2 Corintios 12 - NandevaBiblia

Pablo mbeu Jesucristo mbyheshaka vekua

¹ Ãñete, mba'ẽã ñambijehu ñandeĩ jaijeta jai ñandijeherã. Tẽvã kyrãñoĩpo aijetahe shyresape ouva hareka Ñandeja shymbyheshakava.

² Aikuaa rãnga pente kuimbai Jesucristo ohoheva, japoma 14 ãño raharã vekua ara vate'õ mbahapyheape. Aikuãã hetepera maĩrã espiritupera; hokava Tũpa kuaa.

³ Aikuaa hokava kuimbai, hete ryheverã, maĩrã hete ryheveãra, koñeĩ Tũpa opa kuaava.

⁴ Rahahanda vate arape he'iashuape mbahapy ara vatevape hareka haipenda hendu ñee ñemiãpe'õ, mbava kuaretamba katu mbeuva.

⁵ Kyrãva kuaretare katu kyrã airojahe, tẽvã she katuã airoja'ai shijehe, shara mba'ety are kyrã verã, koñeĩpo aijetahe shypỹrãtamba vekua.

⁶ Pota aijeta kavi shijeherã, ha'ẽãpo mbaimba vekua rãĩmiva, shara añeteva ambeupo, tẽvã ahejaĩ, potãã mbava pya mbijeta shyreherã vateve shiñono hesha shyrehevaivirã, maĩrã haiva rãĩmi.

⁷ Potãã mbai heshahakashe vekua rehe airojaiteherã, juu shyroope kuture, pente Satanás ĩñee mbeu'ia tunupa shyrovaipi, potãã airojaite shijeherã.

⁸ Mbahapyjy airureshu Ñandeja, heky shyhevi verã kova mbai.

⁹ Tẽvã hai heishe: “Koñeĩ rikotẽve shyhevi jyhaihu; shara mbaikatu ĩme'areva ijeshaka kavi kangykuepe”. Hãrã shypyrãtamba vekuapeĩpo airoja shijehe, Cristo pyrãtãkue ẽẽ sheãrẽ verã.

¹⁰ Hareka she avy'a shypyrãtamba vekuape, opa mbai he'ihasheape, mbai mba'etysheape, pu'ã shyrehevape hareka opa mbai jyhasa'asy ahasa Cristo rehe. Shara shykangyvape ãñandu shypyrãtave.

¹¹ Kuakuamba'ia rãĩmi ai sheii aijeta kavi shijeherã, shara pee kyrã pijapoka she. Pee rãngate haikueĩ pijetakavi shyrehe verã, shara mbaivapeã shimishĩĩshi hokava apostolre omomba'ea vasuveva retaivi, ajemaĩ mba'eiteã she.

¹² Opaiteva jyhasa'asykue ahasava ñyhãrõkuaa ryheve, mbaikavi heshaha verã, mbai haĩrãã heshahava hareka moãmba pyheshava, peeteiva opa pyhesha vekua, hokava heshaka ãñete she haiva apostol.

¹³ Aipota pyhejareii shyhevi ĩme apyrỹmbyposhykarã. Tẽvã pente mbaipe pee pinimishĩĩve yngava tũpao retaivi, she ãĩã jyve apyrỹmbavai verã!

Pablo mbeujy oho pohy verã mbahapyhea

¹⁴ Opama'ãĩ kavi aha apyryresha verã mbahapyheamapo kova, ahekãã pyndyhevi pee ĩmepyrea, peeteiva rãngapo aha apyryreka. Teru reta rãngakuei mbaty verã kyrypoti tyrayre pevarã, ha'ẽã tyrayre mbaty verã teru pevarã.

¹⁵ She rãnga vy'a ryhevepo apory shijehekui kyrypoti ĩme'area, hareka katu sheteiva ameẽjy pyndyrehekui. Apyryhaihuiterãra, marãrapo pee sa'ite shyraihupi?

¹⁶ Pee pikuaa kavi aipotãã pejepy'apy shyrehe pymeẽ she verã kyrypoti. Tẽvã, ĩme'ẽ ã'ãmore hei shyreheva shapukuepy apyrỹmbytavyrã apirirityva.

¹⁷ Apyrỹmbytavyra mbava kuareta rupii, amondo peĩvaperãme?

¹⁸ Airureshu Tito oho verã peĩvape hareka ãmondo hãndi pente ñandyryvy. Pynymbytavyra'i Tito? Pentea rãĩmiãra ikoha'i pynymbytepe hareka pente pyape?

¹⁹ Heta arape pyndypya pimbijeta aipota aiñymbyhaikavi'ãĩ pynynonde, tẽvã kyrãã. Kyrãtẽ verã, Tũpa hỹnonde ijetaha'ẽ hareka Cristo heepe. Opaite kova mbai ajapova, shyryvyre ahaihuva hai, pumupũã verã.

²⁰ Akyje ãvãhẽma ahaperã, apyryreshamba verã she aipotava rãĩmi, hareka pee shyreshambapi verã pipotava rãĩmi; akyje ẽẽ verã pynymbytepe ñyrãrõ, pyrỹmorãmba, poshy, pota ha'epaiteva, ñeereii, ijeta ijeheva, jyroja ijeheva hareka opa pyrỹmomohẽ'iare.

²¹ Kova aha verãpe akyjejy, shu Tũpa shymymarãka pynynõnde verã, hareka katu ajaheo mbai porãmba japo'iare rehe, hareka hejãã reta maĩnunga porãmbare, kyrãrãĩ'iare, heko ky'akuepy jypykuamavare.