Apocalipsis 18 - NandevaBiblia

Babilonia nupaharã

¹ Hokava haykuema aheshajy yngava Tũpa jokueva vejy ou vate araivi. Ñymbaikatu vasukue ryheve, hareka hĩmbipekuepe opa mykõĩ yvy'ĩãrẽ.

² Hynatu sapuke, hãrã hei: O'ama Babilonia, tenta tivishava, ikomashi mbaiposhyre henta, opaĩ marãrãngatuva espiriture ikua hareka opaĩ marãrãngatuva vyra ky'ava hareka opaite mymba ñarõva.

³ Shara opaite tenta vasure ñymyngaupy vino heko kyrãrãĩ'iapy; mburuvisha vasure yvy ĩãrẽ'õre kyrãrãĩ jyre hãndi, mavende'iare opa ikokatupy hai oparei mombo vekuapy.

⁴ Hãrã ahendujy ñee yngava hỹnatu vateivi heiva: Pẽhẽshivi, pee henta'õ shyryhevare, mahẽ pymboryhekui mbai porãmba japojyreva, hãrã pindipity jyvekui mbairasy porãmba ouhe verãre.

⁵ Mbai porãmba japo vekuare vãhẽma vate arape, hareka hokava mbai porãmba Tũpa manduahe.

⁶ Pijapo jyvehe hai japo vekua rãĩmi yngava retare, mokuejy pymeẽjyshu porãmbava hai japo vekua. Pymbyupy mokuejy iroveva hai yngavare myhẽvã'ẽshua.

⁷ Hai rãnga jyroja'ijehe hareka pya ohohe haikavivape iko verã; hãme ã'ẽ pymbyhasa'asyveshu hareka tijaheo. Shara hai pyape hei: “Kope avapy ãĩ huvisha vasu rãĩmi. Ha'ẽãshe ĩme manoshia hareka ahasa'asyãvãĩpojy”.

⁸ Hãme rãnga, pente araheapeĩpo opa ouhekui mbahapy mbairasy porãmba: Jyhasa'asy, ñymano hareka ñymbahy, opapo mambaiha tatape, shara Ñandeja Tũpa pirĩmbivacheva, hai ñymbaikatuva.

⁹ Hãrã mburuvishare yvy'ĩãrẽ'õ kyrãrãĩ'i hãndiva hareka vya vasupe iko hãndi vekuare, jahe'opo hareka sapukepojyre heshama tatãti hendy'ẽhevarã.

¹⁰ Heshama ñunupa vasurã kyjeite retarã, mbyryĩpo ñynoĩshi hareka sapukepojyre: Tenga, tengaponde, tenta vasu Babilonia, tenta pyrãtai'i vekua, sapy'aitepemba vãhende jaheandyrehe verã!

¹¹ Opaite yvy'ĩãrẽ mavende'iare jaheopo jyve hareka mbasypohe reta hokava tenta, shara mba'etymapo ovashi verã veruvare;

¹² ita verava ijuva, ita vera tĩĩva, ita mashyãva hareka perla, mondea verã tarapo pyrẽrĩva hareka ĩshiva, pyntahũũpya hareka pyntateiva; yvyra pishekatuva hareka opaite poryava marfilvi japoha vekua, opaite poryava yvyra mashyãvaivi japoha vekua, bronce, hiero hareka marmolvi;

¹³ kanela hareka timbiu mbipisheka, asaite mbipisheava, mirra, mbai pishekatuvare, vino, asaite, avati ku'i hareka trigo; mymbare avisha, kavajure, hareka karetare, jokueharea retave hareka ñyrãrõpe pysyavare.

¹⁴ Hareka he'iamapohe Babilonia: “Mba'etymaryre rikokatuhea ndypya oho'ihea; opareima rivarehe mbai kapypyryva”.

¹⁵ Hareka mavende'iare, opa ikokatu kova mbai ovende jyrerã, mbyryĩpo jyreshi kyje moã mbihi'ahe reta jaheaherã. Say hareka jahe'okue ryheve heipo reta:

¹⁶ Tenga, tengapo, nde tenta ojaimbava hareka nypyrãtava! Rĩmimonderiva mondeava pyrẽrẽrĩvapy, mondeava pyntahũũva hareka pyntateiva, rĩmymashyãva oropy, ita mashyãva hareka perla.

¹⁷ Pente orapeĩ sapy'aite opashi reta mbai ikokatuahe vekua, opaite barco mbyvata'iare hareka barco oho'ipyare, barkope mba'apo iare hareka yyvasupe mba'apovare mbyryĩ opa pyta reta.

¹⁸ Heshama reta tenta vasu okeva hãtãtĩkuerã, sapukejyre: Ĩmera'ẽjy ĩrũ tenta pyrãtava kova tenta ojaimbava rãĩmi?

¹⁹ Haima ñono yvykui ñãkare, jaheo ryheve, hareka sapuke reta: Tenga, tengapo, tenta ojaimbava, ikokatukuepy opa ikokatu reta yy vasuhupi mavende'iare. Sapy'aitepe opa oñehũndi tenta vasu!

²⁰ Ryvy'apo nde ara vate'õ, pyvy'apo jyve pee heko kyambare, apostolre hareka Tũpa ĩñee mbeu'iare, shara Tũpa nũpamarã, japomape ñimbivacheva ryheva.

²¹ Hãrã pente Tũpa jokueva pyrãtava hupi pente ita, trigo mungu'iapya rãĩmi marẽỹva, hareka momboma yy vasuperã hei: Kyrãpo pyrãtãkue ryheve opa ityha Babilonia, tentavasu ojaimba, hareka mbai arapemba ndyreshahajy verã!

²² Ñyhenduveãmapokui arpa ipukue, hareka mimby maĩrã trompeta mbopu'iare! Mbaipemba ryheshajy verã yngangaiva kuaretare mavendeva, hareka rỹhenduveãmapo itapy mbai mungui'õ!

²³ “Sapeveãmapo lampara, ñyhenduveãmapojy omendava ñymby'aretevare! Shara mavende'iare hai pyrãtava yvy'ĩãrẽ, tẽvã nde ndypajekuepe opa rymbytavy tenta vasu retape.

²⁴ Tũpa jahehe hokava tenta, hai rehe opa jukaha Tũpa ĩñee mbeu'iare, hareka hai pyhyrõvare, hareka jyve heta yvy'ĩãrẽ'iare”.