Apocalipsis 10 - NandevaBiblia

Tũpa jokueva hareka kuatia mishĩva

¹ Hãrã aheshajy Tũpa jokueva ĩrũ ñymbaikatuva, vejy vate araivi ãvãpyntu mbytepe hareka ĩmere ñakare pente jyi. Hova hĩmbipe kuarasy rãĩmi, tymare tata puku jypotavasu'õva rãĩmi.

² Ipope ĩmere pente kuatia mbyparahava michĩva pe'ava, haivi ipy jakata kyty'õ ñono yvasu'ĩãrẽ ipy jasu kyty'õ yvy iãrẽ.

³ Hãrã hỹnatu sapuke, ñavãpỹnta karõrõva rãĩmi, hareka sapukerã, ñyhendu 7 ijetava hỹnatu hy'apuva rãĩmi.

⁴ Ijetama 7 hy'apuva retarã, pota ambypara'are kuatia mishĩvamipe haire heiva, tẽvã vate araivi ahendu pente ñee heisheva: Avy mbeukui 7 hy'apuva heivare hareka avy ñono kuatiape.

⁵ Hãrã Tũpa jokueva ahesha vekua ñymbo'y'ẽ yyvasu hareka yvy'ĩãrẽ, hupi ipo jakata vate arakyty,

⁶ hareka meẽ ĩñee Tũpa opa ara ikova heepe, arykai japova arare hareka yvy, yyvasu hareka opa mbai ẽpyare hãrã hei: Tũpa hetaveãmapo hãrõ.

⁷ Vãhẽpokui ara Tũpa jokueva 7 hea õñepyrõ mbi'ipu verã trompeta hareka ikoma verã Tũpa japo verã ñemiãpereva, hai heishuva rãĩmi jokueva Tũpa ĩñee mbeu'ia retape.

⁸ Hãrã hoka ñee ahendu vekua, vate araivi ijetajy she hãrã hei: “Ekua, hekyshi kuatia mishĩĩvami, hoka Tũpa jokueva ipoivi, ñymboy'õ yvasu hareka yvy'ĩãrẽ”.

⁹ Hãrã aha Tũpa jokueva'õpe airureshu meẽshe verã kuatia mbyparahava mishĩva, hãrã hai heishe: Ko'ẽ he'u. Ndijurupe hẽ'ẽpokui ei rãĩmi, tẽvã ndypyape iropokui.

¹⁰ Hãrã aheky hokava kuatia mbyparahava mishĩva Tũpa jokueva ipoivirã, hãrã hau. Shijurupe hẽ'ẽ ei tyy rãĩmi, tẽvã ãmokuemarã shyryepy iro.

¹¹ Hãrã heishe reta: “Ñimiñehẽ ñee iko verã henta'õre jaheva, tentavasure, opaite tiñeere hareka huvishavasu retape”.