1 Timoteo 4 - NandevaBiblia

Pyrỹmbo'eahea ãñetembaa vekua

¹ Espiritu Santo rãnga hei kavi, ara japyape vãhẽserimarã, ĩmepo'ẽ poi jyrojaheva Tũpa, tykove japuvare heiva hẽnduposhu hareka japoposhu retakui mbaiposhyre pyrỹmboiheva.

² Japoposhu kuaretare hova mokue'iare hareka japuvare heiva, katuveãma ñynotivare.

³ Haire potããpo mbava omendashi, hareka ĩmepo'ẽjy potamba ho'uashiare. Tẽvã Tũpa opaitevamba japo ho'uavare jau verã, hareka pya kavi'õ ryheverã. Opaiteva ñande jairojaheare pevarã japoha hareka jaikuaa añeteva.

⁴ Opa mbai Tũpa japova rãnga haikavi, hãrã mba'ety mbaiva ñamomboshi verã, ñandypya haikavi'õ ryheve jaurã.

⁵ Shara Tũpa ĩñee hareka ñaĩmboiva rupii opaite ho'uavare haikavi'ẽ Tũpa hỹnonde.

Jesucristo jokueva haikaviva

⁶ Kova rỹmboihe ñandyryvy retarã, haimapo ndekui Jesucristo jokueva haikaviva, ñee pyrãtava jyrojakuepe hareka nymbo'eahea haikaviva rehorihevape.

⁷ Hãrã mbijiche ndijuhuvi ñee kuareta juru porãmba ryhevare hareka ñeereiva taupe kuakuava mbeuva; kyrãtẽ verã, ñymypyrãtakatu tykove mbijicheava Tũpa pevarãpe.

⁸ Ãñete rãnga ndyrete ñumungueva mbaivape haikaviñoĩ, tẽvã tykove mbijicheava Tũpa pevarã opavaretape haikavi, shara ĩmere ñee me'ẽãva tykove ã'ẽ pevarã hareka tykove ou verãpe.

⁹ Kova rãnga hai ñee añeteva hãrã opavare katu roja.

¹⁰ Ha'erãveĩ rãnga ñamba'apo hareka ñañehãã ñandijehe he'iha'i ñandeape, shara jairojahe Tũpa hykove'ia, hai hokava opava retape mondojepe verã, tynondeite'ẽ opaite jyrojaheare.

¹¹ Pyrỹmboihe kova hareka opaiteva ereshu reta japo verãre.

¹² Avy mbava ndyreshatãti nukunumiteterirã, tiko ndyhevi heshaha verã Jesús ryhevare mbai haikaviva japoa verã, rijeta hareka rikova rãĩmi, jyhaihukue, jyrojakue hareka ndyreko kyambavape.

¹³ Ahapeve, iko mbijetashu kuaretare Tũpa ĩñee, mboihe hareka mykyrẽyshu reta.

¹⁴ Ñyngarekohe mbai rikatu rijapova Tũpa meẽ nde vekua, Jesús jy'tupao miñaka'iare ipo ñono neãrẽrã vekua. Espiritu Santo kyrã heishu retarã.

¹⁵ Ndypya mbijeta katuhe kova mbai hareka kyrã japo, opavare hesha verã marãra haikavi rehori.

¹⁶ Ñyngareko ndijehe marãra riko hareka rypyrỹmboi, jytaso katu kova mbaipe.