1 Juan 5 - NandevaBiblia

Jaikopo jyrojakuepe

¹ Opaite rojava Jesús haiva Cristo, ikoshi Tũpa tay, hareka opaite Teru haihuva, haihuĩ jyve hokava Teru tayre.

² Tũpa jahaihurã hareka jajaposhu hai ñono ñandevarã, jaikuaa jahaihuva jyve Tũpa tayre.

³ Jahaihu Tũpa he'ise jajaposhu hai potava; hareka hai potava ha'ẽã javaii jajapova.

⁴ Shara opaite Tũpa tayva, jepymahe porãmba ko yvy'ĩãrẽ. Jairoja rupii opa jajepyhe porãmba vekua.

⁵ Opaite rojava Jesús haiva Tũpa Tay, jepyhe ko yvy'ĩãrẽ'õ.

Espiritu Santo japova

⁶ Jesucristo ourã vekua ijeshaka tuvy hareka yy rupii, tẽvã ha'ẽã yypeĩva, yy hareka tuvy rupii jyve, Espiritu rãnga mbeu kova, shara Espiritu hai añeteva.

⁷ Mbahapy rãnga'ẽ kuaakava kova mbai vate arape: Teru, Ñee hareka Espiritu Santo; hareka kova mbahapy'õre hai pentevãĩ.

⁸ Espiritu, yy hareka tuvy, kova mbahapy'õre penteva ñeepẽĩ ñynoĩ.

⁹ Jaroja rãnga kuaretare heiva, tẽvã jarojaiteve hai Tũpa heiva, shara hai mbeu Tay ryheva.

¹⁰ Hãma Tũpa Tay rojava reko pyape kova mbe'uava. Ĩme'ẽ Tũpa rojambavarã, mbijapuma Tũpa, shara rojaã ñee Tũpa mbeuva Tay ryheva.

¹¹ Hareka kova hai ñee: Tũpa meẽ ñande tykove opambava hareka hokava tykove ẽẽhe Tayre.

¹² Tũpa Tay ĩmereva, ĩmere tykove, tẽvã Tũpa Tay mba'etyreva, mba'etyre tykove.

¹³ Hãme ambyparape kova mbai opaite jyrojaheva Tũpa Tay, pikuaa verã ĩmepyreva tykove opambava.

¹⁴ Ore jyrojahahe Tũpa, shara jaikuaa hai potava rãĩmi jairureshurã, hai ñanyrẽndu.

¹⁵ Hareka jaikuava rãĩmi Tũpa ñanyrẽndu jairureshurã, hãrã jaikuaajy ĩmemajareva jairureshuva.

¹⁶ Ĩme'ẽ hesha tyvy jyrojava jyve japo pente mbai porãmba ñymanope pyryrahambavarã, jururepo'ĩãrẽ hãrã Tũpa meẽposhu tykove hokava kuareta, ha'ẽã mbai porãmba ñymanope pyryrahavarã. Ĩme'ẽ pente mbai porãmba ñymanope pyryrahava, hareka she ha'ẽãpe pirure'ĩãrẽ verã kova mbai poramba japovare.

¹⁷ Opaite hekopemba'õ rãnga hai mbai porãmba, tẽvã ĩme'ẽ mbai porãmba ñymanope pyryrahambaa.

¹⁸ Jaikuaa rãnga Tũpa tayre, japoveãma mbai porãmba, shara Tũpa Tay ñyngarekohe, hãrã Ãña katuveãma pokohe reta.

¹⁹ Jaikuaa ñande hai Tũpa ña'ãpova hareka opaite ko yvy'ĩãrẽ'õ Ãña ipope'ẽ.

²⁰ Jaikuaa kavijy Tũpa Tay ouva hareka meẽ ñande mbaikuaa jaikuaa verã Tũpa añeteva hareka ñande ñañymypente hãndi verã Tay Jesucristo. Hoka'ẽ Tũpa añeteva hareka tykove opambava.

²¹ Shyrayre ahaihuva, pysyryshipe tũpa rã'ãngare.