Apocalipsis 8 - NandevaBiblia

Sello 7 hea

¹ Avisha Ray peamajy sello 7 hea kuatia mbapu'ahavaivirã, opaite vate arape ajete pente ora mbyteipi shãũ reta.

² Haivi aheshajy 7 õ Tũpa jokuevare ñymbou ñynoĩvare Tũpa hỹnonde, hareka me'ẽãshu reta 7 trompeta.

³ Haivi oujy ĩrũ Tũpa jokueva ñymbo'y altar hỹnonde, pente mbai pishekatuva hyru ita vera ijuva ryheve, me'ẽajyshu mbai pishekatuva hetava meẽ hãndi verã Tũpa ryhevare jurureva, altar ita vera ijuva ĩãrẽ vapyhasepya hỹnonde.

⁴ Haivi mbai pishekatuva hãtãtĩkue jupi Tũpa jokueva ipoivi, kyambare jurureva ryheve vãhẽpeve Tũpa ẽvãpe.

⁵ Haivi Tũpa jokueva heky mbai pishekatuva hyru, mynyhẽ tatapyĩ jypotateri'õ altar ĩãrẽ'õva, hareka mombo yvy'ĩãrẽ, hãrã iko hy'apuvasu, hãseva, verava hareka yvyryry.

⁶ Hãrã 7 õ Tũpa jokuevare 7 trompeta ĩmereare opa ñymyhẽva reta mbi'ipu verãre.

Urũndy trompeta tynonde'õ

⁷ Tũpa jokueva tynonde'õ mbi'ipu trompetarã, oa amanda hareka tata turuvy jihiava. Hãrã opa oke yvy mbahapy hendape, hãndi jyve mbahapy henda yvyrare hareka opaite kapii hovy'ova.

⁸ Hãma Tũpa jokueva mokuehea mbi'ipu trompetarã, oa pente mbai hendyva yyvasupe, marẽy yvyturusu rãĩmiva, hãrã yyvasu mbahapy henda'õ opa ikoshi tuvy,

⁹ hareka japoha vekuare mbahapy henda'õ yyvasupy ikovare opa mano hareka mbahapy henda'õ varkore opa mambaiha.

¹⁰ Tũpa jokueva mbahapyhea mbi'ipu trompetarã, pente jasytata marẽyva oa ara vateivi, tata hendyva rãĩmi, oa ĩãrẽ mbahapy henda'õ yy syryvare hareka yy õhẽ'õre ĩãrẽ.

¹¹ Jasytata mbyheeha “irova” hareka mbahapy henda'õ yyre opa'iro, hai rehe heta kuareta opa mano.

¹² Tũpa jokueva urũndyhea mbi'ipu trompetarã, mbahapy hẽndahea kuarasy, jasy hareka jasytatare opa mambaiha. Hokava rehe mbahapy henda'õ hairetaivi hẽndyveã, hãrã sapeveã mbahapy henda arakuepe hareka pyharekue.

¹³ Haivi ahesha pente vyrachevasu veve'ia ara mbytere, ahendu hỹnatu hei'i: Tenga, tenga, tengapokui! yvy'ĩãrẽ ikovare, mbahapy Tũpa jokuevare mbi'ipuma ñytrompeta retarã.