1 Corintios 8 - NandevaBiblia

Ho'uavare mbijicheava ta'ãngare pevarã

¹ Ã'ẽ jaijetapohe ho'uavare ta'ãnga heepe me'ẽãva. Opaitevama ãmo jaikuaa hokava, shara heta mbai jaikuaava jairojahe. Tẽvã jyhaihukue hai ñanymypyrãtava.

² Ĩme'ẽ pente moãma opa mbai kuaavarã, nde'iave rãngateri opa kuaa, kuaa verã rãĩmi.

³ Tẽvã ĩme'ẽ Tũpa haihuvarã, hokava Tũpa kuaamashu.

⁴ Hãrã katura jau ho'uava ta'angape me'ẽãva? Jaikuaa kavi ta'angare mba'ẽã hai ko yvy'ĩãrẽrã, hareka penteĩ'õ Tũpa.

⁵ Ajemaĩ ĩmete'ẽ he'iaheva tũpare vate arape'õ, maĩrã yvy'ĩãrẽ (ãñete heta'ẽ “tũpare” hareka “tejare”).

⁶ Tẽvã ñande pevarã penteĩ'ẽ Tũpa Teru, haivi opa mba'e ñymoña hareka hai pevarã jaiko. Hareka penteĩ'ẽjy Ñandeja, Jesucristo, hai rupii opa mba'e iko, ñandeave jyve.

⁷ Tẽvã opaĩñoã kuaa kova mbai. Shara a'ãmore jypykuaahe ta'angareirã, houteri ta'angape me'ẽãva ho'uavare, hãrã pyape ñymyngya shara pyrãtãã.

⁸ Ha'ẽã rãnga jauva rupii Tũpa ñanymyvãhẽ verã, shara ha'ẽã jakarujairã haikavivejaiva maĩrã jakaruãrã porãmba'eitejaiva.

⁹ Pingareko kavi kova pyrekova pota pijapova pijaporã, mahẽ kova rupii pyrãtambateriare pitykui mbai porãmbape.

¹⁰ Nde opa rikuaava kova mbai reho ryvapy rykarurẽĩ ta'angarei omomba'ehaperã, hareka pente ñandyryvy pyrãtambateriva ndyresharã, katu hai ñymykyrẽy jyve hou verã ho'uavare ta'anga heepe me'ẽãva.

¹¹ Hãma kova mbai rikuaa vekua rehe, oajypo ñandyryvy pyrãtambateriva Cristo manohe vekuatẽ jyveva.

¹² Kyrã mbai porãmba pijapohe ñandyryvy jyrojakuepe pyrãtambaterivarã, Cristoretei pijapo mbai porãmba.

¹³ Hãrã hauva rupii ñandyryvy aitypotarã, haikavive penteã hau soo, mahẽ aityjykui mbai porãmbape.