Apocalipsis 2 - NandevaBiblia

Ñee tũpao Éfesope'õ pevarã

¹ Mbyparashu Tũpa jokueva tũpao Éfesope'õ: Kyrã hei 7 jasytata ipo jakataperea, hareka ikova 7 tataĩndy hyru ita vera ijuva mbyteipi:

² She aikuaa rijapova hareka pohy rỹmba'apova hareka rỹhãrõkuajy, hareka katumba ryhesha tykove porãmbape'iare. Aikua rẽñehãriva hã'ãha verã hei'i ijehevare apostolva tẽvã ryvãheshu añeteãrã japureiva.

³ Rỹharõkuarã, ryhasa'asykuajy hareka heta rỹmba'apojy shyraihuvape, nykangymba ryheve.

⁴ Tẽvã ĩme'ẽ pente mbai rijapo porãmba; shyraihu nungaveãma jypyite shyraihu vekua rãĩmi.

⁵ Hãma nymanduapohe mapera reajy, eijy jykoty Tũpa, tynondeite rikova rãĩmipo rikojy. Rijapoã kyrãrã ahekypo ndyhevikui nytataĩndy hyru hendaivi, reijyvyã Tũpa jykotyrã.

⁶ Tẽvã ĩme'ẽ pente mbai rijapo kaviva: Ryheshatãã nikolaitare japova, she aheshatamba rãĩmi jyve.

⁷ Ĩme'ẽ japysava tyhendu Espiritu heiva tũpao retape: Opaite õhẽkaviva ñyrãrõivi ameẽposhu hou verã yvyra'ia hykoveva Tũpa jy'yvoty rẽnda mbytepe'ẽva.

Esmirna pevarã ñee

⁸ Mbypara jyveshu Tũpa jokueva tũpao Esmirnape'õ: Kyrã hei tynonde hareka japyhea, arykai manova hareka puãjy vekua,

⁹ She aikuaa rijapo vekuare, ryhasa'asyvare hareka ndypavetekuepe, ndy espiritupe rikokatutẽva. Aikuaa marãra ijeta porãã ndyrehe Israelitare hei'i ijehevare tẽvã ha'ẽã, koñei Satanás ñymbatyse'õ retape hai.

¹⁰ Avy kyje ryhasa'asypo rẽĩvare; Ãña rãnga ã'ãmo hããposhu hareka minjekapokui mbyperesoha verãpe pyhasa'asypo 10 ara. Tanta jyroja rỹmanopeve, hãrã she ameẽponde tykove opamba.

¹¹ Japysava tyhendu Espiritu heiva tũpao retape: Opa õhẽkaviva ñyrãrõivi hasaveãmapo ñymano mokuehea.

Ñẽẽ Pérgamo pevarã

¹² Mbyparashu Tũpa jokueva tũpao Pérgamope'õ: Kyrã hei kyse hakuapuku mokue hãĩmbeva ĩmerea.

¹³ She rãnga aikuaa Satanás vapyape rikorirã. Hareka ndysareã shyrehe, rirojañoĩ shyrehe, ara Antipas añeteĩte shyreshava jukaha pynymbyteperã, Satanás ikovape.

¹⁴ Tẽvã ĩme'ẽ pente mbai ajetemba'ẽshea: Ĩme'ẽ pynymbytepe Balaam pyrỹmboiheva potamba hejava, mboi vekua Balac israelitare oa verã mbai porãmbape hareka pota houshu reta mymba jukahava Tũpa rã'anga retape me'ẽãva hareka mykyrẽyshu reta kyrãrãĩ jyre verã.

¹⁵ Potãã hejajy reta nicolaitare pyrỹmboihea.

¹⁶ Hãrã japojy haindeva, shara rijapoã hokavarã narẽ'ãĩtepo ahandekui, hareka ãĩrãrõpo hãndi retakui kyse pukuvapy shijuruivi õhẽva.

¹⁷ Japysava tyhendu Espiritu heiva tũpao retape: Õhẽkaviva ñyrãrõivi ambyho'ukapokui maná ñomihareva ameẽpojyshu reta ita tĩĩva, mbyparahaheva tyree py'ahuva, mbavamba kuaava, koñeĩ me'ẽãshuvaĩpo kuaa.

Tiatira pevarã ñee

¹⁸ Mbyparashu Tũpa jokueva tũpao Tiatirape'õ: Kyrã hei Tũpa ray, hesa tata hendyva rãĩmiva hareka ipy bronce verava rãĩmiva.

¹⁹ She aikuaa rijapova, rypyryhaihukue, rirojakue, hareka rỹpyrỹmboryva hareka rỹhãrõkuaa, aikua rijapove tynondeite rijapo vekuaivi.

²⁰ Tẽvã ĩme'are pente mbai shypya'ohombahe ndyheviva: Rỹma'ẽĩhe Jezabel taupe ñimiñee Tũpa heepe, mbytavy shyryhevare, mboishu reta ikoĩ hãndi verãre taupe omendambape hareka hou verã ho'uavare me'ẽãva ta'angape.

²¹ She ahãrõĩtẽshi oujy verã Tũpa kyty, tẽvã ñateỹ heja heko porãmba vekua.

²² Hokava rehe aitypo turupape hareka amboupo jyhasa'asy tivishava, opaite kyrãrãĩ'i hãndiare, Tũpa kyty peijyvyãrã.

²³ Hãrã membyre opapo ajukashi. Hãrãpo opaite tũpaore shykuamakui opaĩ aikuava tankapy'õre hareka typyare, hareka amyngoviaposhu reta pepenteĩ japo vekua rehe.

²⁴ Tẽvã pee Tiatirape peĩva, pehombahipia hokava pyrỹmbo'eahea hareka pikuamba haire mbyhee vekua Satanás japokava ñemiãpe'õ, hai pee: Añonoveãmapo peãrẽ ĩrũ mbai pohyva.

²⁵ Tẽvã pingareko kavipohe ĩmepyreva, she aijypeve.

²⁶ Opaite õhẽkaviva ñyrãrõivi hareka japova aipotava ara japyapeve, ameẽposhu mbai katukue reko verã tentavasu retare,

²⁷ Sheru ñonova rãĩmi shepope, hãrã jepypohe reta yvyra rãĩmiva hiero ipoperea rãĩmi hareka opapo jojoka japepo tujuivi japoava rãĩmi.

²⁸ Ameẽposhu reta jasytata kõĩ ourã õhẽva.

²⁹ Japysava, tyhendu kova Espiritu heiva tũpao retape.