2 Tesalonicenses 3 - NandevaBiblia

Pablo jurure ñymbo'eahe verã

¹ Koñemahea, shyryvyre pirurejyve yryrehe, Ñandeja Jesús ĩñee narẽã tymyvãhẽha oparupi, hareka kuaretare tyroja hãrã tijapo, pee pijapova rãĩmi.

² Pirure jyve, Tũpa ñyngareko yryreheshi verã kuaretare heko porãmbaivi hareka porãmba japo verãĩ ñaka poryva, shara opaitevãã jyroja reta.

³ Tẽvã Ñandeja hekokavi, hai ñyngareko pyndyrehe verã opaite mbai porãmbaivi, shara hai opañoĩpo japo heiva.

⁴ Ore jyrojaha Ñandejare, pee pijapova hareka pijapoñoĩ peho verã pynymbo'ehaheva.

⁵ Ñandeja Jesús tikuaaka kavivepe pyhaihu verã yngare, Tũpa ñandyraihuva rãĩmi hareka tymeẽpe jyhaihu jyhasa'asy opa pijepykavihe verã.

Opaiteva ñamba'apoñoĩpo

⁶ Shyryvyre, Ñandeja Jesucristo heepe jururehape pysyryshi verã opaite ñandyryvy ñateỹ mba'apovare hareka potamba ikova pynymbo'eaheva rãĩmi.

⁷ Pee rãnga pikuaa kavi marãrapo piko, pota ore ikohava rãĩmi pikorã; penteã ikohareii pynymbyteipi,

⁸ hareka mbavãã ho'uhareiishi pãhã mbyhepyambape. Kyrãtẽ verã, ara hareka pyharekue mba'apoha putu'uhambape, potãã mbava mbyhepy yryreherã.

⁹ Ajemaĩ ẽẽte ore jurureharã yrỹmboryñoĩpi verã, tẽvã mba'apohaĩ ho'uava vãhẽhashu verã, kyrã heshahakape, ikohava rãĩmi piko verã jyve.

¹⁰ Hãma ikoha'i penendierã kova kyrãmaĩ he'ihape: Mba'apombava ha'eãpo jyve karu verã.

¹¹ Tẽvã ore kuaaha jyve pee pikova ĩme'ẽ a'ãmore ñatẽy mba'apova, koñeĩ mbaimba vekuaĩ iko jyrehe.

¹² Hokava retape mondoha hareka he'ihashu Ñandeja Jesucristo heepe tymba'apove reta vãhẽshu verãre hou verã.

¹³ Tẽvã pee shyryvyre, avy piñymykangy pijapo verã mbai haikaviva.

¹⁴ Ĩme'ẽ ñatẽy japova ore yrykuatiape'õrã, pyheshaheva pypyvẽẽshu mbavara hareka avy piko hãndi, ñymymarãka verã.

¹⁵ Tẽvã avy pota pimbyvaishohe, koñeĩ pymbarakuashu pente ñandyryvy rãĩmi.

Ñymarãndu opahea

¹⁶ Hareka Teja pyavapyva ryheva, tymeẽpe pyavapy opa hendaipi hareka opa ara. Ñandeja tõĩ penendie opa ara.

¹⁷ She, Pablo, ambyparape shepopetei kova marãndu hareka ñee. Kyrã añonoñoĩva rãĩmi ambypararã opaite kuatiape, kyrã ambypara.

¹⁸ Opaiteva Ñandeja Jesucristo tiñohẽ pyndyrehe mbai kavikue. Amén.