1 Juan 1 - NandevaBiblia

Ñee tykove ryheva

¹ Ore mbyparaha kuatiare ñee tykove ryheva, arykai jypyiterãvãĩ ẽẽ vekua, oretei henduhava hareka yryresa rupii heshahava. Shara ore ma'ẽãhe hareka yrepopetei pokoahe Ñee tykove ryheva.

² Tykove ijeshaka hareka ore heshaha, hai mbe'uha jyvepe tykove opambava ryheva Tuu ẽẽ hãndiva hareka ijeshaka ore vekua.

³ Hãrã ore heshahava hareka henduhava mbe'ua jyve pee piñimi'ĩrũ yryrehe verã, hareka ñanimi'ĩrũva Tuu hareka Tay Jesucristo handi.

⁴ Hãima kyrã mbyparahape kova mbai, opaiteva ñanytynyhẽ verã vy'akue.

Tũpa hai sapeva

⁵ Kova hai ñee henduashi vekua hareka mbe'uhape: Tũpa hai mbaihendyva hareka mba'etyhe pyntukue.

⁶ Tũpa reheĩ ãĩve jairã, hareka mbai porãmba jajapoĩterijairã, ñandapureii hãma añetembaveĩma ja'e.

⁷ Tẽvã jaiko hendyvaperã, Tũpa hendyvape ẽvã rãĩmi, pente pyapeĩmapo ñaĩ hãndi yngare, hareka Tay Jesucristo, huvy rupii opa ñandohe mbai porãmba vekuaivi.

⁸ “Mbai porãmba mba'ety areshe” ja'erã, ñandei ñañymbytavy hareka ñambe'uã añeteva.

⁹ Tẽvã Tũpa ñaimbeushu mbai porãmba jajapo vekua retarã, hai jairojaheva hareka hekokavi, hejareii ñandyhevi verã hareka ñandohepo mbai poshykueivi.

¹⁰ “Mbai porãmba jajapoã” jairã, ñambijapu Tũpa, hareka ĩñee mba'ety ñandypy.