Apocalipsis 5 - NandevaBiblia

¹ Vapyhaseape vapy'õ ipo jakata kyty ahesha pente kuatia opa mbapu'ahava, ĩmerea ñee hapype hareka ĩãrẽ hyvavaisho ryheve hareka mbotyha 7 sellope.

² Haivi aheshajy pente Tũpa jokueva pyrãtaĩteveva hỹnatu ijeta pyrãnduva: “Mbavara ẽẽshu pea verã kova kuatia hareka jorashi verã 7 sello ñonoãheva?”

³ Tẽvã mba'ety vate arare'õ maĩrã yvy'ipe'õ, katu peava kuatia mbapu'ahava maĩrã maĩhe verã ẽẽpya.

⁴ Hãrã heta ajaheo, shara mba'ety ẽẽshuva pea verã kuatia mbapu'ahava ma'ẽĩtepy verã.

⁵ Haipe kuakuavare penteva heishe: “Avy jahe'o, maĩkavi Java Juda ñymoñashia, mburuvishavasu David ñymoñashi vekua, hai õhẽkavi ñyrãrõivi, kova kuatia pea verã hareka jora verã 7 sellore”.

⁶ Haivi ahesha vapyhaseape, urũndy ĩmeĩteri'iare hareka karai kuakuavare mbytepe, ñymbo'y'ẽ pente Avisha Ray jukahava rãĩmi vekua 7 ijuu ĩmere hareka 7 hesa, hareka hesare hai 7 Tũpa ijespiritu mondoha vekua oparupi yvy'ĩãrẽ.

⁷ Haivi Avisha Ray ou, hãrã heky kuatia mbapu'ahava vapyhasepyape vapy'õ ipo jakataivi.

⁸ Hekyma kuatiarã, urũndy hykoveteri'iare hareka 24 kuakuavare ĩñesu Avisha Ray hỹnonde, pepenteĩ ipopere arpa hareka vaso ita vera ijuva tynyhẽ'õ mbai pishekatuva, hokava he'ise Tũpa ryhevare jurureva.

⁹ Hãrã jyvache pyrahe reta pente mbyrahe py'ahuva heiva: “Ndeñõi rãngapo katu rypysy ko kuatia mbapu'ahava hareka ryhekyshi verã sellore, ndukahava rehe, hãrã nduruvype yry'ovajy Tũpa pevarã, opaite kuaretare ñymoñashia, opaite tiñeere, henta'õre hareka tentavasure.

¹⁰ Hareka Tũpa pevarã rijapo yryhevi mburuvisha vasu hareka paire, huvisha vasurãre iko yryhevi verã ko yvy'ĩãrẽ”.

¹¹ Haivi ahendu Tũpa jokuevare ĩñee hetava vapyhasepya juri, hykove'ia reta hareka kuakuavare,

¹² hỹnatu sapukerã hei reta: “Avisha Ray jukaha vekua ẽẽshu pysyma verã mbaikatu hareka ikokatukue, ãrãndu hareka pyrãtakue, mbyveteha verã, õmomba'eha verã hareka pyraheashu verã”.

¹³ Haivi ahendu opaite japoha vekuare vate arapy, yvy'ĩãrẽ, yvy'ipe hareka yyvasu'ipe hareka ẽẽpyare heirã: Vapyhapyape vapy'õ hareka Avisha Ray pyraheashu, typyraheashu, tomomba'eha hareka mbaikatukuepe, opa arape.

¹⁴ Haipe urũndy hykove'iare hei reta: Kyrãpokui! Haivi 24 kuakuavare ĩñesu hareka omombai reta.