1 Juan 4 - NandevaBiblia

Tũpa tayre añeteva

¹ Shyryvy ahaihuvare, avy pyroja opaite hei ijeheva Tũpa rupii ijetava, tynondepo pikuaa kavirãnishu, pyhesha verã añetera hai ĩmere Espiritu Tũpa ryheva. Shara yvy'ĩãrẽ tynyhe Tũpa ĩñee mbeu rã'anga'iare.

² Kyrãpo pikuaakui haira Tũpa ijespiritu; opaite kuareta heiva Jesucristo ouva kuareta rãĩmi ko yvy'ĩãrẽ, hokava hai Tũpaivi ouva.

³ Opaite rojambava Jesús kuareta rãĩmi ou vekua, mba'etyre Tũpa ijespiritu; hokava hai Cristo ñymbyvaisho'ihea. Pee pikuama kova espiritu ouñoĩ verã, ã'ẽ ĩmema'ẽ ko'yvy'ĩãrẽ.

⁴ Shyrayre, pee rãnga hai Tũpa ryhevare, hãrã pijepymahe Tũpa ĩñee mbeu'ia japureivare shara pỹrãtave hai ẽẽ penendievare ko yvy'ĩãrẽ'õ retaivi.

⁵ Hai reta rãnga ko yvy'ĩãrẽ'õ ryhevare, hãrã haire ijetahe ko yvy'ĩãrẽ'õre, hareka yvy'ĩãrẽ'õ ryhevare hendushu haire heiva.

⁶ Ñande rãnga hai Tũpa ryhevare, hãrã katupo jaikuaa mbavara ĩmere Espiritu añeteva hareka espiritu japuva. Tũpa ryhevare ñanyrẽndupo, tẽvã haimba Tũpa ryhevare ñanyrẽnduãã.

Tũpa jyparekokue

⁷ Shyryvy ahaihuvare, jaijyhaihupaveĩ rãngapo, shara jyhaihu ou Tũpaivi. Opaite pyryhaihuva rãnga hai Tũpa tay hareka Tũpa kuaashu.

⁸ Hãma pyryraihumbava Tũpa kuãã, shara Tũpa hai jyhaihu añeteva.

⁹ Tũpa rãnga heshaka ñande jyhaihu, mbou Tay pentereva ko yvype, hai rupii ĩmẽjare verã tykove opambava.

¹⁰ Jyhaihukue añeteva rãnga hai kova: Ha'ẽã ñande jahaihuva Tũpa, hai rãnga tynonde ñandyraihu hareka mbou arykai Tay yvy'ĩãrẽ jukaharã rupii hejahareii ñandyhevi verã mbai porãmba jajapo vekua.

¹¹ Shyryvy ahaihuvare, Tũpa kyrã ñandyraihurã, jaijyhaihupaveĩpo jyve.

¹² Mba'etyiteimba Tũpa heshava, tẽvã ñande jaijyhaihurã Tũpateipo iko ñandypyape, hareka hai jyhaihukue jykuaakavi ñandyrehe.

¹³ Jaikuaa Tũpa hãndi ñaĩva, hareka hai ẽẽ ñandypyy, shara meẽ ñande je Espiritu.

¹⁴ Hãrã oretei heshaha, hareka mbe'uha Teru mbouva Tay mondojepe verã yvy'ĩãrẽ'iare.

¹⁵ Ĩme'ẽ heiva Jesucristo haiva Tũpa Tay, ikoma hãndi Tũpa hareka pyapere Tũpa.

¹⁶ Ñande jaikuaa hareka jaroja Tũpa ñandyraihuva, shara Tũpa hai jyhaihu añeteva, hareka Tũpa jyhaihukue pyape ĩmereva, Tũpa iko jyvepy.

¹⁷ Kyrãrãpo jyhaihu jykuaakavi ñandyrehekui, jakyjeveama verã pirĩmbivacheava jy'arape, shara Jesucristo iko vekua rãĩmi jaiko ko yvy'ĩãrẽ.

¹⁸ Jyhaihukue ẽvãpe mba'ety kyje verã, kyrãte verã jyhaihu opa kavi'õ mohẽ kyjekue. Kyje rãnga veru jepy'apy, hoka rehẽĩma kyjeteri'ia katũa pyryraihu.

¹⁹ Ñande rãnga jahaihu Tũpa, shara tynonde hai ñandyraihu.

²⁰ Ĩme'ẽ heiva: “She ahaihu Tũpa”, tẽvã tyvy Cristo jyrojahea heshatããrã, japureii'i. Shara tyvy Cristo jyrojahea heshareva heshatããrã, marãrapo Tũpapeĩ haihujy heshamba'õ?

²¹ Jesucristo heja ñande ko ñeẽ japoa verã: “Tũpa haihuva, tyhaihu jyve tyvy”.