2 Corintios 10 - NandevaBiblia

Pablo ijeta ijehe

¹ She Pablo, airure'asype, Cristo jyhaihukuepe hareka pya kavipe, ajemaĩ pere shyrehe ãĩme'ãĩ pynymbyteperã shymarãva, tẽvã mbyry ãĩmẽ'ãĩrã aponderaã.

² Airure'asype, aha pẽĩvape apyryresha verãrã, avy shimiñerãpikui aponderambahe verã ijeta'i yryrehevare, haire hei japohava maĩnungare tyroo potavape, shara ãĩme'ãĩ ambyhovaishu verãre.

³ Ãñete rãnga ore ikoha jyve ko yvy'ĩãrẽ, tẽvã ñyrãrõhãã ko yvy'ĩãrẽ'õre rãĩmi.

⁴ Ñyrarõhãrã poryhãã ko yvy'ĩãrẽ'õ, Tũpa ñymbaikatukue rãnga poryha, hokava hai jepyheva opaite mbai ñymypyrãta'õ.

⁵ Ity yvype opaite mbai he'iavare, hareka Tũpa ãrãndure pũãvã, hareka opaite kuaretare pya mbijetava rãĩmi ñonoha Cristo ipope, ĩñee rẽndushu verã.

⁶ Õĩha myhenda verã opaite ñee hendumbare, pee hekope kavima ñee pyhendurã.

⁷ Pymaĩ kavihe maĩnunga marãra. Ĩme'ẽ hei ijeheva haiva Cristo ña'ãpova, aipota haishu ore ha'ĩ jyve.

⁸ Ajemaĩ ahasavee apory shymbaikatukue, ãnotiã. Ñandeja rãnga meẽshe apurũmupũã verã hareka ha'ẽã apyrỹmbai verã.

⁹ Aipotãã pimoã apyrỹmyngyje'aipy kuatiare ambyparava.

¹⁰ Ĩme'ẽ heiva shy kuatiape pohyite hareka mbaretepeite aijetava, tẽvã sheteiva aijetarã shypya vasuã hareka shiñee mba'erãã.

¹¹ Tẽvã kyrã heivare kuaapo jyve, opaite mbai mbyryĩvĩ hai vekua, ajapopokui ahama peĩvaperã.

¹² Katuããny ñimbivachea hãndi hareka ñymyha'angahe ijehei ijeta kavi'iare, hairetateiva ñono marãrapo iko, hãme rãnga ñyhããjyre ijupe, ha'ire ñimbivachejyrerã, katynga kua'ãĩtei japovare.

¹³ Tẽvã ore jyrojahããpo irijehe japy ñonoha'orea kutyve, Tũpa rãnga japy ñono ore japoha verã, hareka hai ñonojy'ore vãhẽha ohoape verã.

¹⁴ Hãme rãnga, õhẽhãã yrỹmyhendahavaivi, vãhẽambapeva rãĩmi, shara ore hai tynondeite vãhẽhapeva mbe'uape Ñee kaviva Cristo ryheva.

¹⁵ Jyrojahãã'ihe yngavare japova ore japoha vekua rãĩmi, koñeĩ hãrõhã pupũãve peho verã jyrojakuepe, kyrã piñymbyhetave verã, õhẽãmbashiape irĩñonoãvaivi,

¹⁶ haivi mbe'uhapo Ñee kaviva mymbyryve pee peĩvaivi, icheamba yngavare japo vekuape. Mbavamba hei ore verã, yngava japo vekuaĩ jyrojaha'ihea.

¹⁷ Ĩme'ẽ pota jyroja ijehevarã, Ñandeja heepe tiroja'ijehe.

¹⁸ Shara hokava kuareta ñonohava, ha'ẽãpo ha'ii ñymbyhaikavi'ia, koñeĩ Ñandeja mbyhaikavivaĩpo.