3 Juan 1 - NandevaBiblia

Ñymarãndu

¹ She Juan, akuakuamava ambyparashu kova kuatia, shyryvy Gayo añete ahaihuva.

² Shyryvy ahaihuva, airureshu Tũpa opa mbai rijapova tõhẽkavi nde hareka mambaimbari verã, ndyrykovepe ohokavi'ihea rãĩmi,

³ shara shymbyvy'aiteva hai ñandyryvyre jyveru mbeushe marãra riko hekopekavi hareka marãra ryvata añetevape.

⁴ She pevarã mba'ety kovaivi shymbyvyaveva, ahendu shyrayre vata kavi reta añetevaperã.

Gayo myvãhẽ mbuhupare hentape

⁵ Shyryvy ahaihuva, hekope kavi rãnga rijapo opaite rijapova rỹmbory jyve ñandyryvyre Cristo jyrojahearã, ajemaĩ yngaivi ouva retatẽ.

⁶ Opaite ñandyryvyre mbeu reta tũpaope ñymbatyrã, mãrãra ryhaihushu reta. Haikavitevepo rỹmboryshu opaite maĩnunga mba'etyrevape ohojyseve verãre pehupi. Japo kova Tũpa mbyvyashu verã.

⁷ Shara haire õhẽ mbeu verã Jesucristo hee, hareka hekyãshi reta maĩnunga Tũpare jyrojambare.

⁸ Ñande ñamboryposhu reta, ñambeu handi verãre Tũpa ĩñee añeteva.

Diotrefes ñymbyvaisho'ihe Tũpa ryhevare

⁹ Ambyparama kuatia ñandyryvy Cristo ryheva retape, tẽvã Diotrefe potañoĩ huvisharã'ia, pya ohoãhe he'iava.

¹⁰ Kova rehe, ahama apohyperã, amymandu'akapohekui maĩnunga japo vekuare rehe, hareka ñee porãmbavare hei'i yryreheva. Hokava ĩãrẽ, hai hentape myvãhẽãjy ñandyryvyre, Jesucristo hee mbeu'iare hareka potãã mbava myvãhẽ jyveshu reta, potatẽ mboryshuvare opa mohẽ tũpaovi.

Opaite ijeta kavihe reta Demetrio

¹¹ Shyryvy ahaihuva, avy ñymboihe porãmba japo'iare ikova rãĩmi, haikavivaĩpo. Mbai haikaviva japo'ia rãnga hai Tũpa ryheva, tẽvã mbai porãmba japo'ia, kuãã hai Tũpa.

¹² Opaiteva ijeta kavihe Demetrio hareka hai hykovepe heshaka he'iaheva añeteva. Ore ijetahakavĩĩ jyvehe, nde rikuaa kavi mbe'uhava haiva añeteva.

Ñymymrãndu japyhea

¹³ She heta mbai haitẽ nde verã, tẽvã aipotãã kuatiape ambyparande,

¹⁴ shara ãhãrõ'ãĩ aha aryresha verã, haivi jaijeta ijupii verã.

¹⁵ Pyavapy toĩ ndyrehe. Ñani'ĩrũre kope iko'iare, nymymarãndu hareka jurure jyvende pepenteĩ ñani'ĩrũre haipe'õre rỹmarandu verã.