1 Corintios 6 - NandevaBiblia

Ñañono kavijy porãmba'ẽvãre ñanymbytepe

¹ Ĩme'ẽ peeva ijavy hãndiva yngavare, marã'ĩrãra ohopo jurureshu huvisha pirĩmbivache'ia hekope kavimba'ia, ñono kavijy verã, jyrojavare ẽvãpete oho verã?

² Pikuããra Tũpa jyrojahevare mbivachepo'ẽ opaite kuareta ko yvy'ĩãrẽ'õ retarãme? Hãrã ñande ñambivachepokui opaite kuaretarãra, marãrapo pimbivacheã ko ikovare mishĩĩva?

³ Pikuããra Tũpa jokueva retavepo ñande ñambivacherãme? Ñopỹĩñoara hai ko tykovepe'õ!

⁴ Hãrã ĩme'ẽ pynymbytepe ijavyva kova mbai yvy'ĩãrẽ'õ ryhevarã, marãrapo piñono haimba jyrojavare, pinimbivache verã?

⁵ Kyrã hai pee pynymarã verã: Mba'etyra pymbytepe mbai kuaamitẽva maĩhe verã kova jehuva jyrojavare mbytepe?

⁶ Katura jyrojavare ñymembeu reta pente pirĩmbivache'ia jyrojambahea hỹnonde?

⁷ Ãñete porã'ãĩte peii piko kaviã ijupi verã. Marã'ĩrãra ryhejaĩñoã ndeteiva ryhasa'asyhe mbai pente jyrojavaivi hekopemba'õ? Haikaviveãrapokui pyma'ẽĩhe pymbytavyharãme?

⁸ Kyrãtẽ verã, peave pijapo hekopemba'õ hareka pypyrỹmbytavy, hokava pijapo pyndyryvy retare.

⁹ Pikuããra porãmba japo'iare hipityãpokui Tũpa ẽvãpe'õ ryheva? Avy peii piñymbytavy, Tũpa vapy'õpe icheãpokui kyrãrãĩma'iare,

¹⁰ manarõ'iaretambaa, kateỹvaretambaa, kau'iaretambaa, jytaupe'ia retambaa, yngava hapisha ijeta'iheare, hareka pyrỹmbytavy'ivare, kyrãvare mbaveãpo ichekui Tũpa ẽvãpe.

¹¹ Ĩme'ẽ aryka'e pymbytepe kyrã'i vekuare; tẽvã ã'ẽ pyndykyaveãma Ñandeja Jesús heepe hekokavivamape, hareka Espiritu ñanu Tũpa ryheva rupii.

¹² Opa mba'e rãnga ẽẽshe ajapo verã, tẽvã opaĩñoã haikavi she; opa mba'e katu ajapo, tẽvã ama'ẽĩãpo kova maĩnungare jepy shyrehe.

¹³ He'ia rãngajy: “Ho'uava reta rãnga, ñandyrye pevarã, hareka ñandyrye ho'uava pevarã”. Ãñete rãnga hokava, Tũpa opapo mbaikui mokue'õre. Tẽvã ñandyrete ha'ẽã teko kyava pevarã, Tũpa pevarã rãnga hareka Ñandeja hai ñandyrete pevarã.

¹⁴ Tũpa mynguerajya Ñandeja Jesucristo, ñande ñanymynguerajypokui hai ñymbaikatukuepy.

¹⁵ Pikuããra pyndyrete haiva Cristo hete ryheva? Ahekyraposhi Cristo hete ryheva ãñonohẽ verã taupe heko porãmba hetere? Mba'ety!

¹⁶ Pikuãra kuimbai taupe kyrãrãĩma'ia iko'i hãndiva, ikoshi reta penteĩ hetepe? Shara kuatia mbyparahava hei: “Mokue'õre ikoposhi penteva kuaretaĩ”.

¹⁷ Tẽvã Ñandeja ñymypente hãndiva, mokue'õre ikoshi reta penteĩva hykovepe.

¹⁸ Piñymymbyryshi teko kyavaivi. Opa mbai porãmba vekua kuareta japova, hetereã japo, tẽvã omendambape kyrãrãĩ'iare, hetere japo mbai porãmba vekua.

¹⁹ Pikuããra pyndyrete haiva Espiritu Santo hoo, hai ẽẽ pyndypy, Tũpa meẽpeva? Hãrã pyndyrete haiveãma pa'ãpova.

²⁰ Shara Tũpa hepyre pyndy'ova; hãme rãnga pemombaiposhu Tũpa pyndyretepe hareka pyndyrykovepe, hokava reta hai Tũpa ryheva.