2 Corintios 8 - NandevaBiblia

Jyhaihukue ryhevepo ñameẽ

¹ A'ẽ shyryvyre, aipota ambeupe marãra Tũpa heshaka jyhaihukue hareka pya kavikue tũpao retape ẽvã Macedoniape.

² Hasa'asytẽvare, vya reta; pavetetẽvare, haihumba ryheve meẽ reta kyrypoti, hetareva rãĩmi.

³ She aikuaa haire ĩmereamikueĩ meẽrã hareka heta ĩãrẽve meẽ reta.

⁴ Jurure'asy ore potanda hejahashu reta mbory verãre yngava ñandyryvy Jesucristo jyrojahea retarã.

⁵ Hãrõhã vekuaivi haire hetave japo, shara hairetateiva ñymeẽ, tynonde Ñandejape, haivi orepe jyve, Tũpa potava rãĩmi.

⁶ Hãmeara jururehashu Tito, hai õñepyrõ vekua opa japo verã pymbytepe, kova mbai kavikue pijapova.

⁷ Pee rãnga opa mba'epe piñymytynonde: Jyrojakuepe, pijetavape, arãndupe, kyrẽ'ỹpe hareka jyhaihukue pikuaa yryhevivape. Kyrãpo piñymytynonde jyve kova mbai haikaviva japohavape.

⁸ Ha'ẽã katu pijapoñoĩ verã she hai peeva. Pota rãnga aheshakape marãra yngavare opa ñymykyrẽỹ jyve, pyheshaka verã jyve marãra pyhaihu papishare.

⁹ Pee rãnga pikuaama Ñandeja Jesucristo, marãra pya kavi, pyndyraihuiterã hai ikokatutẽva paveteva rãĩmi ou iko'i, hai pavetekuepe pikokatu verã.

¹⁰ Kovape ameẽpope arakuaa: Pee rãnga ãño hasa vekuapevãĩ peñepyrõ, ha'ẽã kova mbai pijapoĩñoĩtẽva, kyrẽ'ỹpe rãnga pijapo.

¹¹ Hãrã ã'ẽ opapo pijapo kyrẽ'ỹpe hairãã peñepỹrõrã vekua rãĩmi, ĩmepyreva katu pymeẽvapo, pymeẽ.

¹² Hãma kyrẽỹ meẽva, myvãhẽha kaviposhu vy'ape meẽrã, shara Tũpa jurureã ñande mba'etyjarea ñameẽ verã.

¹³ Ore rãnga potahãã pypyta pikotẽvẽ, mbai mba'etyreare pymborypirã, koñeĩ potaha jyvachekavi.

¹⁴ Ã'ẽ haire mba'etyre pee ĩmepyreare; mbaipeiny ĩmere jyve retakui pikotẽvẽva, kyrãpo jyvache piko.

¹⁵ Mbyparahavape heiva rãĩmi: “Heta mynovaave hẽmbyãshu, hareka mbovyĩ mynoova mba'etyre”.

Tito hareka ñi'ĩrũre

¹⁶ Ãmeẽ shy'ajetekue Tũpape hai ñono Tito pyape she rãĩmi ojepy'apy pyndyrehe verãrã.

¹⁷ Ãñete hai hendu haishuva; hai ojepy'apyñoĩ pyndyrehe, hãrã ã'ẽ ha'ima kyrẽ'ỹpe oho pẽĩvape.

¹⁸ Mondoha hãndi yngava ñandyryvy hyrãkua kaviva opaite tũpao retaipirã rehe hareka haikavite mbeu Ñee kaviva ryhevarã.

¹⁹ Ha'ẽã kovaĩ, Jesucristore jyrojavare yngava tũpaope'õre pyhỹrõjy reta ohoa hãndi verã, hareka yrỹmbory rahaha verã hareka ñyngarekohahe kova pymbatyva Ñandeja pota ñamombairã, hareka jaheshaka pota ñapyrỹmboryva.

²⁰ Kova heta mbai mbatyava rehe, potãã mbava ijeta porãã yryrehe marãra ñyngarekohahe kova mbatyhava.

²¹ Õñehãã rãnga haikavi japoha maĩnunga, ha'ẽã Ñandeja hỹnondeĩ, kuaretare hỹnonde jyve.

²² Mondoha rãnga jyve hãndi pente ñandyryvy, heta mbaipe heshahahe hai kyrẽỹva, ã'ẽ kyrẽỹvema, shara hai jyroja pyndyrehe.

²³ Tito rãnga hai shi'ĩrũ hareka shymbory'ia pee pevarã; hãma ñandyryvyre oho hãndivare, hai Jesucristo jy tũpao mondovare, hareka Cristo õmombai'iare.

²⁴ Pyheshakashu reta jyrojavare jyhaihukue ĩmepyreva, tũpao mondovare kuaa verã jyve hareka reiãã airoja'ai pyndyreherã.