1 Tesalonicenses 1 - NandevaBiblia

Pablo ñymarãndu ryheva

¹ Ore, Pablo, Silvano hareka Timoteo, mbyparaha ko kuatia ñandyryvyre tũpao tenta Tesalonicape'õre penteapeĩ ñynoĩheva Tũpa Teru hareka Ñandeja Jesucristo. Tũpa tymeẽpe pyavapy hareka mbai kavikue.

Jyrojakue heshakava Tesalonicape'õre

² Me'ẽhãñoĩ pyndyrehe yry'ajetekue Tũpape, hareka ñymbo'eharã mandu'ahañoĩ pyrehe.

³ Yrỹmanduañoĩ pyrehe ñanu Tũpa hareka Ñanderu hỹnonde marãra jyhaihupe pymba'apo hareka marãra pirojaiterã hetavape pymbory, hareka marãra pyharõkuaa Ñandeja Jesucristo.

⁴ Shyryvyre Tũpa haihuvare, kuaaha rãnga hai pynypyhỹrõrã.

⁵ Shara mbe'uhape Ñee kavivarã, ha'ẽã ĩrĩñeepeĩ japohava, Espiritu Santo ñymbaikatupy hareka jyrojakue ryheve rãnga. Pee pikuaa kavi marãra ikoha pynymbyteipi, pyndyraihuhaiterã.

⁶ Pee pikojyve ore ikohava rãĩmi hareka Ñandeja rãĩmi, Espiritu Santo meẽpeva vy'akue ryheve, ajemaĩ heta piko'asy.

⁷ Hãme rãnga iko pyndyhevi heshaha verã opaite Jesucristo jyrojahevare pevarã ikova tenta Macedonia hareka Acayape.

⁸ Pyndyhevi õñepyrõ Ñandeja ĩñee mbe'uha rahaha, ha'eã Macedonia hareka Acayapeĩ, oparupi rãnga, hareka opa kuaaha jyrojakue ĩmepyreva Tũpare, hãrã katuveãma mbaiva he'ihajype.

⁹ Hai retateiva mbeu marãra pee ỹrỹmyvãhẽ kavi, hareka mbeu reta marãra ta'ãnga pypoi pemombai Tũpa jykoty peijy verã, hai potava pijapo verã Tũpa manombava hareka añeteva,

¹⁰ hareka pyhãrõ vate araivi Tay Jesús, hai Tũpa mupuãjy vekua manovare mbyteivi, Jesús hai ñanymondojepeshi vekua jaheha pyryreheva jy'ara ou verãivi.