo ambypara kova shepope hareka parava: Shepo ambyhepykui. Ha'eã nde, ndei rỹmbyhepy she verã, shara opaite ĩmeryreva hareka ndeteiva rereverẽĩjy she.

²⁰ Shyryvy Filemón, japo she ko airure ndeva, tẽvã avy she hainderãmeĩ japo, koñeĩ Ñandeja ryhaihurã. Nde hareka she hai pente jahava: Meẽshe hokava kapyry ãĩ verã!

²¹ Ambypara nde heshara aroja katu ñee rỹhendurã, hareka aikuaa rijapove verã she airure ndeva.

²² Haivi airurejy nde, apyta verãpe rỹmyhẽva she verã, heshara pee pirureheva ãhãrõ ãĩ, Tũpa meẽpope aha apyryresha verã.

Marãndu japyhea

²³ Epafras, shi'ĩrũ shymbyperesoavape'ãĩ hãndia Jesucristo rehe nymarãndu jyve.

²⁴ Hareka jyve Markos, Aristarko, Demas hãndi Lucas shymbory'iare mba'apope.

²⁵ Ñandeja Jesucristo jyhaihukue toĩñoĩ pyndykovepe. Amén.