Efesios 4 - NandevaBiblia

Pente pyapeĩ Espiritu Santo rupii

¹ She Pablo, shymbyperesoava Ñandeja rehe, airurepe piko verã hekope kavi Tũpa potava rãĩmi, pee pynyrẽno vekua.

² Peñemomishĩgãtu, pijyhaihu hareka piñyharõ kavi hareka piñymbory katu jyhaihupe.

³ Piñyhãã katu piko pente pyapeĩ, hãrãpo poiãã pente ñeepe peĩ Espiritu meẽpeva,

⁴ pee hai pente tyreteĩ hareka pente Espirituĩ, pynyrẽnohava rãĩmi pente ñyhãrõpeĩ ohojepevape.

⁵ Penteĩ rãnga ẽẽ Ñandeja, jyrojakue hareka ñymyngaraiva,

⁶ penteĩ ẽẽ Tũpa, hareka opavare Tuu, ẽvã opava maĩnunga ĩãrẽ, mba'apova opavare rupii hareka opava retare.

⁷ Pepenteĩ meẽ ñande Cristo mbai jaikatujare verã, hai potava rãĩmi.

⁸ Kuatia mbyparahavape heiva rãĩmi: Jupijy vate arapyrã raha ijehe heta jokuaha vekua, hãrã kuareta retape meẽ mbaikaviva.

⁹ Mbaivara he'ise ko “jupijyva”? Hokava he'ise tynonde vejyva, yvy huvapeve.

¹⁰ Hoka vejy vekua rãnga ha'ẽĩjy jupijyva vate arapy, opa mynyhẽ verã hai ẽvãpe.

¹¹ Haiteiva ñonojy apostolre; yngavape Tũpa ĩñee mbeu'ia; yngavape Ñee kaviva mbeu verã, hareka yngavape ñyngareko pyryre verãre hareka pyrỹmboi'i verã,

¹² kyrã ñono kavi heko kyambare jokue verã, mupuã verãre Cristo hete,

¹³ japity peve opaite pente jyrojavapeĩ ñaĩ verã hareka Tũpa Ray ñy'arãndukuepy, pente kuimbai heko kaviva, Cristo tynyhẽva jyvajekuepy.

¹⁴ Jaikoveãma verã sanjay rãĩmi pya mokuepe, kokoty ñandyraha yvyture ñee pyrỹmbo'eaheva py'ahuva ñanymbytavypeve kuareta japuva ikova tyrape javyape ñandyrahavape, ñahendushi verã mbai tykove mbai kuava japu ryheve pyrỹmboi'iva, pyrỹmbytavy hareka pyryraha verã pee javy verãĩpi.

¹⁵ Haikavive rãnga jaiko jyhaihupe, hareka añeteva haykue, jyvache ñapuã verã hekope kavi Cristo hãndi. Haiteiva rãnga tũpao ñaka.

¹⁶ Ko tũpao rãnga ẽẽ kavi hareka ñimbivapy ijehe hãrã pepetẽĩ tyrete ryheva japo kavi maĩnungarã, jyvache puã hareka puã kavi jyhaihupe.

Tykove py'ahu Cristo rupii

¹⁷ Kova she haipeva, hareka airurepeva Ñandeja heepe: Pikovẽãma verã Tũpa kuambavare rãĩmi, mbaimba vekuareĩ pya mbijeta'ivare,

¹⁸ hareka ñaka opa pyntushiva. Haire mba'etyre ko tykove ouva Tũpaivi, mba'ẽã kuaa retarã hareka pya tãtãivi.

¹⁹ Hama ñynotiveama ñymeẽ tykove porãmbape, japo verã opa maĩnunga kyaava pota japoivĩ.

²⁰ Tẽvã kova ha'eã Cristo pynymboiheva.

²¹ Pee rãnga pyhendushi, hareka pirojaherã rehe pynymbo'eha kavihe vekua, haiva Jesús ryheva añeteva.

²² Hãrã, pijyheja pyndyreko arykaiva ryhevaivi, hareka ỹnteño piko arykaiva rãĩmi. Kyrã pikopirã rãnga opa piñymbai, pyma'ẽĩhe mbai porãmba pynymbytavy'irã.

²³ Pee rãnga piñymbypy'ahupo pyndyrykovepy hareka pyndypyape,

²⁴ hãrã pymondepo tykove py'ahu, Tũpa japo vekua hekope kavi. Hokava heshahapo pyndyrehe, pyndyreko katu kaviape hareka kyambape, hãndi añetevape pikorã.

²⁵ Hãma ỹnteñoma piko jipive japupe, pere pepetẽĩ hoka ñee añeteva papisha retape, shara opaite ñande ha'ĩ jyve pente tyrete ryheva.

²⁶ Pee pyndyposhyrã, avy mbai porãmba pijapo; hareka avy tiche jepe pyndyhevi kuarasy, pypoi pyndyposhy verã.

²⁷ Avy pymeẽshu Ãña ẽẽ verã pyndyrykovepe.

²⁸ Hoka manarõ'i vekua, ỹnteño tymanarõ hãma tiñiñono tymba'apo, tijapo maĩnunga kavi ipo rupii ĩmere meẽ verã jyve pavete'ia retape.

²⁹ Avy tõhẽ ñee kyava pindijuruivi, pere jyve ñee haikaviva henduvare mykỹrẽ'ỹ hareka mbypya kavi verã.

³⁰ Avy pymbyvy'ãpi Tũpa Espiritu Santo, shara Espiritu hãĩ jyve ñanymyhã'ãngapya heshakava ñande hai Tũpa ryhevarã, opava retape me'ẽha jahajepe verã.

³¹ Pyheja opa marãrãgãture pya porãmba, pyaposhy, sapukerei hareka ñee poporãmbavare hareka opaite mbai porãmba vekua.

³² Pyndypya kavi pindijupive, hãndi pijypareko hareka pyhejarei ijuhuvi mbai porãmba pijapo vekua, Tũpa hejareii pyndyheviva rãĩmi Cristo rupii.