Apocalipsis 12 - NandevaBiblia

Taupe hareka mboi vasukue

¹ Haivi ijyhesha arare pente tivishava mbai heshahava: Pente taupe kuarasype ñymondeva, hareka jasy ipy ipere, hareka ñakare'ẽ pente tankare ñonoava 12 jasytata ĩmerea.

² Taupe puruava sapuke hasyitemashu memby verãrã.

³ Haivi jykuaajy ynga heshahava vate arare: Pente mboi vasukue pyntava, 7 ñakavare hareka 10 ijuureva, ñakare pepenteĩre tankare ñonoava.

⁴ Huvepy mbytyryry mbahapy henda'õ jasytatare hareka mombo yvy'ĩãrẽ, haivi mboivasu oho taupe memby'ẽ verã hỹnonde, membymarã opa houshi verã.

⁵ Haivi taupe memby kuimbai, hareka memby opaite tenta vasure ẽẽposhu huvisharã hiero pukuva ryheve. Haivi sapy'aĩ mbaretepe hekyashi memby rahaha Tũpape hareka vapypya hỹnonde.

⁶ Haivi taupe ñyvãhẽ yvy ikoambaipi, Tũpa myhẽvashu hendarã ñyngarekohe verã, haipe myngarupo 3 ãño hareka 6 jasykavi.

⁷ Haivi iko ñyrãrõ vasu vate arapy, Miguel hareka vate arapy jokuevare, ñymbyvaishohe mboi vasu. Hãrã mboi vasu jokuevare hãndi ñyrãrõ jyve.

⁸ Katynga jepyãhe reta hareka me'ẽãveãmashu reta vate arapy'ẽ verãpe.

⁹ Haivi mboi vasu momboha yvykyty, mboi aryka'eiteva, Ãña hareka Satanás he'iashuva, opa kuaretare mbytavyva, hai jokuevare hãndi momboha yvy'ĩãrẽ.

¹⁰ Haivi ahendu pente ñee hỹnatu araivi heiva: Ã'ẽ vãhẽma pyrỹmondoajepe verã, pyrãtãkue hareka Tũpa huvisha vasurã'ẽ verãpe, hareka ñy ñymbai katukue, shara ãña mohẽama vate araivi, ñandyryvyre arakuepe hareka pyharekue porãmba ijeta'ihea Tũpa hỹnonde.

¹¹ Haire jepyhe Avisha Ray huvy rupii hareka ñee mbeujyreva rupii. Tẽvã ñandyryhevare haihuãmba reta hykove, koñeĩ ĩñonoĩ timeĩ jukaha verã.

¹² Hãme rãnga pyvy'aĩpo ara vate'õva hareka pikopyva! Tengapo yvy'ĩãre'iare hareka yy vasupy iare! Shara poshyite ryheve Ãña vejymape, kuama jy'ara pukuveama potarã.

¹³ Hãrã mboi vasu kuama yvype momboharã, õñepyrõ moña taupe memby kuimbaivape.

¹⁴ Hãrã taupe me'ẽãshu mokue vyrachevasu hypepo, veveshi verã mbyry mboi yvy ikoambaipi ñyngarekoahe verãpe 3 ãño hareka 6 jasykavi.

¹⁵ Mboi mohẽ juruipi taupe haykue yysyry rãĩmiva, raha verã yy syryva.

¹⁶ Tẽvã yvy maĩ'ĩãrẽ taupe, peashu pente yvykua hareka opa mokue yy syry'ova mboi vasu mohẽva juruipi.

¹⁷ Hãma mboi vasu poshyitevejyshu taupe, hãrã japo ñyrãrõ vasu ñymoña hãndiare, japovare ñee japoa verã Tũpa ña'ãpova hareka jyrojaheva Jesús ĩñee.