Colosenses 4 - NandevaBiblia

¹ Pee ĩmepyreva pijokuepyrevare, pijapohe reta hekope kavi'õ hareka pyreko kavishu reta. Pymanduapo jyvehe ĩmepyreva jyve Pyndeja vate arapy'õ.

Arakuaa opa mba'e ryheva

² Pirure katu, pimoã ryheve hareka pymeẽ pyndy'ajetekue Tũpape.

³ Pirurejyve yryrehe, Tũpa tiñono'ore mbe'uha verã ko ñee hareka mbykuaahaka kavi verã Cristo ña'ãpoa ñemiape'õ, hai rehe shymbyperesoha.

⁴ Pirure jyve shyrehe ambeu kavi verã kova ñee, aikuaaka kavi verã marãrapo ajapo.

⁵ Ãrãndupe piko hãndi Cristo jyrojambaterihevare, pipory kavi hoka ara pijetashu verãre.

⁶ Pijeta kaviñoĩpo hareka pyrymbyhorypo, pikuaa kavi verã marãrapo pymbyhovaishu reta.

Ñymarãndu opahea

⁷ Ñandyryvy jahaihuva Tíquico, hekope kavi jokueharea hareka pyrỹmboryñoĩva Ñandeja rehe, opapo mbeupekui marãra aiko.

⁸ Ha'erã ãmondo pẽĩvape, mbeupe verã marãra ĩmehã'ẽ hareka pynymykyrẽy verã.

⁹ Oho jyve hãndi Onésimo ñandyryvy jahaihuva, hareka hai pyndyryheva jyve; hai retapo opa mbeupekui mbaivara iko koipi.

¹⁰ Aristarco, shymbyperesoa hãndiva, pynymymarãndu; Marcos hai Bernabé tyvy. Ãmbeumape marãrapopyre Marcos, hãme rãnga oho pẽĩvaperã pymyvãhẽ kavishukui.

¹¹ Pynymymarãndu jyve Jesús, Heko Kaviva he'iashua. Kova mbahapy'õ retaĩñoĩte rãnga jyroja israelitare mbyteivi mba'apo shendie Tũpa ẽvãpe'õ ryheva pevarã, hãrã haire heta shymykyrẽỹ.

¹² Pynymarãndu jyve Epafras, Cristo jokueva, hai rãnga jyve pente pyndyryheva. Hai heta õñehãã jurure'i pyndyreherã, tãntangãtu pẽĩ verã, porãmba pijapombape hareka opa kavi pijapo verã Tũpa potava.

¹³ She ahesha marãra Epafras heta ojepy'apy pyndyrehe, handi tenta Laodicea hareka Hierapolispe'õre.

¹⁴ Pyrỹpỹhãno'ia haihuhava Lucas, pynymarãndu, hareka jyve Demas.

¹⁵ Pymymarãndu ñandyryvyre ĩme'õ Laodiceape. Pymarãndu jyveshu ñanĩĩndy Ninfa, hareka Cristo ryhevare hai hentape ñymbaty hãndivare.

¹⁶ Kova kuatia mbyparahava mbijetahama'ẽ pymbyteperã, pyrahaka mbijetahashu verã jyve Laodiceape'õre tũpaope; hareka pimbijeta jyve hoka kuatia ajaposhu vekuare.

¹⁷ Kyrã pere jyveshu Arquipo: “Eñehãã opa kavi japo Ñandeja meẽ nde vekua rijapo verã”.

¹⁸ She Pablo, shepopetei ambyparape kova marãndu. Pymandua shyrehe shymbyperesoavape. Tũpa tiñono pearẽ jyhaihukue. Amén.