2 Timoteo 3 - NandevaBiblia

Marãrapokui opa mbai ara opaserimarã

¹ Aipota rikuaa jyve kova: Ara opa serimarã, hetapo ou mbai pohyiteveva.

² Imepo'ẽ kuaretare ha'ei ijaihuva, kyrypoti haihuva, jyrojapo ijehe hareka ijetapareipo ijehe. Ijeta porããpohe Tũpa, tuure heishua japoveãmaposhu, ñee kavi henduseveãmapo hareka kuaaseveãpo Tũpaivi,

³ pyryraihuãpo, pyryparekoãpo, ijeta porããpohe yngavare, ijochaveãmapo reta, hetapo'ẽ jyvavarehea hapisha, ñymbyvaishopohe mbai haikavivare.

⁴ Mbytavypo hapishare, pya mbijetamba ryheve mbai japo, jyroja ijehe, Tũpa heiva japotẽ verã, ha'eire potavaĩ japove reta.

⁵ Ñymbyhekopo tykove mbijicheava Tũpa pevarã rãĩmi, tẽvã ñomipo jyre Tũpa ñymbaikatukue. Avy jihia'i kuareta kyrã'iare.

⁶ Kyrãva reta rãnga mbytavyshu taupe kangyva porãmbape'iare, katumba ijijokova mbai porãmbaivi.

⁷ Hokava taupere opa kuaa raha jyve, tẽvã mapeã mondo kuaa kavi reta añeteva.

⁸ Kyrã jyve Janes hareka Jambres ñymbyvaisho jyrehe reta Moisés, hareka kova kuaretare ñymbyvaishohe añetevare. Hai kuaretare kyavaĩ ñakapereva, jyrojakuepe porãmba heshahava.

⁹ Tẽvã haire mbyryãpo vãhẽ, shara opaite ko yvy'ĩãrẽ kuaapomondo hai mbaimba kuavare, jehushuva rãĩmi kova kuaretare ñymbyvaisho vekua Moisés.

Pablo ĩñee opaheape Timoteo pevarã

¹⁰ Tẽvã nde Timoteo, rikuakavi apyrỹmboihea, aikova rãĩmi, mbai pota ajapova rãĩmi, airojakue, jyhaihukue hareka ñyhãrõkuaa, pyrãtãkue ajepyhe verã porãmba vekua,

¹¹ shymoñaha'irã hareka jyhasa'asykuere. Rikuaa iko shyrehe vekua Antioquiape, Iconiope, hareka Listrape. Tẽvã opa kova mbaivi Ñandeja shynohẽjy.

¹² Kyrãpo moñahare jyvekui opaite pota raha ijeheva tykove pyryparekova Cristo Jesús rehe.

¹³ Tẽvã kuaretare heko poshyva hareka pyrymbytavy'iare porã'ãĩtevepo jyraha reta, pyrỹmbytavy hareka yngavare mbytavyñoĩshu.

¹⁴ Tẽvã nde opa mbaipepo rĩmypyrãta rikua vekuapy hareka nimbirojaka vekua, hãrã rikua kavirẽĩ mbavaivira opa rikuaa.

¹⁵ Manduahe nyndei ryheve rikuaa Tũpa ĩñee, nymboi verã hareka ndyraha verã ñymondojepeva kyty Jesucristo rirojaherã.

¹⁶ Opaite Mbyparahava hai Tũpa rupii me'ẽhava hareka haikavi poryha pyrỹmbo'eapy verã, ñyngãta, ñonoãkavijy verã hareka pyrỹmbo'ehapy marãrapo hekope kavi jaiko.

¹⁷ Kyrã kuimbai Tũpa ryheva ñy'arãndu verã hareka hekopekavi mbai haikavivaĩ japo verã.