1 Timoteo 5 - NandevaBiblia

Marãrapo jaiko hãndi ñandapishare

¹ Avy ñyngãtashu kuimbai kuakuamava, nderu rãĩmipo rỹmbarakuaa, hareka kunumire ndyryvyre rãĩmiporyre;

² taupe kuakuavare ndesy rãĩmi japo, hareka kuñataĩre niindy rãĩmiporyre, niñerãmba ryheve.

³ Mbyveteshu taupe ĩme manoshi vekuare, ãñeteĩte mba'etyreva mboryshu verã.

⁴ Tẽvã taupe ĩme manoshia ĩmere memby maĩrã hỹmarĩrõ retarã, hairetapo tynonde opa ñonoshu mba'etyshuare, hareka kyrãpo mbyhekoviajyshu tuure hareka ishyre japohe vekua. Shara kova haikavi hareka mbyhory Tũpa.

⁵ Taupe ĩme manoshia ãñete hã'ẽĩ pytava hãrõ Tũpa, jurureshu mbory verã arape hareka pyharekue.

⁶ Tẽvã taupe ĩme manoshia vya verãĩ pya mbijetaherã, manoma hykove ryheve.

⁷ Mbeu jyveshu reta kova mbai, mahẽ ijetaha porããhe retakui.

⁸ Opaite mborymbava hentarã, tynondeite'ẽ hoope'õre, ñomi jyrojakue hareka heko porã'ãĩteveshi Jesús jyrojambateriheare.

⁹ Taupe ĩme manoshia ñonoã verã hee kuatiape, rekopo 60 ãño hareka penteva kuimbai hyrekokuepo.

¹⁰ Tijykuaashi mbaikavi japova; jaishu mbykuakua kavi membyre, myvãhẽ kavi hentape mbuhupa, maĩkavirahe Jesús ryhevare mbai mba'etyreare, hareka mboryra iko'asyvare. Kyrã opaite mbaikavi japo vekuare.

¹¹ Tẽvã ĩme manoshiare kuñataĩteriare avytei tiñonoha kuatiape, hokava reta rãnga potama ynga rekojyrã mbijichejy Cristo.

¹² Kyrãrã ha'eire iñiñono jaheahe verãpe, shara pyrõjyhe ĩñee meẽ vekua tũpaope mba'apotẽ verã.

¹³ Hareka oparupi jyraha reta tijuparehupi, hareka ñatẽ'ỹ, ñee ryhevajy, opa mbaipe ichereii hareka jaitambaa rãĩmi heishu reta hapisha.

¹⁴ Hãme rãnga aipota ynga rekojy taupe ĩme manoshia kuñataĩteriare, tymemby hareka tingareko kavihe hoo, mahẽ ñanymorãmba'iare ijeta porãã'ihe retakui.

¹⁵ Shara ĩmema'ẽ taupe ĩme manoshiare syry ñandyheviva, oho verã Satanás haykue.

¹⁶ Ĩme'ẽ taupe jyrojava hentape ĩmereva ĩme manoshiarã tingarekohese, avy tyhãrõ tũpao mbory verã, kyrãrapo tũpao katu mbory ĩme manoshia ãñeteĩte mba'etyreva mboryshu verãre.

¹⁷ Opaite Jesucristo jy'tupao miñaka kavi'iare, mbyveteapo hareka hekopekavipo mbyhepyashu mbai japova rehe, tynondeite'ẽ Tũpa ĩñee mbeu'iare hareka pyrỹmboi'iheare.

¹⁸ Kuatia mbyparahava rãnga hei: “Avy jokuashi buey juru, ndekope'iava jykyiteri'ẽrã”. Heiveejy: “Mba'apova rãnga, me'ãẽñoĩposhu japova hepykue”.

¹⁹ Avy rojande Jesucristo tũpaope miñaka'ia he'iaheva, mba'ety mokue maĩrã mbahapy heshavarã.

²⁰ Hãrã mbai porãmba ĩmeĩñoĩte japo'iare heheishu hetavare hỹnonde, hãrãpo henduvare kyje jyvekui.

²¹ Airurende Tũpa hỹnonde, Jesucristo hỹnonde hareka Tũpa jokueva pyhỹrõvare hỹnonde, hekope kavi rijapo verã kova mbaire, mbavamba rĩmbijicheva.

²² Avy are'ãĩte ñono ĩãrẽ ndepo rỹmbyhee verã tũpaope mba'apo verã, ndypya rĩmbijeta kavimba terivape. Avy mi'ĩrũhe mbai porãmba japo'iare. Ñyngareko ndijehe ndykove kyamba verã.

²³ Ndypya hasy'irã hareka nymbairasyñoĩrirã avy yyiñoĩte heu, vinopo mishiĩ reu jyve.

²⁴ Ĩme'ẽ mbai porãmbava japo'ia, ndeiteri ma'ẽhã'ẽhẽrãvãĩ jykuaaheva, tẽvã ĩme'ẽjy mbai porãmbava iko marãmeĩ ajera heshahava.

²⁵ Kyraĩ jyve mbaikavi japoa vekua ijyhesha jyve, ajemaĩ ĩme'ẽ heshahamba, tẽvã mbai porãmba yngavare japova katuãpo opa ara ñomire.