Efesios 5 - NandevaBiblia

Marãrapo iko Tũpa tayre

¹ Pee haiva Tũpa tayre hai haihuiva, piñyhããpo piko Hai ikova rãĩmi.

² Piko jyhaihuvape Cristo ñandyraihuva rãĩmi. Cristo hykove meẽ ñandyrehe vekua, pente avisha ray jukahava rãĩmi hareka me'ẽãva Tũpape pishe katuva.

³ Pee rãnga hai tenta kyamba Tũpa ryheva, hãme rãnga avypo pijetahe kyrãrãĩ'ia ryheva, mbai kyavaremba, maĩrã maĩnungare heta ĩmepyre verã, shara kova ha'ẽã hai Tũpa ryheva kyambarepeva.

⁴ Avy pere mbai pyrỹmymarãva, mbai porãmbava, ñee porãmbava, jyrojavare ha'ẽã kyrã ijeta verã; hokava hendape pymeẽ pyndyvya Tũpape opa mbai meẽpevare.

⁵ Pikuaa kavipojy kova: Omendambape iko'ia maĩrã mbai kyava japo'ia, maĩrã kateỹva, haijy ta'ãngareii õmombai'ia; icheãpo Cristo hareka Tũpa ẽvãpe.

⁶ Avy mbava pynymbytavy ñeereivape, kova mbai rehe rãnga verupo Tũpa ñunũpa pohyiteveva opaite ñee hendumbava ĩãrẽ.

⁷ Avypo piko jyve handi haire mbai porãmba japovape.

⁸ Pee rãnga pikopi pyntuape arykai, tẽvã ã'ẽ pikoma Ñandeja jysapekape; hĩmbipevapepo piko, tyrayre hendyape'ia rãĩmipo piko.

⁹ Hoka sapevaivi rãnga õhẽ mbai haikaviva, heko kaviva hareka añeteva.

¹⁰ Piñyhãã pikuaa mbaivarapo mbyvyashu Tũpa.

¹¹ Avy pijapo Tũpare jyrojambare japova mbaimba vekua, pyntuape iko'ia reta rãĩmi, katynga pymbykuaakapo javyape.

¹² Shara ñanoti ñambeu mbai haire ñemiapẽĩ japova;

¹³ sapeva hẽndyrã, opa mbai heshaha hareka kuaaha, hãrã kuaaha marãra.

¹⁴ Hokava rehe rãnga he'iha: Sareko nde recherẽĩva. Pũã manovare pãũvi hãrã Cristo sapepo ndyrehe.

¹⁵ Hãrã, pymaĩ kavi marãra jyre, avy piko mbaimba pya mbijetaheare rãĩmi, piko jyve mbai kuaakue tynyhẽ'ia rãĩmi.

¹⁶ Pipory kuaapo ara pimepẽĩvape, shara porãã ara ouva.

¹⁷ Avy piko pya mbijetambare rãĩmi kuambaa mbaivara iko, pikuaapo jyve mbaivara Ñandeja pota.

¹⁸ Avy piñymyngaupi vinopy, hokava rãnga pyrỹmbai, pynytynyhẽ jyve Espiritu Santo.

¹⁹ Pijeta ijupiirã pipory ñee ouva Salmovi, hareka heta mbyrahe Espiritu Santoivi ouva pyraheva tũpaope.

²⁰ Pymeẽshu opa arape pyndyvya, Tũpa, Ñandeja Jesucristo heepe.

Marãrapo tyreko hareka teme iko ijupii

²¹ Pijapo kavi pijehe Cristo jyhaihukue rupii.

²² Tyreko reta kyrẽỹpeñoĩpo japo ĩme ĩñee, Ñandejape japo'õva rãĩmi.

²³ Hãma teme reta hai tyrekore ñakã, Cristo hai ñakã tũpaore rãĩmi. Cristo rãnga jyve hoka tũpaore mondojepe verã, hokava tũpaore hai hete;

²⁴ hãrã kyrã tũpaore ẽẽ jyve haikavi japo verã Cristo ĩñee, kyrãĩ jyve tyreko opa tijapo ĩme ĩñee.

²⁵ Hoka temere tyhaihu kavi tyrekope, Cristo haihuva rãĩmi jyve tũpaore, hãrã hai meẽ manohe verãre.

²⁶ Hai mano japo ñandyhevi verã Hai pevarãĩ, johema hai ĩñee kavi rupii yype joheava rãĩmi.

²⁷ Cristo teivapo veru hãrã ñonopo hỹnonde pente tũpao verava hareka mashỹãva, opa hejava porãmba vekua, hareka pyrãtava hareka õĩheare heko kyamba verã, hekope kavi vata verã.

²⁸ Hãrã kyrã teme reta haihu kaviñoiposhu hyreko, haihuva rãĩmi jyve hete. Hyreko haihu kavishuva, hai ijupẽĩ jyhaihu jyve.

²⁹ Mba'ety rãnga hete haihumbava, myngaru hareka ñyngareko jyvehe, Cristo rãnga kyrã japo jyve hoka tũpaope õre,

³⁰ shara ñande hai jyve ñaĩva hetere, japoava ho'oivi hareka kãvẽivi.

³¹ Mbyparahavape heiva rãĩmi: “Kuimbai hejapo tuu hareka ishy hareka ñymypenteĩ hãndi verã hyreko, haivi mokue'õre ikoshi verã pentevaĩ hete”.

³² Mbai vasu tivishava ko kuaambava heiha ñande; hãrã shee hai pee tũpaore hareka Cristo.

³³ Tẽvã pee jyve, hykuaĩ haijype pepenteĩ haihu verã hyreko hai ijyhaihuva rãĩmi.