Apocalipsis 21 - NandevaBiblia

Ara vate'õ py'ahuva hareka yvy py'ahuva

¹ Hãme ahesha pente ara vate'õ py'ahuva hareka yvy py'ahuva, shara ara vate'õ hareka yvy tynonde ẽvãre mba'etyma, kyrãĩjy yyvasure.

² Hareka aheshajy tenta kyamba, Jerusalen py'ahuva, vate araivi vejyva, Tũpa ẽvãivi, myhẽvãhava tyrekorã ñymymashiãva, temerã vãhẽma ourã pevarã.

³ Ahendu vapyhasepyaivi õhẽ pente hỹnatu heiva: “Kope ĩme'ẽ Tũpa ñytavernáculo kuaretare mbytepe ẽva. Ikopo hãndi reta, hai retapo henta'ĩrũre hareka Tũpateipo ẽẽ hãndi retakui Ñu Tũparã.

⁴ Tũpa opapo joheshi sayre, ẽẽveãmapo ñymano, mbairãmba hykũaĩ ñymbairasyjy verã, maĩrã jaheojy, hareka mbai hasyvamba ñandujy verã, shara arykai'ẽ vekua mba'etyma”.

⁵ Tũpa hei vapy'ẽvaivive: “Opa mbaire ajapo py'ahujy!” Hãrã heijy: “Mbypara, shara kova ñee añeteva ryheva hareka katu jarojava”.

⁶ Heijyshe: “Opama iko! She hai õñepyrõhea hareka opahea. Ju'uhe'ia, ameẽreiiposhu ñymbyupy verã yy õhẽ'õ tykove meẽva.

⁷ Opaite poporãmba vekuaivi õhẽkaviva opa mbaipo me'ẽãshukui, hãrã sheepo haikui Ñu Tũpa, hareka haipo shyray.

⁸ Tẽvã kyjekatuva hareka jyrojambaa, heko kyava hareka pirijuka'iva, kyrãrãĩ'ia hareka pajeva, tarã'ãngape omombai'ia hareka opaite japuvare, haire mombohapo tata vasu hareka asufre ẽvãpe, hokava hai ñymano mokuehea”.

Jerusalén py'ahuva

⁹ Haivi ou penteva 7 Tũpa jokuevare 7 copa ĩmereva tynyhe'õ koñemahe verã mbairasy porãmba, hareka heishe: “Ei kope; ãrỹmbyheshakapo tyrekorã, Avisha Ray hyrekorãpokui”.

¹⁰ Hãrã Tũpa Espiritupe ahesha shyresape ouva, Tũpa jokueva shyrahajy pente yvyturusu vate'õpe, shymbyheshaka verã tenta tivishava kyamba Jerusalén, vate araivi vejyva, Tũpa ẽvãivi.

¹¹ Tũpa hĩmbipekue opa mykõĩ, hareka sapekue maĩnypi pente ita mashyã verava, ita jaspe rãĩmi, vidrio sãkapya rãĩmi.

¹² Katoakyty opa jerehe mangorahapya tivishava hareka vate'õ, ĩmerejy 12 õche tivishava; pepenteĩ õchepe ñyngareko'ẽ pente Tũpa jokueva, õche tivishavare mbyparahajy tyree 12 Israel ñymoñashiare hee.

¹³ Mbahapy õche ẽẽ kuarasy õhẽa kyty, mbahapy yvytu kyty, mbahapy rovai kyty, mbahapy kuarasy ichea kyty.

¹⁴ Tenta mangorahapya ĩmere 12 jypyre hareka ĩãrẽ ẽẽ 12 tyreere 12 Avisha Ray jy'apostolre hee.

¹⁵ Tũpa jokueva aijeta ai handiva ĩmere pente mbai myhã'angapya ita vera ijuva, hãrã hoka mbai myhã'angapyape myhã'ãnga tenta hõchere tivishava hareka mangorahapya.

¹⁶ Tenta jichere urũndy'õ opaĩ jyvache. Tũpa jokueva myhã'ãnga mbai myhã'angaheape ita vera ijuvaivi, myhã'ãngaherã'õhe 2.200 kilómetro, pukukue, vatekue, hareka ipekue.

¹⁷ Tũpa jokueva myhã'ãngajy ñymangorahapya, hãrã 65 metrore, ñande kuareta ñamyhã'ãngava rãĩmi, Tũpa jokueva myhã'anga'õ rãĩmi.

¹⁸ Ñymangorahapya japoha ita jaspe he'iashuaivi, hareka tenta ita verava iju vekuatei, hainy vidriokue sãkapyva.

¹⁹ Hãrã mangorahapya jypyre ita yngangaivape mymashy'ãva; tynonde'õ jaspeivi, mokuehea zafiroivi; mbahapyhea agataivi, urũndyhea esmeraldaivi;

²⁰ pandepohea oniceivi; 6 hea rubiivi; 7 hea crisolitoivi; 8 hea beriloivi; 9 hea topacioivi; 10 crisoprasaivi; 11 hea jacintoivi; 12 hea amatistaivi.

²¹ 12 õche ẽvã hai 12 perla; pepenteĩ'õ õcheivi japoha penteva perlaivi. Hareka tenta vatahaite'õĩpi ita vera ijuteiva vidrio sãkapya rãĩmi.

²² Tenta hapype aheshãa tũpao, shara Teja, Tũpa ñymbaikatuva hareka Avisha Ray haitei tũpao.

²³ Hareka tenta vasu ikoteveãhe kuarasy hareka jasy mykoĩ'ĩãrẽ verã, shara Tũpa hĩmbipekue sape'ẽhe hareka Avisha Ray hai ñymbai sapeka.

²⁴ Opaite kuaretare tenta vasu retaivi ouva vatapo reta hai sapevape, hareka mburuvishare yvy ĩãrẽ'õ veruposhu ikokatukue omombaipyshu verã.

²⁵ Hareka hõchere ñymboty'ãĩteipo ara hareka pyharekue shara haipe pỹntu mba'etypo.

²⁶ Hareka meẽposhu reta ikokatukue hareka tenta vasure hĩmbipekue.

²⁷ Tẽvã mbaipeveãmapo hokape ichejy mbai kyava, mbai porãmba'eiteva hareka japuvare. Koñeĩ'ẽ iche verã heere mbyparahava Avisha Ray jykuatiape tykove ryheva.