2 Corintios 2 - NandevaBiblia

¹ Hãme rãnga hai, haikavive ahamba apyryreshajy verã, mahẽ apyrỹmbyvy'ã ãĩjykui.

² She apyrỹmbyvy'ãrã, mbavarapo shymbyvyajykui? Mba'ety, peii rãngapo shymbyvyapijy.

³ Hãme rãnga ambyparape kuatia ajapova rãĩmi, aipotãã ãvãhẽ aharã shymbyvy'ããpirã, shymbyvyatẽpi verã; airoja'ãĩ pyndyrehe shyvy'akue haiva jyve pyndyvya.

⁴ Ambyparape hokava kuatiarã, vyamba vekua hareka ajepy'apy ryheve ajapo, hareka ajaheoseve, ha'ẽã pota apyrỹmbyvy'ãrã, pyhesha verãĩ rãnga marãra apyryhaihu.

Pablo hejareiishi mbai porãmba japohe vekua

⁵ Tẽvã ĩme'ẽ shymbyvyambarã, ha'ẽã sheĩĩ japo shyreheva (potãã ahasaiterã) katu hai, opaiteva rãnga pynymbyvy'ã.

⁶ Hokava kuareta haikavima rãngashu, heta poshy ryheve pereshu vekua.

⁷ Ã'ẽ katuma pyhejareiishi hareka pymborypo haikavi'ẽjy verã, mahẽ vyamba vekua porãã japohekui.

⁸ Hãme airurepe, pyheshakajyshu marãra pyhaihushu.

⁹ Shara ha'ẽrã ambyparape kuatia, aikuaa verã opa mbaipera ñee pyhendu.

¹⁰ Pyhejareiishuvape, ahejareii jyveshi. Shara ahejareii jyve, ĩme'ẽ kyrã ahejareii verãrã, ajapo pyndyrehe Cristo hỹnonde.

¹¹ Kyrãrã Satanás ñymytynondeãpo yryrehe, jaikuaa kavi rãnga piriritysea rãĩmi.

Pablo vy'ã Tróaspe

¹² Ãvãhẽ aha Tróaspe ambeu verã Ñee kaviva Cristo ryhevarã, ẽẽshe amba'apohe verã Ñandeja.

¹³ Tẽvã ajepy'apy ai aheshãã shyryvy Tito Tróasperã. Hãme rãnga aheja retarã aha Macedoniape.

¹⁴ Tẽvã ãmeẽ shy'ajetekue Tũpape, hai ỹrỹmypyrãta hareka jepyhahe verã porãmba vekuare Cristo rupii, hareka ore rupii oparupi kuaaka hai ĩñee, mbai pishekatuva rãĩmi oparupi vãhẽ.

¹⁵ Shara Tũpa pevarã ore hãĩ pishekatuva Cristo rãĩmi, hareka opaite ohojepevare hareka õñehũndivare mbyteipi pevarã.

¹⁶ Ohojepemba verãre pevarã kova incienso pishekue hai purukava, tẽvã ohojepevare pevarã, kova pisheva hai meẽva tykove. Mbavara katu japo kova?

¹⁷ Ore ikohãã okoraha'i ĩãrẽ Tũpa ĩñee, yngavare japosea rãĩmi. Kyrãtẽ verã, añetevaĩ mbe'uha Tũpa jokuereare rãĩmi, hareka Tũpa hỹnonde ijetahahe Cristo.