1 Juan 2 - NandevaBiblia

Jesucristo hai ñandyrepy'ia

¹ Shyray rãĩmire ahaihuva, ambyparape kova potãã porãmba pijaporã. Ĩme'ẽ mbava porãmba japovarã, ĩmejare pente ñanymbory'ia Tũpa hỹnonde, hokava hai Jesucristo, heko kaviva.

² Hai ñymeẽ ñandyrehe jukaha verã mbai porãmba jajapova hejareii ñandyhevi verã; ha'ẽã ñandeĩ, koñeĩ opaite kuaretare rehe jyve.

³ Haereka ñande jajapo Tũpa potavarã, katuma opa jajapo, shara jaikuaa kavi jaikuama jareshua.

⁴ Ĩme'ẽ heiva: “She rãnga aikuaashu”, hareka japoãshu hai heivarã, pente japuvama hareka mbe'uã añeteva.

⁵ Tẽvã ĩme'ẽ japoshuva hai potavarã, añeteĩte pya mynỹhe Tũpa jyhaihukue; kyrãvape ñande jaikuaa ñañymypentema hãndiva.

⁶ Heiva Tũpareĩ'ẽvã, ikopo jyve Jesucristo iko vekua rãĩmi.

⁷ Shyryvy ahaihuvare, kova ñeẽ japoha verã ambyparapeva ha'ẽã py'ahuva, jypyiterãvãĩ ĩmemapyre vekua rãngajy.

⁸ Katynga kova ambyparapeva pente ñeẽ japoha verã hai py'ahuva, hokava hai añeteva Cristore hareka pyndyrehe jyve, shara timimbi vekua hasama oho'irã, hareka sapeva añeteva mykõĩma'ẽ.

⁹ Ĩme'ẽ heiva sapeha'õvape aiko tẽvã tyvy mymorã'irã, ĩmeĩteri'ẽ timimbivape.

¹⁰ Tyvy haihuva pyrãta'ẽ sapeva mykõĩ ẽvãpe, hareka pyryhaihuva o'ãã hai mbai porãmbape.

¹¹ Tẽvã tyvy heshatãmbava ikoteri pyntuaipi, hareka kuãã matyra oho, shara timimbi vekua rehe katuã hesha.

¹² Shyrayre ahaihuva ambyparape kova mbai, shara Tũpa, Jesucristo rupii hejareii pyndyhevi mbai porãmba vekua.

¹³ Ambyparape terure, shara pikuaama jypyiterãvãĩ ẽẽ vekua. Kunumire ambyparape kova, shara pijepymahe mbaiposhy.

¹⁴ Ambyparape shyrayre ahaihuva, shara pikuaama Teru. Ambypara jyvepe terure, shara pikuaa kavima jypyiterãvãĩ ẽẽ vekua. Ambypara jyvepeje kunumire, shara pee pynypyrãta hareka Tũpa ĩñee iko pyndyrehe, hareka pijepyhe mbaiposhy.

¹⁵ Avy pyhaihu mbai porãmba japo'iare ikova rãĩmi ko yvy'ĩãrẽ, hareka avy pijapo haire japova, kyrãva japo'iare mba'etyre pyndyrehe Teru jyhaihukue.

¹⁶ Shara opaite ko yvy'ĩãrẽ'õ, tyroo potava, jaheshava jaipota, hareka hykovepe ikokatukue jyroja'iheare ryheva, ouã Ñandejaivi, koñeĩ yvy'ĩãrẽ'õ.

¹⁷ Kova yvy opa oho'i opaite poramba vekuare ryheve, tẽvã Tũpa potava japo'iare, ikopo opa ara pevarã.

Cristo ñymbyvaishohea

¹⁸ Shyray rãĩmire, vãhẽserima rãnga ara opa verãpe, pee pyhenduma ou verã Cristo ñymbyvaishoheva. Hãrã ã'ẽ hetama'ẽ Cristo ñymbyvaisho'iheare. Kyrãvape ñande jaikuaa vãhẽserimava ara opa verãpe.

¹⁹ Hai reta rãnga õhẽ ñanymbyteivi, tẽvã ha'ẽã ñandyryhevare, shara ñandyryheva retarã pytatẽ ñanendie verã, tẽvã kyrã jehu ijyhesha verã opaĩñoã ẽẽ ñanendievare hai ñandyryheva retarã.

²⁰ Tẽvã Cristo Kyambava meẽpe Espiritu, hãme rãnga opaiteva pikuaa añeteva.

²¹ Ambyparape kova kuatia, ha'ẽã pikuãã añetevarã, pikuaa rãnga jyve, hareka pikuaa mba'ety japuva õhẽ verã añetevaivi.

²² Mbavara japureii'iva? Heiva Jesús haimbava Mesías. Hai rãnga hokava Cristo hyvaishorãrea, shara ñomire Teru hareka Tyray.

²³ Opaite ñomireva Tyray mba'etyre Teru; hãrã ĩme'ẽ myvãhẽva Tyrayrã, myvãhẽ jyve Teru.

²⁴ Hãme rãnga avy poi pijapo aryka'e pynymbo'eahe vekua. Pijapoñoĩ peho pynymbo'eahearã, pẽĩñoĩpo hãndikui Tyray hareka Teru.

²⁵ Kova hai hei vekua meẽ ñande verã, tykove opambava.

²⁶ Ambyparape pikuaa verã ĩme'ẽ kuaretare pota pymbytavy'iare.

²⁷ Tẽvã pee me'ẽãpe Espiritu, Jesucristo meẽpeva rupii, hãrã katuã mbava pynymboijy, shara Espiritu hai meẽpeva opa mba'e pynymboihe, hareka hai pyrỹmboiheva hai añeteva ha'ẽã japureiiva. Piñymypente hãndi Cristo, Espiritu pynymboiva rãĩmi.

²⁸ Ã'ẽ shyrayre ahaihuva, piñymypenteñoĩhe Cristo, jairojahe verã hai ijeshakamarã, ñanymarãmbashi verã hai oujymarã.

²⁹ Pee pikuaa Jesús hykove kavivarã, pikuaapo jyve opaite japova mbaikavi oa Tũpaivi.