2 Corintios 13 - NandevaBiblia

Marãndu opahea

¹ Kova mbahapyheama aha apyryresha verã. Kova mbai my'ãñetẽha verã, mokue, maĩrã mbahapy heshakaviva mbeurã haikavimapokui.

² Hãma arykai mbai porãmba japo'iare, hareka opaiteva, mbyry ãĩme'ãĩrã ambeujyshu reta, sheteiva ambeushuare mokueheape aha apyryresharã, hãrã ahajyrã mbaveãmapo ohojepeshikui ñunupa.

³ Shara pota pikuaa shyhevi ãñetera Cristo she rupii ijeta. Pee pevarã kangyã hai, koñeĩ heshaka jyve ñymbaikatukue pynymbytepe.

⁴ Ãñete rãnga hai mbysavavaha kurusure kangyva rãĩmi, tẽvã hai iko Tũpa ñymbaikatukuepy. Ore yrykangyhãĩ jyve handi, tẽvã ñymypenteãherã ĩmeãpo'i Tũpa ñymbaikatukue rupii, haikavipe verã.

⁵ Pymaĩ kavi pindijehe pikuaa verã pynypyrãtara pẽĩ jyrojakuepe, pypya pimbijeta. Pijykuaarã Jesucristo ẽvã pyndypyape? Ajemapo pyndypya hã'ãha!

⁶ Ãhãrõ pee pikuapymondove yryrehe, ore mbai pohyva hasahaĩrã.

⁷ Ore jururehashu Tũpa potãã pijapo maĩnunga porãmbarã, ha'ẽã pota heshaha yryrehe mbai pohyva hasaharã. Koñeĩ haikaviva pijapo verãĩ rãnga, ajemaĩ hãĩte ore hasahambava pyarãã.

⁸ Shara katuã mbai jajapohe añeteva, koñeĩpo añeteva ñaĩ hãndi.

⁹ Hãme ore vy'ahaĩ ỹrỹkangyrã, hareka pee pynypyrãtarã; hareka ñymbo'eha pyndyrehe hekope kavi piko verã.

¹⁰ Hãme rãnga, ambyparape kova ndei aha apyryresharã, potãã ahamarã apory mbaikatu Tũpa meẽshevarã pohyite aijetaperã, ha'ẽã opa apyrỹmbai verã, koñeĩ apurũmupũã verãĩ.

Ñymarãndu opahea

¹¹ Koñymahea shyryvyre, pyvyañoĩ, pẽĩkavi, piñymykyrẽy pepenteĩ, pente pyapeĩ piko hareka pyavapype. Kyrã Tũpa jyhaihukue hareka pyavapy Ija ẽẽpo penendie.

¹² Piñymarãndu pente ñyhẽtu kyambape.

¹³ Opaite tyryvy jyrojavare mondokape ñymarãndu.

¹⁴ Ñandeja Jesucristo tymaĩkavi pyndyrehe. Tũpa jyhaihukue hareka Espiritu Santo tiko penendie.