Apocalipsis 4 - NandevaBiblia

¹ Haivima amaĩjy vate araperã ahesha pente õche jypeava. Hãrã ñee tynondeite ahendu vekua trompeta rãĩmiva, heishe: Jupi kope ambishakaponde iko verã.

² Haipevaĩ ahesha Espiritu Santo rupii pente vapyhasepya vate arapy, hokavape ĩme'ẽ vapy'õ.

³ Hãma vapyhapyape vapy'õ ova pente ita verava sãkava hovyããveva pyntahũva. Vapyhaseapy jerehe jyi hĩmbipeva pente esmeralda rãĩmiva.

⁴ Hãrã vapyhasepya jerevejyhe 24 vapyhasepya hareka hokavape vapyñynoĩ 24 kuakuavare tĩĩvapy ñymondeare tankare ñonoava ita vera ijuva ñaka retare.

⁵ Hãrã vapyhasepyaivi õhẽ hy'apu verasevea, vapyhasepya hỹnonde 7 tataĩndy hendyva sape, hokava reta hai 7 Tũpa ijespiriture.

⁶ Hãrã vapyhasepya hỹnonde ẽẽjy pente yyvasu mbai sãka jykuapyva rãĩmi. Vapyhasepya mbytepe hareka jerehapya, ẽẽ urũndy hykove'iare tyresare ĩmerea hetere hỹnonde hareka haykue.

⁷ Tynonde'õ ova java, mokuehea ovajy toro, mbahapyhea kuimbai hova rãĩmi, urũndyhea katy ova pente vyrachevasu veve ohova.

⁸ Kova urũndy hykove'iare 6 kavi hypepo reta pepenteĩ, hesare oparupi ẽẽshu, opa ara hareka pyhare pyraherã hei: Santo, santo, santo, hai Teja Tũpa ñymbai katuva, hai hykoveñoĩ'ia, hykoveva hareka oujy verã.

⁹ Hãma urũndy hykove'iare mbyveteshu, omombaishu hareka jyvy'akue meẽshu vapyhaseape vapy'õ, opa ara hykovejy verãpe,

¹⁰ hokava 24 kuakuavare ĩñesu Tũpa hỹnonde hareka omombai reta opa ara hykovevape, tankare ñonoava mombo reta vapyhasepya hỹnonderã, hei:

¹¹ “Yreja hareka Yreru, ndeñõi ẽẽ nde nemomba'ea verã, he'ia ndyrehe haikaviteva hareka ñymbai katuiteva; shara nde opa rijapo opa maĩnungare, nde ripotava rupii iko hareka japoha reta”.