1 Corintios 5 - NandevaBiblia

Pente kuimbai javasa'ia

¹ Oparupi mbe'uha pymbytepe ĩme'ẽ ishy rãngai rekorevarã. Kova mbai rãnga porã'ãĩte, Jesús jyrojambaheare mbytepe ikoãhai kova mbai.

² Kova ryheveĩ pirojapi pindijehe, pymbasytẽhe verã! Hokava kuimbai kyrã japo vekua pymohẽpo pynymbyteivi.

³ Shara sheteiva ãĩmembatẽ'ãĩva pymbytepe, she espiritu ĩme'ẽ haipe; hãma ãĩme'ãiva rãĩmi haipe haima jyve mbaivarapo pijapohe kyrã'iva,

⁴ pimbatymarã, shypyapeĩpo ãĩme'ãĩkui pynymbytepe hareka Ñandeja Jesucristo heepe. Hãme rãnga Ñandeja Jesús ñymbaikatukue ryheve,

⁵ hokava kuimbai pymeẽshu Satanás, jyvarehe verã hete, hãmeĩpo hykove ohojepekui Ñandeja Jesús oujymarã.

⁶ Porãã rãnga kova ryheve pirojapi pindijeherã. Pikuaa kavi rãnga'ãmo pãhã mby'ouka mishĩtẽ harina mbihi'ava opaĩ mby'ou.

⁷ Hãrã pyheky pindijuhuvi hokava pãhã mby'ouka tuja vekua, iko pyndyhevi verã harina muhũ'ũã py'ahuva mby'ouamba. Ãñete rãnga pee hai pãhã mby'ouamba Pascuape ho'uava. Shara Cristo, hai Avisha ñande Pascuapeva ñandyrehe jukaha vekua.

⁸ Hãrã ñamby'aretepo Pascua, pãhã mby'ouka mbihi'ahamba rãĩmi, he'ise poshymbape hareka añetevape. Avy ñamby'arete pãhã mby'ouka tuja vekua ryheve, he'iseva poshy hareka ñandykya ryheve.

⁹ Kuatia ambyparavape rãnga hai pee, avy piko hãndi verã kuaretare kyrãrãĩ'iare.

¹⁰ Ha'ẽã rãnga pihiamba'eite verã kyrãrãĩma'iare, maĩrã kateỹvare, manarõ'iare, maĩrã ta'ãnga õmombai'iare. Kyrã potarã pẽhẽtei rãngaposhi ko yvy.

¹¹ Aipota hai peeva rãnga kova; avy pihia hei ijeheva Cristo ryheva, tẽvã ĩmeĩ kyrãrãĩ'ia, kateỹva, ta'ãnga õmombai'ia, ñeeryheva, kauva maĩrã manarõ'ia. Kyrã'ia kuareta avy rãngapo pykaru hãndi.

¹² Ẽẽã she ambivacheka verã haimba Ñandeja ryhevare, Tũpa rãngapo mbivacheshu retakui. Tẽvã peemapo pimbivacheka pyndyryhevare;

¹³ shara heiva rãĩmi mbyparahavape: Pymohẽ pynymbyteivi mbai porãmba japoteri'ia.