1 Juan 3 - NandevaBiblia

Tũpa tayre hareka tajyre

¹ Pymaĩhe marãra ñandyraihuite Teru, japo ñanymbyheehapy verã Tũpa tay, añete hai ñande! Hãme rãnga ko yvy'ĩãrẽ'õ ñandykuãã, shara kuããshu reta Tũpa.

² Ahaihuvare, Tũpa tayretama rãnga ñande, ajemaĩ ijeshakããteri marãvãrapo ñandekui, jaikuaa Jesucristo ijeshakamarã Hai rãĩmindapo ñande, shara haiteivapo jaheshakui marãvara Hai.

³ Opaite Hai hãrõ'õ reta, ñymbyheko ky'ãpo, hai heko kyamba rãĩmi.

⁴ Opaite mbai porãmba japo'iare, japoãã Tũpa ĩñeepe heiva, shara mbai porãmba he'ise ñee hendumbaa.

⁵ Pee rãnga pikuakavi Jesucristo ijeshakamba hekyshi verã kuaretare mbai porãmba vekua, Hai mba'etyre hareka japoã hai mbai porãmba.

⁶ Hãrã ñymypente hãndiva japoveama mbai porãmba, tẽvã mbai porãmba japo'ia kuãã hareka heshããshu.

⁷ Shyrayre, avy mbava pynymbytavy, opaite mbai hekope kavi japo'ia heko jyvachema, Jesucristo rãĩmi.

⁸ Tẽvã mbai porãmbavaĩ japo'ia Ãña ryheva hai, shara õñepyrõaivive Ãña japo mbai porãmbava. Hokava rehe rãnga ou Tũpa Tay, opa mambai verã Ãña japovare.

⁹ Opaite Tũpa tayre japoveama mbai porãmba, shara Tũpa heko'ẽpy, hãrã katuveãma japo mbai porãmba, shara haima Tũpa tayre.

¹⁰ Kyrã ijykuaa mbavara hai Tũpa tayre hareka Ãña tayre, shara opaite mbai haikaviva japombava hareka tyvy Cristo jyrojahea haihumbaa ha'ẽã Tũpa tay.

¹¹ Kova ñee õñepyrõaivive pynymbo'eahe: Jajyhaihupo opaiteva.

¹² Avypo jaiko Caín iko vekua rãĩmi, hai rãnga tyvy juka, shara hai Ãña tay. Hareka mbaiva rehera juka? Shara Caín porãmba japo, hareka tyvy japo mbai haikaviva.

¹³ Shyryvyre, avy hãĩrã pyheshava rãĩmipi kuaretare ko yvy ĩãrẽ'õre pyndyreshatããrã.

¹⁴ Ñande rãnga jaikuaa jahasama ñymanoivi tykove kyty, jaikuaa shara jahaihu ñandyryvy retarã. Tyvy haihumbava ĩmeĩteri'ẽ ñymanope.

¹⁵ Opaite tyvy mymorãmbava hai puruka'ia, pee pikuaa puruka'ia katuãpo ĩmere tykove opamba.

¹⁶ Ñande jaikuakavi Jesucristo jyhaihukue, shara hai meẽ ñandyrehe hykove. Hãme ñandyryvy retare ñameẽpo jyve ñandyrykove.

¹⁷ Ĩme'ẽ ikokatuva hesha tyvy mbai mba'etyrearã, mba'ẽã meẽshurã, marãrapo Tũpa jyhaihukue ẽẽ pyape?

¹⁸ Shyryvyre, avy ñandijurupeĩ japyryhaihu, añeteape rãngapo japyryhaihu mbai jajapova rupii.

¹⁹ Kyrãvape ñande jaikuaa añeteĩtevape ñaĩrã, hãrã kyrãrãpo ñandypyavapyñaĩ Tũpa hỹnonde.

²⁰ Ajemapo ñandypyape'õ porãã ñaniñono, tẽvã Tũpa jyparekokue tivishaveshi ñandypyape'õ, hãrã hai opa kuaa ñandypyape.

²¹ Shyryvy ahaihuvare, ñandypyapy'õ ñaniñono kavi'ẽrã, jairojañaĩhe Tũpa.

²² Hãrã me'ẽãpo ñandekui opa mbai jairureshuva, shara jajaposhu hai potava hareka jajapo hỹnonde hai mbyvyava.

²³ Hãrã hai potava hai kova: Jaroja verã Tay Jesucristo hee hareka jaijyhaihupo opaiteva hai jurure ñandeva rãĩmi.

²⁴ Hãma japova hai heiva, haire ẽẽ ñynoĩhe Tũpa, hãrã haire ẽẽ jyvepy. Kyrã jaikuaa hai iko ñandypyape, Espiritu Santo hai meẽ ñande vekua rupii.