2 Tesalonicenses 2 - NandevaBiblia

Kuareta heko porãmbava

¹ Shyryvyre, Ñandeja Jesucristo oujy verã rehe, hareka ñaimbaty hãndi verã, jururehape,

² avy javaimbavape yngai pyndypya pimbijetakui, avy mbava pyrojakui Ñandeja Jesús oujy verã ara vãhemava mbeu'ia. Japupe heiva Espiritu heishuva hokava, maĩrã hoka oreteiva pyrỹmbo'ehama ihea maĩrã kuatiape.

³ Avy pyma'ẽĩhe mbava pynymbytavy, shara tynondepo vãhẽkui ara Tũpa ñymbyvaisho ouheare hareka ijeshakapojykui kuareta heko porãmba, jyvare pyryrehe verã.

⁴ Hokava kuareta ñymbyvaishopohe Tũpa hee rahavare maĩrã pota omomba'eha hareka pyhyrõpo Tũpa jytũpaore hareka Tũpa rãĩmipo ijapo.

⁵ Pynymanduahekui aijetamahepeva kova ryheva ãĩteri penendierã.

⁶ Hãrã ã'ẽ pikuama mbaivara jocha'ẽshu hokava kuareta heko porãmba'ia, potããteri jy'arape kavi ijeshakarã.

⁷ Shara ãñete ñemiãpeĩ heko porãmba'ia mymba'apokama'ẽ ñymbaikatukue; koñeĩ hãrõ syryshi verã mbyteivi jocha'õ.

⁸ Hãma heshahapokui hokava heko porãmba'ia, Tẽvã Ñandeja Jesús jyvarepohekui putũhẽi juruivi mondoherã hareka opapo hĩmbipekuepy jyvarehe oujyvape.

⁹ Hokava heko porãmba'ia oupo Satanás mboryshurã rupii. Oupo tivisha ñymbaikatupe, mbai heshaha verã hareka mbai kavi heshaha verã añetemba ryheve,

¹⁰ hareka heta porãmba vekua rupiipo pyrỹmbytavy jaheahe verãpe shara ñateỹ myvãhẽ reta jyhaihu añeteva hareka kyrã ohojepe verãre.

¹¹ Hãrã Tũpa mboushu reta kova mbai katukuepe pyrỹmbytavy'ia hetava roja verãre mbai japuva.

¹² Kyrãpo jaheahekui opaite mbai añeteva rojambaare, tẽvã koñeĩ mbai porãmbape vy'a jyre.

Cristo jyrojaheare japo vẽrã

¹³ Tẽvã ñameẽñoĩposhu Tũpa ñandyvy'akue pyndyrehe jyve, shyryvyre Ñandeja haihuvare, shara Tũpa tynonde pynypyhỹrõ pehojepe verã, Espiritu rupii pinimbijiche Tũpa pevarã hareka añeteva pyroja rupii.

¹⁴ Ha'ẽrã kova Tũpa pynyrẽno Ñee Kaviva rupii ñande ñambeuva, ñaĩ verã jyve Ñandeja Jesucristo ñymbaikatukue hareka hĩmbipekuepe.

¹⁵ Hãrã shyryvyre, pyrãtape peĩhe Tũpa hareka avy pyndysarehe apyrỹmboihe vekua, ñee rupii maĩrã mbyparahava rupii, myvãhẽhapeva.

¹⁶ Hãrã Ñandeja Jesucristo hareka Tũpa pya kavi rupii hai ñandyraihu hareka meẽ ñande pyavapy japymbaa hareka ñyhãrõkavi,

¹⁷ tymeẽpe kyrẽ'ỹ hareka pyrãta, pere hareka pijapo verã haikaviva.