1 Tesalonicenses 3 - NandevaBiblia

¹ Hãrã, katuveãma ijijokoha potaite mbai kuaahajy pyndyhevirã, he'iha pytaha verã Atenaspe,

² hãrã mondoha pẽĩvape ñandyryvy Timoteo, hai rãnga jyve Tũpa jokueva hareka ỹrymbory'ia Ñee kaviva Cristo ryheva mbe'ua verã. Mondohape pynymykyrẽỹ verã hareka pynymbory verã tãntapeĩ verã jyrojakuepe,

³ potãã peeva hasa'asy ẽrã poi jyrojarã. Shara pikuaa kavi kyrãñoĩ jahasa verãrã.

⁴ Shara ĩmehãteri'ẽ pynymbyteperã mbe'uhavaĩpe jahasa'asy verã. Hãma kyrã jehu, pikuaamava rãĩmi.

⁵ Hãme rãnga, katuveama ãhãrõrã ãmondo Timoteo, shara aipota aikuaa ĩmeĩrateritẽ piroja. She rãnga akyje Ãña japokajype verã mbai porãmbava hareka opaite pyhejareijy verã japoha pyndyrehe vekua.

⁶ Hãma ã'ẽ Timoteo oujyma Tesalonicaivi hareka mbeu'ore pee pijaihurã hareka poiã pirojarã. Hãma heijy ore jyhaihukue ryheve pynymandua yryreheva hareka pipota yryreshava, ore pota pyndyreshahava rãĩmi.

⁷ Hãrã, shyryvyre opaite yrypya vyamba hareka mbai hasyva mbytepe, yrypya kavi õĩha kuaahama pee tãntapẽĩ pirojakueperã.

⁸ Kuaahama tãnta pirojahe Ñandejarã, ñanduhajy pyrãtakue ikohaĩteri'i verã.

⁹ Hãmerã, marãvepo me'ẽhajy yry'ajete Tũpape pyndyrehe hareka heta vy'akue pymeẽ ore vekua hai hỹnonde?

¹⁰ Arape hareka pyharekue jurureha Tũpape pyndyreshahajy verã pynymboryhahe verã pirojakuepe mba'etypeva.

¹¹ Tũpateiva hareka Ñandeja Jesucristo, typea ore tape ohoha pyndyreshahajy verã.

¹² Hareka Tejapo japo pyrehe pijaihuve peho verã hareka opaitevape pyhaihu verã, ore pyndyraihuhava rãĩmi.

¹³ Hãma jururehajyshu Ñandeja Jesús meẽpe verã pyrãtakue piroja kavihe verã Tũpa, meẽpe verã pente pya kapyryva hareka kyambaa. Kyrãpo oujyma hãndi opaite henta'ĩrũ kyambaare pyhỹrõva retarã, mba'etypo porãmba he'iha pyndyrehe verã Tũpa hỹnonde.