Apocalipsis 9 - NandevaBiblia

Trompeta 5 hea

¹ Tũpa jokueva 5 hea mbi'ipu trompeta, hareka ahesha pente jasytata vate araivi oava yvy'ĩãrẽ, hareka me'ẽãshu vekua yvykua vasu kypeva hõche pe'aka.

² Peama yvykua vasu kypeva hõcherã, õhe tatãti tatakuavasu rãĩmi, hareka tatãti opa mypyntu kuarasy hareka kũvaĩpi.

³ Tatãtivi õhẽ tuku hetava yvy'ĩãrẽ me'ẽhashu reta mbaikatu pyrõpi verã vãkyrãpe rãĩmi hasykue pyrỹmbypyrarava.

⁴ Hãrã ijetashu reta avy porãmba japohe verãre yvyraroky yvy'ĩãrẽ'õre, yvyra retaimba, koñeĩ kuaretare Tũpa ha'ãnga mba'etyreva syvare.

⁵ Tẽvã ñonohããshu juka verã kuareta, koñymaĩ hasykue pyrỹmbypyrara verã pandepo jasykavi; hareka pente vakyrãpe kuaretape ñopirã hasykue pyrỹmbypyrarava rãĩmi.

⁶ Hãrã hokava ara retape kuaretare hekapo ñymano katynga vãhẽãposhu; hareka kyrẽ'ỹtẽpo mano, tẽvã ñymano ohoposhi reta.

⁷ Hãrã hokava tukure ova kavajure myhẽvãha'õ ñyrãrõ pevarã, ñakãre ĩmere reta tankare ñonoava ita vera ijuva rãĩmiva, hareka hovare kuareta hovare rãĩmi.

⁸ Ñaka haare ova taupe ñakã haa, hãĩre ñavapỹta rãĩmi.

⁹ Hetere ĩmerejy ijochakapyare ñyrãrõãpya hiero rãĩmiva, hypepore hy'apujy kareta hetava kavaju mbytyryryva ichema ñyrãrõva rãĩmi.

¹⁰ Huvere ĩmere pente pũ'ũcha vãkyrãpe rãĩmi; hareka mbyhasy verã kuaretare 5 jasykavi.

¹¹ Tukure ĩmere juhuvisha vasu, Ãña jokuerea yvykua vasu kypevape'õ, hebreo ĩñeepe mbyheava Abadón, hareka griegope Apolión he'iseva “pyrỹmbai'iva”.

¹² Jyhasa'asy vasu tynondeva hasama, tẽvã ouvepojy mokue jyhasa'asy vasu.

¹³ Tũpa jokueva 6 hea mbi'ipujy trompetarã, ahendu pente ñee ouva urũndy hahakua'õ altar ita vera ijuva, ẽvã Tũpa hỹnonde.

¹⁴ Ñee heishu Tũpa jokueva 6 hea, trompeta ĩmereva: “Poishi urũndy Tũpa jokuevare ñapintĩhã'õre yyvasu Éufrates hymbeyipi”.

¹⁵ Hãrã poiashi urũndy'õ Tũpa jokuevare, juka verã mbahapy hendape'õ kuareta, myhẽvãha vekuare hokava ora, ara, jasy hareka ãño pevarã.

¹⁶ Ahendujy syndarore kavajure'iare, ẽvã 200 millones.

¹⁷ Kyrã ahesha shypaihupe'õ rãĩmi, kavaju oporeheare pitiarere ijochakapya hiero pyntava, hovyva, ijuva, hãrã kavaju ñakare mainy java, hareka juruivi mohẽ tata, tatãti hareka asufre.

¹⁸ Mbahapy hendape'õ kuaretare opa juka kova mbahapy mbairasy porãmba õhẽva kavaju juruivi: Tata, tatãti hareka asufre.

¹⁹ Shara kavajure ñymbaikatukue ẽẽshu jurupe hareka huvepe, huve ova mboi hareka ñakare opa pyrỹmbypepere verã.

²⁰ Kuaretare hembyva, mbairasy porãmba vekuaivi manombare, hejãã reta mbai porãmba japo vekuare, poimbaa omombaiva ãñare, hareka ta'ãngare japoava ita vera ijuvaivi, ita vera tĩĩvaivi, bronceivi, hareka yvyrava, katumba heshava kũvãipi hareka henduĩmba hareka vataĩmba.

²¹ Hokava kuaretare Tũpa jykoty potãã oujy hareka poiã puruka reta, hejãã pajekue, hareka manarõveãma verã, poiã kyrãrãĩ jyre.