1 Tesalonicenses 4 - NandevaBiblia

Tykove Tũpa mbyhoryva

¹ Ã'ẽ, shyryvyre jurureha hareka pymykyrẽ'ỹha Ñandeja Jesús heepe; pupuãve pekua opa ara teko haikavivape pikuava rãĩmi, pymbyvya verã Tũpa, pijapoma pẽĩva rãĩmi.

² Pee rãnga pikuama pijapo verã, me'ẽãpe vekua Ñandeja Jesús ñymbaikatu rupii.

³ Shara Tũpa potava hai tykove kyambava, hareka avypo mbava javasa'i,

⁴ pepenteĩ tĩngarekohe hete, heko kyambape hareka mbyvetevape.

⁵ Avy piko pyndavasapi hareka porãmba pipota pijapo, kuareta Tũpa kuaambare rãĩmi.

⁶ Avy mbava kova mbai rehe tijapo mbai porãmba hareka tymbytavy hapisha, shara Ñandeja purũnũpa kova mbai rehe, pyndyrykyjehava rãĩmi.

⁷ Shara Tũpa ñanyrẽnoã ñandyrykove ñamyngya jai verã, ñandyreko kavi verãĩ rãnga.

⁸ Hãrã mbijicheva ko pyrỹmbo'eahea, mbava kuimba'epeã mbijiche, Tũpateiva rãnga, meẽpe vekua je Espiritu Santo.

⁹ Jyhaihu ryheva ambyparããnype kuatia, shara Tũpateiva pynymboihe marãrapo pepenteĩ pijyhaihu.

¹⁰ Kyrã rãnga pijapohe opaite pyndyryvyre ẽẽva tenta Macedoniape. Tẽvã jururehajype shyryvyre pijyhaihukue tupuãve toho opa ara.

¹¹ Peñehãã piko kavi hareka pijapo peii pijapo verã, pymba'apova rupii, jurureapeva rãĩmi.

¹² Kyrãrãpo mbai vasuva rãĩmi pindijapo haimba ñandyryhevare, hareka ĩmeñoĩpopyre maĩnunga.

Ñanderu Jesucristo ou verã jy'arape

¹³ Shyryvyre, potãã rãnga pypyta pikuambape mbaivara ikoshi manovare, mahẽ pyvy'ãã jyve, mbaimba hãrõ'õre rãĩmi.

¹⁴ Kyrã jarojava rãĩmi Jesús mano hareka kuerajya manovare mbyteivi, kyrãĩ jarojajy Tũpa mbyhykovejy verã Jesús hãndi; jyroja ryheve mano vekuare.

¹⁵ Hãrã he'iape, Tũpa pyrỹmboiva rãĩmi, ñande ñandyrykoveteri jaiva Ñanderu oujypeve, ñañymytynondeaposhi mano vekuare.

¹⁶ Shara hỹnatupo iñyhendu pente ñee, Tũpa jokueva ĩñee hareka ñimimby ipukue, hãrã vate araivi Tũpateivapo vejy. Hãma Cristore jyrojava mano vekuare, hai reta rãnipo kuerajy;

¹⁷ haivi, ñande ñandykoveteri jaiva, ñandyrahapo hãndi ãvãpyntupy, jajyhesha hãndi verã Ñandeja vate arapy, kyrãpo ñaĩme hãndi Ñandeja opa ara pevarã.

¹⁸ Hãrã kova ñee rupii piñymykyrẽy.