Apocalipsis 22 - NandevaBiblia

¹ Haivi Tũpa jokueva shymbyheshakajy yy syryrã meẽva tykove. Hoka yy syryva õhẽ Tũpa vapypya õĩvi hareka Avisha Ray, vidrio sãkapya rãĩmi;

² hokava yy hasa tape tenta mbyte'ẽvaipitei. Yy jajapy kyty ẽẽshu yvyrare pente jasyvapeñoĩ iava, jaishu 12 iava pente ãñope. I'akue meẽ tykove opambaa, hareka hokykue poryha mynguera verã opaite tenta vasure.

³ Hoka tentape mba'etymapo jypejuva. Haipepo'ẽkui Tũpa vapypya hareka Avisha Ray, Tũpareĩ jyroja'iare mbyvetepokui.

⁴ Hareka Tũpa hova opaitevapo hesha, heere syvarepo mbyparaha.

⁵ Haipe mba'etypo pỹntu, mba'etypojy ikotẽvẽhea sapeapya myhendy verã hareka kuarasy, shara Tũpa Teja haipokui jysapekare, hareka hairetapo huvisha vasurã'ẽkui opa ara pevarã.

Cristo oujy verãpe mbyryveãma'ẽ

⁶ Tũpa jokueva heishe: “Kova ñee hai añetevare hareka katu jairojaheva. Teja rãnga hai meẽ vekua Espiritu Tũpa ĩñee mbeu'ia retape, mbou hai jokueva mbyheshaka verã jokuerea retape ikoserimava”.

⁷ Pyhendu! “Aijyserima! Vy'apo henduva hareka japova ñee iko verã mbyparahava ko kuatiape”.

⁸ She, Juan ahesha hareka ahendu opaite kova mbai. Hãme ahesha hareka ãhẽndumarã, ãiñesu Tũpa jokueva hỹnonde amombaishu verã opaite shymbyheshakava rehe.

⁹ Tẽvã hai heishe: “Avy japo hoka! Emombai Tũpa shara she hai jokuearea nde rãĩmiva, hareka ndyryvy Tũpa ĩñee mbeu'iare, hareka opaite Tũpa ĩñee kova kuatiape'õ hendu hareka japovare”.

¹⁰ Heive jyshe: “Avy ñomi ko ñee iko verã kuatiape'õ, shara kova mbai arẽãpo ikokui.

¹¹ Ma'ẽĩhe heko kavimba tijapoĩti hekopemba'õ; hareka ñakape mbai kya ĩmerea, tijapoĩti mbai kyava. Mbaikavivaĩ japo'ia, ma'ẽĩhe tijapoĩti; hareka heko kyamba, tijapoĩti mbai heko kyamba”.

¹² Jesús heijy: “Pingareko! Aijyserima! arupokui me'ẽãreiva pepenteĩ kuaretape ameẽ verã, haire japoa hepykue jururea rãĩmi.

¹³ She hai tynondeva hareka japyhea, oñepyrohea hareka opahea”.

¹⁴ Vy'apo mondeva joheñoĩvare, shara hipitypo yvyra'ia tykove opamba meẽva, hareka iche verã tenta hõcheipi.

¹⁵ Katoapepo pyta hai heko porãmbare, pajevare, kyrãrãĩ'iare, purukavare, tarã'ãngakuerei omombai'iare, hareka opaite vyava mba'ety vekua mbeu'irã.

¹⁶ Jesús hei: “Amondo ajokueva, kova mbai tũpao retaipi hei verã. She rãnga huvisha vasu David ñymoñashi vekua; She hai jasytata kõĩ'ourã sapeva”.

¹⁷ Espiritu Tũpa ryheva hareka Avisha Ray hei: “Ei, Sheja Jesús!” Hareka opaite jasaka'õre tei jyve reta: “Ei Sheja Jesús!” Opaite ju'uheva, tou reta. Hareka pota houva, mbaimba mbyhevapepo hou yy meẽva tykove.

¹⁸ Opaite henduva ñee iko verã kuatiape'ẽva, haiposhu reta: Ĩme'ẽ ko kuatiape'õ ĩãrẽve ñonovarã, Tũpa mboupo ĩãrẽkui mbairasy porãmba ko kuatia mbyparavape heiva.

¹⁹ Ĩme'ẽ ñee iko verã ko kuatiape'õ hekyshiãrã, Tũpa hekyposhikui tykove ryheva kuatia'ẽvaivi, hareka ma'ẽĩapohe icheve tenta kyambape, heiva rãĩmi kova mbyparahavape.

²⁰ Kova ñee mbeu'iva hei: “Añeteĩte rãnga aijyserima”. Amén! Ei Sheja Jesús!

²¹ Teja Jesús jyhaihukue tõĩ pyndyrehekui opa ara.