Apocalipsis 1 - NandevaBiblia

Tũpa pyrỹmbyheshakava

¹ Kova hai Tũpa heshaka vekua Jesucristo rupii, mbykuaaka verã opaite jokueva retape; kova mbai areã iko verã. Jesucristo Tũpa jokuevape mboushu mbyheshaka verã jokueava Juan,

² hai opa mbeu opaite hesha vekua Tũpa ĩñee hareka Jesucristo mbeuva.

³ Vy'apo mbijetava Tũpa ĩñee hareka henduvare ko ñee iko verã, hareka japova, shara vãhẽmapo ara iko verãpe.

Juan mbypara 7 tũpaore pevarã

⁴ She Juan, amymarãndu 7 tũpaore ẽvã Asiape: Pymyvãhẽ jyhaihukue hareka pyavapy ouva, haiñoĩva hareka haiva, hareka ou verã, hareka 7 espiritu ẽvã hai vapypya hỹnonde,

⁵ hareka Jesucristoivi heshava jyrojaheva, tynondeite kuerajyva hareka mbaivasuveshiva mburuvisha vasu yvy ĩãrẽ'õre. Hai ñandyraihurã hareka opa ñandohe mbai porãmba vekuaaivi huvypy,

⁶ hai japo ñandyhevi mburuvisha vasu hareka paire, ñamba'apo verã Tũpa pevarã, haiva Jesucristo Tuu. Hĩmbipekue hareka mbaikatu ña'ãporãpo opa ara!

⁷ Shara Cristo oujypo ãvãpyntupy, opava retapo hesha, kuture vekua retaave hareka opaite yvy'ĩãrẽ'õre ñymoñashia heshamarã hapĩrõpo hareka opapo jaheo reta. Amén.

⁸ She hai jypy hareka japyhea, õñepyrõhea hareka japyhea, hei Tũpa ñymbai katuveva, hykove'ia, hykoveñoĩ'i vekua hareka ouserimava.

Juan hesape'ou marãra Cristo hĩmbipeapy'ẽ

⁹ She Juan, pyndyryvy hareka pinimi'ĩrũva Jesucristo jyhasa'asype, hai vapyape mburuvisha vasurã'õpe hareka pyrãtape jahasa verã Jesucristo hasava rãĩmi, Tũpa ĩñee ambeu airã hareka Jesucristo rehe aijetarã shymondoha isla Patmos he'iashuape.

¹⁰ Ãĩme ãĩ Espiritupy Ñandeja jy'arape, hãrã ahendu shaykue pente ñee hỹnatuva, trompeta ipukue rãĩmiva,

¹¹ hokava ñee heishe: She hai jypy hareka japyhea, õñepyrõhea hareka opahea, ryheshava mbypara kuatiape rahaka 7 tũpao Asiape'õ, Éfesope, Esmirnape, Pergamope, Tiatirape, Sárdispe, Filadelfiape, hareka Laodiceape.

¹² Hãrã ajere ahesha verã mbavara ijeta'ẽshe ahesha 7 tataĩndy hyru ita vera ijuva.

¹³ Hareka hoka 7 tataĩndy hyru mbytepe ahesha kuareta Tay ovava, ñimimondeva mondeava pukuvapy ipypeve vãhẽva hãrã pente ku'a jokuahaka ita vera ijuva pitiare.

¹⁴ Ñakahaa tĩjypy avisha haa rãĩmi, ovajy amanda tĩĩva, hareka hesare hãinypi tata hendyva.

¹⁵ Ipy hĩmbipejy bronce mbyverava rãĩmi tatapy, hareka ĩñee yyvasure hy'apuva rãĩmi.

¹⁶ Ipo jakata kytyre 7 jasytata, hãrã juruivi õhẽ pente kyse hakua pukuva mokue haĩmbeva, hãrã hova hendyjy kuarasy sapetei'ẽrã rãĩmi.

¹⁷ Hãrã aheshamarã, a'a yvype ipy hỹnonde manova rãĩmi. Tẽvã hai ipo jakata ñono sheãrẽ, heishe: Avy kyje, she hai õñepyrõhea hareka japyhea.

¹⁸ Hykovejyva, amanotẽ vekua, tẽvã ã'ẽ manomba verãma aiko, ĩme'are mbaikatu ñymano hareka tatavasu rehe.

¹⁹ Mbypara kova mbai ryheshava, hareka ã'ẽ ikova hareka kutyve iko verã.

²⁰ Hokava kuaahamba 7 jasytata ryhesha vekua shepo shakatape, he'iseva hai Tũpa jokuevare 7 tũpaore, hareka 7 tataindy hyrure ita vera ijuva ryheshava hai 7 tũpaore.