Apocalipsis 15 - NandevaBiblia

7 Tũpa jokueva hareka 7 Tũpa ñunupa vasu

¹ Hareka ahesha ynga mbai heshahava arare ojaimbava hareka mbyry ma'ẽãhea: Hai 7 Tũpa jokuevare 7 mbairasy porãmba ryheva koñemaheva, hãrã akuavare opamarã opapo jyve Tũpa poshykue.

² Hareka ahesha pente yyvasu vidrio rãĩmi sãkava jihiava tata, hareka jichepe ñymboy ñynoĩ akuavare jepyheva mymba ñarõva hareka ha'ãnga hareka hee papahapya, hareka opaiteva ĩmere reta arpare Tũpa ña'ãpova.

³ Hareka haire pyrahe Moisés Tũpa jokuerea jypyrahe hareka Avisha Ray jypyrahe: Ojaĩã hareka mashyã opava rijapova Sheru Tũpa mbai katukue, heko kavi hareka haikavi ndyrape tentavasure Juhuvisha vasu.

⁴ Mbavara kyjeãpo ndyhevi, Teja, hareka nemomba'ẽãpo shara ndeiirẽĩ ndyreko kyamba hãme opaite tenta vasure oupo hareka nemombaipo shara hekopekavi rĩpirĩmbivache.

⁵ Haivima akuaivi she amaĩrã jypea tũpao vasu vate arapy'õ, tavernakulo he'iashua.

⁶ Haivima õhẽ tũpaoivi 7 Tũpa jokuevare, ñymondeva mondeava kyamba hĩmbipeva hareka pitiare jerehe cinta ita vera ijuvaivi, haire ĩmere 7 mbairasy porãmba.

⁷ Hareka penteva urũndy hykove'ia reta pãũvi memeẽshu 7 Tũpa jokuevare kopa ita vera ijuva, tynyheva Tũpa poshykue hykove'ia opa ara.

⁸ Hareka tũpao opa tynyhe tatãti Tũpa ñymbai katukue hareka hĩmbipekue hãrã mba'ety katu icheva tũpao'ipe opapeve 7 mbairasy porãmba, 7 Tũpa jokuevare rahava.