2 Timoteo 4 - NandevaBiblia

¹ She aheja nde Tũpa hareka Cristo Jesús hỹnonde, oujy verã mburuvisha vasu rãĩmi jahehe verã hykoveteri'iare hareka manoma vekuare,

² ñimiñeepy Tũpa ĩñee hareka ereshu tijapo reta, javendeape maĩrã javembandevape; ñono kavi, ñyngãta hareka mykyrẽy opaite ñyharõkuaa ryheve, hareka rymboivape.

³ Shara vãhẽpokui ara kuaretare henduseveãma verã pyrymbo'eaheva mambaimbava, koñeĩ ha'eire potava rãĩmi, haire hekapo ynga pyrỹmboi'ia mboi verã ha'eire kyrẽy henduva.

⁴ Henduãpokui pyrỹmbo'eahea añeteva hareka ñeereiva tãkaivi nohẽã vekuãĩpo hẽnduve reta.

⁵ Tẽvã nde ryrekoñoĩpo mbai haikaviva, hasakuaa jyhasa'asyre, mbeuñoĩ ñee haikaviva, opakavi japo rijapova.

⁶ Vãhẽserima Tũpape shyme'ẽãrã shukaha verã hareka vãhẽmapo ara amano verãpe.

⁷ She ñyrãrõpe ãĩrãrõ kavi, japypeve ãñani hareka mapeã apoi airojahe Tũpa.

⁸ Ã'ẽ shy'ãrõma'ẽ korona ñee ahenduiterã meẽshe verã hokava arape Ñandeja, Huvisha heko kaviva. Hareka ha'eã sheĩĩ meẽshe verã, opaite jyhaihu ryheve oujy verãpe hãrõ'õ reta jyve.

Ñee ñande pevarã

⁹ Eñehãã narẽãmi ei shyreshajykui,

¹⁰ shara Demas shyrejama, haihuite opa mbai ko yvy'ĩãrẽ'õ rehe hareka oho Tesalonicape. Cresente oho hai Galaciape hareka Tito oho Dalmaciape.

¹¹ Koñeĩ Lukas ĩme'ẽ shendie. Heka Marko hareka ei hãndikui, shara hai katu shymborykui mba'apope.

¹² Tíquiko amondo hai Éfesope.

¹³ Reirã, erushekui ponsho aheja vekua Tróaspe, Carpo hentape; harekajy kuatiare, tynondeite'ẽ vakapire shepope ambypara vekua.

¹⁴ Alejandro, hai mba'apova hierore, heta mbai porãmba japo shyrehe; Ñandeja mbyhekoviapokui hai japo vekua rehe.

¹⁵ Ñyngareko katushi hai, shara ñymbyvaisho jyrehe ñapyrỹmboihe vekua.

¹⁶ Tynondeite aijeta shijehe huvishare hỹnonderã, mba'ety shichere ẽvã; opaite shyreja reta. Airureshu Tũpa potambaa jahehe verã hokava rehe.

¹⁷ Tẽvã Ñandeja shichere ẽẽ hai, hãrã meẽshe pyrãtakue ambeu verã Ñeekavi hareka kyrã japo opaite haimbaa israelitavare hendu verã. Kyrã Ñandeja shymondojepeshi java jurukueivi.

¹⁸ Ñandeja shynohẽpokui porãmbavaivi hareka shymondojepepokui shyrahama verã mburuvisharã'õpe. Hai pevarã pyrãtakue opaite arapeve. Amén.

Ñymarãndu opahea

¹⁹ Marãndushukui Priscila, Aquila, hareka Onesíforo ñymoña hãndiare.

²⁰ Erasto pyta hai Corintope, hareka Trófimo ñymbairasy'irã aheja Miletope.

²¹ Eñehãã katu eikui ndei vãhẽ ara ro'yrã. Nymymarãndu reta Eubulo, Pudente, Lino, Claudia hareka opaite Cristo jyrojaheare.

²² Ñandeja Jesucristo tõĩ nendie. Tũpa jyhaihukue toĩ penendie. Amén.