1 Corintios 7 - NandevaBiblia

Arakuaa omendamavare pevarã

¹ Hãma ã'ẽ ambyhovaipope pymbypararã pypyrãndusheva, haikavivepo kuimbai pokoãhe tauperã.

² Tẽvã heta'ẽ kyrãrãĩ'ia retarã, haikavivepo kuimbai hyrekoĩ ĩmererã, hareka taupe ĩme hãndiipo iko.

³ Kuimbai japopo, japo verã hyreko hãndi, hareka kyrãĩpo jyve taupe ĩme hãndi.

⁴ Tyreko haiveãma hete ha'i ña'ãpova, shara hokava hai ĩme ña'ãpova, hareka teme haiveãma hete ha'i ña'ãpova, shara hokava hai hyreko ña'ãpova.

⁵ Hãma avypo pere pijupe potamba pypoko ijeheva. Tẽvã mokue ryhevepo piñiñono pente ñeepe, pypokombajy ijehe verã, mbovy ara pimboi verã. Hãma haivi katu pikojy ijupi, mahẽ Satanás pypya hããkui pijyjokoarã hareka pindirityjykui mbai porãmbape.

⁶ Kova arakuaa sheii ameẽpe. Ha'ẽã japoha verã, pijapoñoĩ verã.

⁷ Ãñete aipotatẽpo opaiteva kuimbaire she rãĩmijyree, tẽvã Tũpa pepenteĩ meẽshu japo verã. Penteva yngai japo, yngava yngaivejy, kyrã oho.

⁸ Ndei hyrekovare hareka ĩme manoshiare she pevarã haikavive pyta reta omendambape, she rãĩmi.

⁹ Tẽvã katuã ijijokorã timeĩ tyhekajy ñi'ĩrũrã, shara haikavive ñañimi'ĩrũjy, mahẽ ñanykyrẽ'ỹkue porãã ñandapokui.

¹⁰ Ñimi'ĩrũmavare ha'ekashu kova mbai, ha'ẽã she, Ñandeja rãnga: Taupe avy typoishi ĩme,

¹¹ tẽvã poishirã, avypo heka rekojy yngava, koñeĩpo heka iko kavijy hãndi verã ĩmekue; hareka kuimbai avy typoishi hyreko.

¹² Yngavare sheiipo haijyshu, ha'ẽã Ñandeja: Ĩme'ẽ ñandyryheva rekoreva pente taupe Jesús jyrojambahearã, hai potaite ikoĩ'i hãndirã, avy typoishi.

¹³ Kyrãĩjy ĩme'ẽ taupe ñandyryheva rekoreva pente jyrojambaarã, tẽvã kuimbai potaite iko hãndirã, avy typoishivi.

¹⁴ Shara teme Jesús jyrojambahea hyreko rupii kyaveãma, hareka tyreko Jesús jyrojambaheva teme rupii kyaveãma. Kyrããrã pindijapore kyava ryheva retambapo; tẽvã ã'ẽ kyaveãma reta.

¹⁵ Tẽvã tyreko, maĩrã teme jyrojambaa pota poijyhevirã, typoi. Kyrãrã jyrojava tiindy maĩrã, tykyvy pytajy omendambava rãĩmi, shara Tũpa piniñono pyavapy ryheve piko verã.

¹⁶ Shara nde taupe, marãira rikuaa, katu rỹmondojepe verã neme? Maĩrã, nde kuimbai, katura rỹmondojepe ndyreko.

¹⁷ Kyrãtẽ verã pepenteĩ Ñandeja memeẽshuare rãĩmi, hareka Tũpa hẽnova rãĩmi, kyrã tijapo; kyrã japo opaite tũpao retaipi.

¹⁸ Ĩmera'ẽ pire chĩchĩamashivape hẽnoãva? Kyrãĩ typyta. Ĩmera'ẽ pire chĩchĩambashia hẽnohava? Avy tichĩchika.

¹⁹ Pire chĩchĩãva mba'ẽã rãnga; hareka kyrãĩjy chĩchĩãmba mba'ẽãjy, koñeĩ haikavive jajapo ñeẽ japoa verã Tũpa ña'ãpova.

²⁰ Jypy Tũpa henorã vekua, ẽvã rãĩmipo pepenteĩ pyta.

²¹ Ndokuehareii'iapera nyrẽnoha? Avy ejepy'apy, tẽvã ẽẽ nde rẽhẽjy verãrã, avy javy hokava.

²² Shara jokuehareirea hẽnohã jyroja verãrã, ã'ẽ haima pente kuimbai mbaimba jocha'õ, mba'aposhu verã Ñandeja, kyrãi jyve hẽnoãrã jokueharea, ã'ẽ haima Cristo jokuereva.

²³ Tũpa rãnga hepyre pyndy'ova, hãrã avypo mbava pokuereii'i.

²⁴ Hãma, shyryvyre jypyite pynyrẽnoarã pẽĩva rãĩmipo pypyta Tũpa hỹnonde.

Arakuaa omendambateriare pevarã

²⁵ Taupe omendambaterivare mba'ety'are japoha verã Tũpa ryheva ambeushu verãre, tẽvã haiposhu reta, hareka katu piroja shyrehe, Ñandeja meẽshe shyparekorã jyrojaha shyrehe verã.

²⁶ She pevarã, haikavive pepenteĩ pyta õĩvã rãĩmi, shara ko ara jahasa jahava pohyiteve oho.

²⁷ Ĩmeryre ndyrekorã, avy poishivi; mba'etyryre ndyrekorã, avy heka ndyrekorã.

²⁸ Tẽvã omendava japoãpo mbai porãmba, pente kuiñataĩ omendarã, japo'ãĩ jyve mbai porãmba. Tẽvã omendamavare hetapo hasa porãmba vekua, hokava aipotãã pyhasa.

Cristo jyrojaheare iko verã rãĩmi

²⁹ Shyryvyre, aipota hai peeva rãnga hai kova: Mbovy araĩma hemby'ẽ ñande. Hãme rãnga omendavare tiko omendambava rãĩmi;

³⁰ hãma jaheo'õre, tiko vya'ia rãĩmi; vya'iare, tiko vyamba'ia rãĩmi; mbai ova'iare, tiko mbaimba ĩmereva rãĩmi.

³¹ Hãma maĩnunga ko yvy'ĩãrẽ'õva pory'iare, tiko pory kavimba rãĩmi; shara ko yvy jaheshañaĩva opaserima.

³² Potaitianynga apyryresha pejepy'apymbape. Hyrekombaterivare ñyngarekohe mbai Ñandeja ña'ãpovare, hareka heka marãrapo mbyvyashu.

³³ Tẽvã hyrekoma'iare ojepy'apyhe mbai ko yvy'ĩãrẽ'õ hareka marãrapo hyreko mbyvyashu.

³⁴ Kyrã mokue hendape jyvavy. Taupe ĩme'ia hareka nde'iave ĩmeva ojepy'apyhe Ñandeja ryheva, shara ky'ã'ẽ hetepe hareka hykovepe. Tẽvã taupe omendamavare ojepy'apyhe mbai ko yvy'ĩãrẽ'õre hareka heka marãrapo mbyvya ĩme.

³⁵ Ha'ẽã rãngape kova, potãã pijaporã, haikavipe verãĩ rãnga hareka kapyryĩ piko verã, pymba'aposhu verã Ñandeja pikoreiimbape.

³⁶ Ĩme'ẽ moã haikavishuva tajy omendarã, kyrẽyma omendarã, haikavimarã, tijapo hesha haikavishu verãrã, timi'ĩme, hokava ha'ẽã mbai porãmba.

³⁷ Tẽvã pya mbijeta kaviva, katutẽ japova hai pota japova, haikaviveposhu tajy mi'ĩmeãrã, haikavĩĩjy hokava.

³⁸ Kyrã mi'ĩmeva haikaviva japo, hareka mi'ĩmembava haikaviteveva japo jyve.

³⁹ Taupe omendava ĩme ĩmeĩteri'irã jypysyteri hãndi; tẽvã ĩme manomarã, hai ẽẽmajyshu yngava potava omendajyhe verã, hai jyve Ñandeja jyrojahearã.

⁴⁰ She pevarã haikavivepo ĩmeãjyrã, hareka aroja ĩme'areva jyve Espiritu Tũpa ryheva.