1 Pedro 3 - NandevaBiblia

Teme hareka tyreko japo verã

¹ Kyrãmi jyve pee tyrekore, piñyñono pemere ipope ĩme'ẽ pente teme rojambava Tũpa ĩñee, mbaimba heivape, pee pikova rãĩmipo pymbaky jyveshu retakui.

² Heshama pyndyreko kavirã hareka pymbyveteshurã.

³ Avy yngavare hesha veraĩ piñymymashyã, opaisharei ijakatuva, ita vera mashyãvapy maĩrã mondeava hehepyva.

⁴ Katynga pymymashyãpo pyndypya ñemiãpe'õ mbai haikaviva ñymbaimba, espiritu pyryhaihuva hareka pyavapyva ryheva, hokava rãnga haikavi Tũpa hỹnonde.

⁵ Kyrãmba ñymymashỹã arykai taupe heko kyambare, haire jyrojambahe Tũpa hareka opa mbaipemba japoshu imere heiva.

⁶ Kyrãmba Sara ñee hendushu Abraham, hãrã henorã heimbashu “sheja”. Hareka pee hai memby kuñare, kyjembape pemere japotẽ verã.

⁷ Pee jyve temere, piko handi arãndupe, shara pymbyvetepo jyveshu vaso tantambava rãĩmi, tẽvã hairetape Tũpa hei meẽshu verã tykove opamba. Kyrã pijaporã Tũpa hendupo pirurerã.

Cristo jyrojaheare japo verã

⁸ Koñemahea pikojipive pentepyape, pipareko, pijyhaihu pente'ovare rãĩmi. Pypya kavi hareka avy pijijapo.

⁹ Avy porãmba japo pyndyreheva, porãmbavaĩ pijapo jyvehe, ĩme'ẽ poshypearã avy ndyposhy jyveshu, kyrãte verã pehovasashu ñeekavipe, shara ha'erã ñanyrẽnoha japity verã ma'ẽãkavi ñandyrehevape,

¹⁰ shara: “Hykove pota haihuva hareka ara kavi pota heshava, avy tijeta porããhe yngava hareka avy añetembava tymbeu,

¹¹ tyheja mbai porãmba hãrã tijapo haikaviva. Tyheka pyavapy hareka tiñyhãã tingarekohe.

¹² Shara Ñandeja hesare ñono'ẽhe hekopekavi'ia hareka japysare hendu jurureshurã, tẽvã Ñandeja ñymbyvaishohe porãmba japo'iare”.

¹³ Hãrã, mbavarapo porãmba japo pyndyrehe, potañoĩ pijapo haikavivarã?

¹⁴ Tẽvã pyvy'apo pyhasa'asypi mbai hekope kavi'õ pijapopirã, hãma avy pykyjeshi reta hareka pynymyngyje,

¹⁵ koñeĩpo, pyndypyaivive pemombaishu Cristo Teja rãĩmi. Tantakatupẽĩ pembohovai verã pyrãnduhape pyharõpeĩva reherã.

¹⁶ Tẽvã pijapo peñemomishĩvape hareka ñee henduvape. Piko pypyavapy ryheve, hãrãpo ijeta porãmbahea pyndyreko kavi ĩmepyreva Cristo pirojaherã, ĩñe'ẽkue rehe ñymymarãka retakui.

¹⁷ Tũpa kyrã potarã, haikavive jahasa'asyhe mbaikavi jajaporã, porãmba jajapotẽ verã vekuaivi.

¹⁸ Cristo manojyve mbai porãmba jajapova rehe. Hai mbai porãmba japombatẽva, ñañarõva rehe hasa'asy, pyndyraha verã Tũpa ẽvãpe. Hai mano hetepe hareka kuerajy Espiritu rupii.

¹⁹ Espiritu rupii oho hareka ñimiñeeshu espiritu mbyperesohavare.

²⁰ Haire ñee henduã reta aryka'e, Noé ikoteri'irã, Tũpa ñyhãrõkuaa ryhevepe hãrõtẽva, japohateri'ẽ varko vasurã. Koñeĩ 8 kuareta ohojepe yy rupii.

²¹ Hareka hokava yy heshaka ã'ẽ japoryva ñaĩmyngarai verã, hai rupii Tũpa ñanymondojepe. Ñymyngarai ha'ẽã mbai kya opama ñandyreteivi hekyva, he'iseĩ mbaikuaakue kyamba Tũpa hỹnonde. Jesucristo kuerajy rupii veru ñande pyrỹmondojepeva;

²² haivi hai jupi vate arape hareka ĩme'ẽ Tũpa jakata kyty. Tũpa jokuevare ĩãrẽve ẽẽ verã hareka opaite espiritu mbaikatu ĩmerevare.