1 Tesalonicenses 5 - NandevaBiblia

¹ Mbaipera vãhẽpo ara hareka mbaipeitera shyryvyre, katuãny mbyparahape kuatiape.

² Pee rãnga pikuaa kavi Ñandeja oujy verã ara, vãhẽpo hãrõãveãma'ẽrã, manarõ'ia ouva rãĩmi pyntumarã.

³ Kuaretare heima jyrerã: “Haikavi rãnga ñaĩ hareka mba'ety ñanymbyvyamba'õ”, haivi sapy'aĩpo vãhẽ ĩãrẽ reta ñehũndivasu, taupe purua'ia vãhẽshua rãĩmi mbai hasykue, hãrã mba'etypokui ñemishi verã.

⁴ Tẽvã pee shyryvyre pimeã pẽĩ pyntuape, pyndysapya verã Ñandeja jy'ara, ouva manãrõ'ia rãĩmi.

⁵ Opaiteva rãnga pee mbai sapeka hareka ara kõĩvapeva. Ha'eã ñande pỹntu hareka timimbiape'õ;

⁶ hãrã avy jache yngavare rãĩmi, jasareko hareka jaiko hekope kavi.

⁷ Opaiteva ocheva reta rãnga, oche pyharekue, hãma kau'ia retany pyharekuẽĩ kau.

⁸ Tẽvã ñande ara kõĩvape jaiva, opa arapo haikavi jaiko. Jaijochapopy jyroja hareka jyhaihukuepy, syndaro ijochapya rãĩmi pitiaipi, ñymyhẽva'õ ñyrãrõ verã, syndaro ñãka jochapya rãĩmi ñañõno ñandijehe ñyhãrõ hareka ohojepea ryheva.

⁹ Shara Tũpa ñanyrẽnoã ity ñaneãrẽ verã ñunũpa vasu, koñeĩ jahajepe verãĩ Teja Jesucristo rupii.

¹⁰ Jesucristo rãnga mano ñandyrehe, ñandyrykovepe maĩrã ñamanomarã, jaiko hãndi verã.

¹¹ Hãrã piñymykyrẽỹ hareka piñymyhãtangatu pijupe, kueĩpi pijaposea rãĩmi.

Pablo mbarakuaa Cristo jyrojaheare

¹² Shyryvyre jurureape, pyreko verã ñymbyvete pynymbytepe mba'apo'ia, pyndyraha'ia Tũpa kyty hareka pynymbarakua'ia.

¹³ Pymbyvete hareka pyhaihuposhu heta mbaikavi japova rehe. Pyndypya kavi ijupe.

¹⁴ Jururehape shyryvyre, pijeta pohyshu verã hekope kavi ñatẽỹ mba'apovare, pymykyrẽyjy ñatẽỹmaheare, pymbory jyrojape kangyvare hareka opavare pyhãrõkuaashu.

¹⁵ Pingareko kavi avy mbava tymbyhekoviashu yngava porãmbape. Kyrãtẽ verã; piñyhãpo haikavivaĩ pijapo ijehe hareka opava retare.

¹⁶ Pyvyañoĩpo.

¹⁷ Opa ara pirure.

¹⁸ Pymeẽshu Tũpa pyndy'ajetekue opa mba'ere, hokava rãnga hai pota pyndyheviva, pee pyrojava Jesucristo.

¹⁹ Avy pymbove Espiritu Santo hata.

²⁰ Avy pijahehe iko verã mbeu'ia.

²¹ Oparãni pikuaakavi, hareka pymymbyta pijehe haikavivare.

²² Pijyhekyshi opaite mbai porãmba vekua.

²³ Tũpateiva, pyavapy Tũpa ña'ãpova, pynymbyheko kavi hareka tiñono kavi pyndyrykove, espiritu, pyndykove hareka pyndyrete, kyambape'ẽ verã, Teja Jesucristo oujyrã verã.

²⁴ Ko pynyrẽnova rãnga hai jyrojahahea, hãrã kova mbai hekope kavipo opa japo.

Ñymarãndu opahea

²⁵ Shyryvyre, pirureve yryrehe.

²⁶ Pymarãndu opaite ñandyryvyre, ñyhẽtu kyambapy.

²⁷ Airurepe Tũpa heepe, pimbijetashu verã ko kuatia opaite ñandyryvyre.

²⁸ Ñandeja Jesucristo tiñohẽ pyndyrehe mbai kavikue. Amén.