2 Pedro 1 - NandevaBiblia

Kuatia mokuehea Pedro mbypara vekua

¹ She, Simón Pedro Jesucristo jokueva hareka apóstol apyrỹmymarandu, Jesucristo ñanu Tũpa ñanynohẽva porãmbaivi hekokavi rupii, hejape pente jyrojakue mashyãva ore ĩme rekohava rãĩmi.

² Airureshu Tũpa, vãhẽpe verã hetave jyhaihukue hareka ma'ẽĩhe piko verã pyavapype, Tũpa pikuashuva rupii hareka Ñandeja Jesucristo.

Jaiko Tũpa potava rãĩmi

³ Tũpa ñymbaikatu rupii meẽ ñande opava maĩnunga mba'etyjareva ĩmejare verã tykove hareka jaiko hai potava rãĩmi. Hai ñanymbykuaaka Cristo, ñanyrẽno hai ojaimba rupii hareka mbai haikaviva japovare rupii.

⁴ Hokava mbaire rupii meẽ ñande ĩñee hei vekua meẽ ñande verã, ojaimbava hareka kapyryva, hareka piko verã tykove kyambape Tũpa rãĩmi.

⁵ Hãme rãnga pyrẽĩpo pimi'ĩrũhe pirojakuepe tekokavi ryheve, hareka jyve pyndyrekokavi mbai kuaa ryheve,

⁶ hareka arãndukuepy, katu ijijokova ryheve, ijijokova ñyharõkuaa ryheve, hareka ñyharõkuapy tykove mbijicheava Tũpa pevarã;

⁷ tykove mbijicheava Tũpa pevarã, jyhaihu Cristore jyrojavare; jyhaihukue Cristore jyrojavare opaiteva pyhaihu.

⁸ Opaite kovare hehetavepyrerã hareka kyrã pikorã, pikoreiveãmapo hareka pikuakavimaposhu Ñandeja Jesucristo.

⁹ Shara kova mba'etyreva hãĩ heshamba kuvãĩpia maĩrã hesha kavimbaa. Hãĩ sareshiva mbai porãmbare kurimba vekua hejahareishuva.

¹⁰ Hãrã shyryvyre, piñyhããpo tantakavive pypyta Tũpa pynyrẽno hareka pynypyhỹrõvape, kyrã pijaporã mbaivapeãpo peajykui.

¹¹ Hãrã pe'ahapopekui õche vate arape'õ opambava Ñandeja ryheva hareka Jesucristo Ñanymondojepeva.

¹² Hãme rãnga apyrỹmymandu'aka kova mbai rehe, pikuamatẽvã hareka tantakavima pimepeĩ añetevape pynymbo'ehaheva.

¹³ Aikoterirã, ajapo verã hai apyrỹmykyrẽỹ hareka apyrỹmymandu'aka verã opaite kovare.

¹⁴ Ñandeja Jesucristo kuaakama she aiko pukuveãma verã ko yvy'ĩãrẽ.

¹⁵ Tẽvã amba'apopo aputuumbape, ãmanomarã kova mbai pynymanduahe verã opa arape.

¹⁶ Shara pynymbo'ehãhe Ñandeja Jesucristo oujy verã opaite ñymbai katukue ryhevarã, ha'eã ñeereiva rupii yrỹmbaikuaa rupii nohẽãva, koñeĩ oreteiva yryresa rupii heshaha Jesucristo ñymbaikatu.

¹⁷ Shara ore haipe ĩmehã'ẽ jyve Tũpa Teru õmombai vasushurã. Henduha hokava Tũpa ĩñee hĩmbipeva rupii: “Kova hai shyray ahaihuva, hai reheĩ avyava”.

¹⁸ Oreteiva henduha vate araivi ijetava, ĩmeha oĩha hãndi Jesucristo yvyturusu kyamba'õperã.

¹⁹ Kyrã rekoha hokava ñee Tũpa ĩñee mbeu'iare mbeu vekua, pyrãtakavi'õ hareka haikavipo pijasaka kaviherã. Kova hai mbai sapekava rãĩmi pyntuape sapeva, kõĩma ourãpeve hareka jasytata koĩ kyty jykuava õhẽpeve sape verã pyndypyape.

²⁰ Opava maĩnunga ĩãrẽ pikuakavipo kova: Mba'ety Tũpa ĩñee mbeu'iare ĩñee Mbyparaha vekuape ẽẽva ha'eire ijuhuvii mbeu vekua.

²¹ Shara Tũpa ĩñee mbeu'iare mapeãmba ijuhuvireii ñimiñee reta. Koñeĩ kuareta pyhyrõavare Tũpa heepeimba ñimiñee reta Espiritu Santo mboivare rãĩmi.