Efesios 3 - NandevaBiblia

Pablo ñimiñeepy ñee kaviva Judiomba retape

¹ She, Pablo, shymbyperesoava Jesucristo aijokueka'aishurã, pyndyrehe judiombavare.

² Shara katu pyhendutẽvã Tũpa meẽsheva ajapo verã, jyhaihukue rupii amba'apo verã pynypãũpe.

³ Tũpa kuaakashe maĩnunga hai ñomireva, katy ambyparamape mishiĩ.

⁴ Pimbijetama peĩrã, pikuapo pymondo aikuaava hoka Cristo ryheva kuaahamba.

⁵ Hoka kuaahakambava aryka'evare jy'arape, ã'ẽ Tũpa heshaka jy'apostol hareka Tũpa ĩñee mbeu'ia heko kyambare Espiritu hai ryheva rupii.

⁶ Hãrã kuaahamba vekua hai kova: Jesucristo Ñee Kaviva rupii haimba Judiore myvahe verã jyve pyrỹmondojepeva, hareka ĩñee meẽva tenta Israelva retape, hareka pente tentaĩ iko hãndi verã Israel.

⁷ She, Pablo, Tũpa japo shyhevi shokuerã ambeu verã ĩñee kavi jyhaihukue hareka ñymbaikatu rupii.

⁸ She, shimishĩveva opaite heko kyamba retaivi, tẽvã Hai meẽshe, jyhaihukue rupii, ambeu verã Ñee kaviva haimbaa Judio retape hareka jahe mbai haikaviva Cristo ryheva,

⁹ meẽjyshe opaite apyrỹmbykuaaka verã opa rupi kova Tũpa, opava japova, arykaivaĩ ñomireva opa ara.

¹⁰ Kyrã, tũpaope ẽvã reta rupii, Tũpa jokuevare hareka Espiritu ñymbaikatuva yvyture iare kuaapo Tũpa opa kuaava.

¹¹ Kova rãnga hai Tũpa arykaivaĩ pota japorea hãrã my'ãñete Ñandeja Jesucristo rupii.

¹² Ñameẽshu ñandyvya Cristo, shara jairojaherã, jareko pyrãtãkue jahahe verã Tũpa jakyjembape.

¹³ Hãme rãnga she airure pee, avy piñymykangy verã ko she ahasa'asy ãĩ pyndyreheva rehe, kova rãnga hai mbai tivishaveva pee pevarã jyve.

Pablo jurure Éfesope'õre hykovere

¹⁴ Kovare, she aiñesu Ñandeja Jesucristo hỹnonde,

¹⁵ opa mbai ẽvã japo vekua, arare hareka yvy'ĩãrẽ,

¹⁶ airure Sherupe, tymeẽpe ña'ãpova mashyãva, tymeẽpe mbaikatu hareka pyndypyape pyrãtakue jy Espiritu rupii,

¹⁷ hareka Cristo iko verã pyndypyape jyrojakue rupii, hareka tantagãtu peĩ verã jyhaihupe Tũpare hareka opaite yngavare,

¹⁸ Hãmerãpo pikua handikui opaite tenta kyamba Tũpa ryhevare, Cristo jyhaihukue, pukukue, tivishakue, vatekue hãndi kypekue,

¹⁹ airure Tũpape pikuaa verã hokava jyhaihu, tivishaveva jaikuaa verã, heta pyheky verã opaite Tũpa ĩmereva meẽpe verã.

²⁰ Hãrã ã'ẽ, toñemombai vasu Tũpa ñymbaikatuva japo verã hetaiteve hoka ñande jairureva maĩrã ñaĩmoãtẽva, hareka ñymbaikatukue rupii heta japo mbai kavi ñandypy.

²¹ Opaite tũpao Cristo ryhevare ñaĩva ñamombaiñoĩshupe. Amén.