1 Corintios 9 - NandevaBiblia

Apostolre ẽẽshua japo verã

¹ Ha'ẽãra she Apostol? Ĩmera'ẽ katumba ajapova? Aheshããra Ñandeja Jesús? Sheeãra apyrỹmbykuaaka Ñandeja?

² Yngavare pevarã ha'ẽãshe apostolrã, pee pevarã she hai, pee pyrojava añimiñeerã ambeuva pyheshaka she haiva Ñandeja jy'apostol.

³ Kyrã aijetashu ijeta'i shyrehevare.

⁴ Orera katuã karuha hareka ñymby'uha?

⁵ Orera katu'ãitei pysyha taupe jyrojava yryrekorã, ynga apostolre japova rãĩmi, Ñandeja tyvyre hareka Pedro?

⁶ Maĩrã she hareka Bernabé hãndira katuã ẽẽ yngavare ỹrỹmbory verã mba'apohamba irijupe verã?

⁷ Ĩmera'ẽ syndaro jykyrypotivi karu'iva ijokuekateri'ẽrã? Mbavarapo uva rẽndaivi ho'uã i'akue? Mbavara avisha ñyngareko'ihea houmbashia ñykamby ñamirãme?

⁸ Shijuhuvira haipe kova mba'e, he'iãra jyve Moisés mbypara vekuapy?

⁹ Shara Moisés mbypara vekuape hei: “Avy jokuashi buey juru, ndekope'iava jykyiteri'ẽrã” Tũpa buey ojepy'apyiteherãra kyrã hei,

¹⁰ maĩrã yryrehera hei? Ãñeteara yryrehe hei, shara, ikokue mungui'õ hareka trigo ñotyãva jykyi'õva harõ'ẽ me'ẽãshu verã i'akue.

¹¹ Ore ñotyhã pyndypyape Espiritu ryhevarã, hãmera katu'ãĩteipo hipityha jyve pyhevi ĩmepyreva ko yvy'ĩãrẽ?

¹² Yngavare katu hipity pyndyhevirã, hãmera ore katuã jyve? Katynga, poryhã'ore ko ẽẽte'oreva hareka ñimichirĩrĩhãĩte hasaha'asy oĩarã, mahẽ mbava porãã ijetahekui Ñee kaviva Cristo ryheva.

¹³ Pikuaãrakuei tũpaope mba'apova tũpaoivĩ karurãme hareka altarpe mba'apova hou reta mymba jukahava me'ẽãva Tũpape?

¹⁴ Kyrã he'ikajyveshu Ñandeja opaite Ñee kaviva mbeu'iare, hokava pijapovapei piko jyve.

¹⁵ Tẽvã mapeã kyrã ajaposhe hokava pynymbytepe, ha'ẽãvaĩjy kova mbai kyrã japoa shyrehe verã. Haikavive rãngapo she ãmanorã, ndei he'ia shyrehe kova Ñee kaviva ambeu'airã mbyhepyhasheva!

¹⁶ She pevarã arekoã mbaiva reherapo airoja'ai shijehe ambeu'ai kova Ñee kavivarã. Shara ha'ẽrã ñonohashe ambeuñoĩ verã. Tengaposhekui ambe'uarã!

¹⁷ Hãmeara, shykyrẽyvi ambeu'airã, me'ẽãposhekui ajapova hepykue. Shara pyrãnduhãã she shykyrẽyra ajapo, he'ia rãnga she ajapoñoĩ verã!

¹⁸ Hãrã she apityva hai meẽsheva vy'a hareka ambeu'ai Ñee kaviva mbyhepyambashevape, ajemaĩ ẽẽtesheva.

¹⁹ Ajemaĩ she haimbateã mbava jokuerea, opava jokuerea reta rãĩmi aiko. Hetavape apity verã Cristo pevarã.

²⁰ Hãme rãnga ãĩme'ãĩ Judiore mbyteperã, haire rãĩmi aiko jyve, aru verãre Cristo pevarã, hokava he'ise Moisés mbypara vekua japo'iare. Sheteiva rãnga ãñiñono jyve hokava mbypara vekua'ipe, ajemaĩ he'iambatẽsheva ajapoñoĩ verã, kyrã ajapo apity verã jyve Moisés mbypara vekuaĩ japo'iare.

²¹ Moisés mbypara vekua mba'etyreare, ãĩme'ãĩ hãndi retarã, haire ikova rãĩmi aiko jyve, ambory verã reta jyve jyrojahe verã Cristo. Kova he'iseã ajapombava Tũpa heiva. Mba'ety, ajapoñoĩ rãnga, shara ajapo Cristo heiva.

²² Pyrãtambavare mbytepe, aiko jyve pyrãtambava rãĩmi, aru verã reta jyve pyrãtambavare. Jaishu opaĩ añimbivache hãndi, a'ãmo ohojepe verã reta jyve.

²³ Opa mbai ajapo, ajapohe kova Ñee kaviva rehe, shara aipota apity jyve hai rupii sha'ãpova.

²⁴ Pikuaa jyve ñanivape ĩñoñokuevare, heta'ẽ ñaniva, tẽvã penteĩ'ẽ me'ẽãshuva maĩnunga. Hãrã piñyhããngatu pipity verã jyve me'ẽãpe verã.

²⁵ Opaite õñehãã verã, ijijokoshi porãmba japohe verã. Kova japo reta hipity verã korona me'ẽãva aremba ñymbaiva, tẽvã ñande ñañyhãã jahajaihe korona ñymbaimba verã.

²⁶ Hãrã she ãñanireiãã, mbaimba apity verã rãĩmi; hareka airãrõãvaĩjy yvytu nupa'iva rãĩmi.

²⁷ Kyrãte verã, amungungue shyrete hareka amiñerã japoshe verã, mahẽ yngava retape añimiñee aishuape, shimbijicheajykui.