1 Timoteo 2 - NandevaBiblia

Ñymboi ryheva

¹ Tynondeite, tirureha'asyhe, timbo'eahe, tirureahe opaiteva kuaretare, hareka tyme'ẽãshu vy'akue opaiteva kuaretare rehe,

² tirurehahe opaite huvisharã'õre hareka opaite mbai miñaka'õre, jaiko verã pya vapype hareka ñyrãrõmbape, tykove mbijicheavape Tũpa pevarã hareka ñee ñahendushu Tũpa.

³ Shara kova hai haikaviva hareka mbyvyava Tũpa Ñanymondojepeva,

⁴ shara hai pota opaite kuaretare ohojepe, hareka kuaa kavive añeteva ryheva.

⁵ Tũpa rãnga penteĩ'ẽ, hãrã penteĩ'ẽjy mbi'iko kaviva kuaretare Tũpa hãndi, Jesucristo kuaretaĩva jyve.

⁶ Jesucristo meẽmba hykove hareka manomba opava kuaretare mbyhepyrã mondojepe verã, hãrã kova mbe'uhava jy'arape kavi ijeshaka.

⁷ Ha'ẽrã rãnga shiñonoha añimiñee'ai verã hareka Apostolrã, hejahashe amboi verã jyrojakue ryheva hareka mbai añeteva ryheva, opaite Judiomba retape. Añetevape hai kova, ha'ẽã shapuva.

⁸ Hãme rãnga aipota kuimbaire oparupi timbo'e tuhupi ipo kyambava, poshymbape maĩrã yngavare ijakamba hãndiape.

⁹ Kyrã jyve taupere ñimimonde kavipo, pyrỹmymarãkambape, hareka ñymymashiã jyvyĩmbape, avy tivavarehe ñakahaa maĩrã ita verapy, perla, mondeava hepyva retape.

¹⁰ Tijeva jyve mbai kavi japovapy, hãrõashiva rãĩmi kuei taupere Tũpa jokuerevare.

¹¹ Taupe chĩrĩrĩvapeĩ tyhendu mbo'ehahea, mbaimba heivape.

¹² Taupe ahejããpo pyrỹmboi, maĩrã kuimbai ĩãrẽve'i verã, jasakaĩpo'ẽ hai.

¹³ Shara Adán rãnimba tynonde japoha, taykueimba Eva japojy;

¹⁴ ha'ẽãmba Adán mbytavyhava, taupe rãngamba, mbytavyamarã oamba mbai porãmbape.

¹⁵ Tẽvã taupe ohojepepo membyrã, jyroja katurã, ẽẽ jyhaihukueperã hareka heko kyamba ñakapory kaviva ryheve.